ទីក្រុងណាន់ៈ ក្រុមបាល់ទាត់ជម្រើសជាតិប្រទេសបារាំងបានឈ្នះក្រុមជម្រើសជាតិប្រទេសបូលីវីនៅក្នុងការប្រកួតមិត្តភាពមួយនៅទីក្រុងណាន់ (Nantes) ប្រទេសបារាំងកាលពីថ្ងៃអាទិត្យនៅមុនពេលម្ចាស់ជើងឯកពានរង្វាន់ World Cup ឆ្នាំ ២០១៨ មួយនេះនឹងបន្តយុទ្ធនាការប្រកួតជម្រុះសម្រាប់ព្រឹត្តិការណ៍ Euro ឆ្នាំ 2020។
ជុំវិញការប្រកួតមិត្តភាពនេះកីឡាករ Thomas Lemar បានជួយឲ្យបារាំងនាំមុខ ១ គ្រាប់នៅនាទីទី ៥ បន្ទាប់មកកីឡាករ Antoine Griezman ដែលប្រកាសកាលពីខែមុនថា គាត់នឹងចេញពីក្រុម Atletico Madrid ក្រោយពីលេងឲ្យក្លិបនេះ ៥ រដូវកាលហើយនោះរកបាន ១ គ្រាប់ទៀតនៅនាទីទី ៤២ ធ្វើឲ្យឈ្នះក្រុមជម្រើសជាតិបូលីវីលទ្ធផល ២-០។
កីឡាករ Griezmann បានជាប់ចំណាត់ថ្នាក់ទី ៨ នៅក្នុងបញ្ជីឈ្មោះកីឡាករដែលរកបានគ្រាប់ច្រើនជាងគេបំផុតនៅប្រទេសបារាំងជាមួយការបញ្ចូលទីលើកទី ២៩ របស់គាត់ក្នុងការប្រកួតថ្មីៗនេះធ្វើឲ្យគាត់វ៉ាដាច់កីឡាករ Youri Djorkaeff ដែលជាអ្នកជួយឲ្យជម្រើសជាតិបារាំងឈ្នះពាន World Cup ឆ្នាំ ១៩៩៨។
ឥឡូវនេះគាត់ចាញ់កីឡាករ Just Fontaine និង Jean-Pierre Papin តែ ១ គ្រាប់ប៉ុណ្ណោះ ខណៈដែលគាត់ចាញ់អតីតកីឡាករបាល់ទាត់គឺលោក Zinedine Zidane ចំនួន ២ គ្រាប់។
ជុំវិញការប្រកួតបែបមិត្តភាពនេះក៏មានក្ដីកង្វល់ខ្លះៗចំពោះក្រុមជម្រើសជាតិបារាំងផងដែរ ខណៈពួកគេគ្មានវត្តមានខ្សែប្រយុទ្ធឆ្នើម Kylian Mbappe នៅក្នុងតង់ទី ២ ដោយសារគាត់រងរបួសត្រង់កជើង។
ក្រុមជម្រើសជាតិបារាំងក្រោមការដឹកនាំរបស់លោក Didier Deschamps នឹងវិលទៅប្រកួតជាថ្មីម្ដងទៀតជាមួយក្រុមជម្រើសជាតិតួកគីនៅក្នុងពូល H នៅថ្ងៃទី ៨ ខែមិថុនា ខណៈជម្រើសជាតិទាំង ២ នេះមាន ៦ ពិន្ទុក្នុងដៃរៀងៗខ្លួនក្រោយពីបានប្រកួត ២ លើករួចមកហើយ។
កីឡាករ Griezmann បាននិយាយថា៖ «យើងត្រូវតែធ្វើការប្រកួតកម្ដៅសាច់ដុំខ្លះៗមុនពេលមានការប្រកួតកាន់តែតឹងរ៉ឹងជាមួយប្រទេសតួកគីដើម្បីត្រៀមខ្លួនទុកជាមុន»។
កីឡាកររូបនេះបន្ថែមថា៖ «ខ្ញុំប្រហែលជាមិនអាចស្ថិតនៅក្នុងទម្រង់លេងកំពូលនោះទេ ប៉ុន្តែការប្រកួតនេះនឹងធ្វើឲ្យខ្ញុំល្អដើម្បីទទួលបានបទពិសោធខ្លះៗ និងមានទម្រង់លេងល្អសម្រាប់ថ្ងៃសៅរ៍ខាងមុខនេះ»៕ SN