.jpg)
ខ្សែប្រយុទ្ធ Na Hyosang របស់ទ័ព ស៊ុតបាល់ពេលជួបក្រុមប៉ូលិស កន្លងមក។ ស្រេង ម៉េងស្រ៊ុន
ភ្នំពេញៈ ក្រុមក្រសួងការពារជាតិ (ទ័ព) គ្រោងនឹងកែប្រែភាពឈឺចាប់ ចំពោះការចាញ់ក្រុមភ្នំពេញក្រោន កាលពីជើងទី ១ ឲ្យទៅជាកម្លាំងចិត្ត សម្រាប់ការសងសឹក ភ្នំពេញក្រោន វិញ ចំពោះការវិលមកជួបគ្នា ក្នុងជើងទី ២ នៃលីកកំពូលកម្ពុជា ឆ្នាំ ២០១៨ នៅចុងសប្តាហ៍ នេះ ឯក្រុមបឹងកេត និងណាហ្គាវើល ត្រូវបានគេមើលឃើញថា អាចនឹងឈ្នះបាន ៣ ពិន្ទុបន្ថែម ដើម្បីបន្តឈរនៅ តំបន់កំពូលតារាងទាំង ២។
គេនៅចាំបានថា ក្រុមភ្នំពេញក្រោន បានធ្វើឲ្យក្រុមម្ចាស់ជើងឯករង ២ សម័យកាល ក្រសួងការពារជាតិ ស្គាល់រសជាតិចាញ់តាំងពីដើមរដូវកាលនេះ តាមរយៈការយកឈ្នះ ២-០ ប៉ុន្តែ លោក ភា សុភ័ក្ត្រា គ្រូបង្វឹកក្រុមទ័ព បានអះអាងថា ការចាញ់កាលនោះ ដោយសារទ័ព ស្ទើរតំបន់ប្រយុទ្ធ និងលេងមិនសូវយល់ចិត្តគ្នា។
លោក ភា សុភ័ក្ត្រា បានប្រាប់ភ្នំពេញប៉ុស្តិ៍ កាលពីម្សិលមិញថា៖ «ការចាញ់ ២-០ កាលនោះ ដោយសារយើងមិនសូវមានអ្នកប្រយុទ្ធមុតស្រួច ហើយការលេងរបស់យើង ក៏មិនទាន់ស៊ីចង្វាក់គ្នាល្អ ប៉ុន្តែនៅពេលនេះយើងមានការរីកចម្រើនជាងមុន ហើយរឿងដែលសំខាន់នោះ ខ្ញុំបានប្រាប់កីឡាករ ឲ្យធ្វើការប្រែភាពឈឺចាប់ចំពោះការចាញ់លើកមុនទៅជាកម្លាំងចិត្តវិញ គឺយើងត្រូវតែប្រឹងប្រែងរកជ័យជម្នះត្រឡប់មកវិញ»។
សម្រាប់ការប្រកួត៣លើកចុងក្រោយនេះ ក្រុមទ័ព ទទួលបានជ័យជម្នះរហូត ពិសេសការឈ្នះក្រុមប៉ូលិស ៤-០ និងការបន្តឈ្នះក្រុមអង្គរថាយហ្គឺរ ២-០ បានធ្វើឲ្យពួកគេអាចបន្តឈរនៅលេខរៀងទី ៤ ដោយមាន ២៤ ពិន្ទុ។ រីឯភ្នំពេញក្រោន ក៏មានការផ្លាស់ប្តូរទម្រង់លេងគួរឲ្យកត់សម្គាល់ផងដែរ ហើយការបន្តឈ្នះក្រុមសូលទីឡូអង្គរ ២-១ កាលពីសប្តាហ៍មុន បានជួយឲ្យពួកគេ ឡើងមកឈរនៅលេខរៀងទី ៥ វិញ ដោយមាន ២១ ពិន្ទុ។ ហេតុនេះ ភ្នំពេញក្រោន ក៏ត្រូវការឈ្នះដាច់ខាត ដើម្បីដណ្តើមយកទីតាំងរបស់ក្រុមទ័ពផងដែរ។
ជុំវិញទម្រង់លេងរបស់ភ្នំពេញក្រោន ក្នុងជើងទី២នេះ លោកភា សុភ័ក្ត្រា បាន និយាយថា៖ «ខាងគេមានការផ្លាស់ប្តូរដែរ ព្រោះគេយកខ្សែការពារទៅលេងប្រយុទ្ធ គេយកប្រយុទ្ធទៅលេងការពារ វិញ ដែលនេះជាស្ទីលរបស់គេ ប៉ុន្តែខ្ញុំអត់ខ្វល់ទេ ព្រោះវាជាការរៀបចំរបស់គេ សំខាន់ខ្ញុំមើលឃើញការរីកចម្រើនរបស់ខ្លួនឯងវិញ»។
លោក សុភ័ក្ត្រា បានបញ្ជាក់ថា៖«ពីមុនក្រុមយើងស្ទើរ យើងខ្សោយ យើង-លេងអត់ទាន់ត្រូវគ្នា ប៉ុន្តែឥឡូវយើងលេងបានស៊ីចង្វាក់គ្នា រហូតដល់បានឈ្នះការប្រកួត ៣ លើកចុងក្រោយ ហើយ នេះជាហេតុផលនាំឲ្យក្រុមរបស់យើង មានកម្លាំងចិត្ត និងមានការសហការគ្នាជាក្រុមបានល្អ។ ហេតុនេះសម្រាប់ ការជួបភ្នំពេញក្រោនលើកនេះ យើង មានរំពឹងច្រើន ក្នុងការឈ្នះ»។
ដោយឡែកក្រុមកំពុងឈរនៅកំពូលតារាង មាន ៣០ ពិន្ទុ បឹងកេត និងគូប្រជែងយ៉ាងស្រួចស្រាល់របស់ខ្លួនគឺ ណាហ្គាវើល ឈរនៅលេខ ២ មាន ២៨ ពិន្ទុ ត្រូវបានគេមើលឃើញថា អាចនឹងទទួលបាន ៣ ពិន្ទុបន្ថែមដូចគ្នា ព្រោះការប្រកួតប្រចាំសប្តាហ៍ទី ១៣ នេះ បឹងកេត ត្រូវវិលទៅជួបក្រុមឈរនៅបាតតារាង វេស្ទើន ដែលពួកគេធ្លាប់ឈ្នះ ៣-១ ក្នុងជើងទី ១ ហើយណាហ្គាវើល ត្រូវជួបក្រុមអគ្គិសនីកម្ពុជា ដែលពួកគេធ្លាប់លត់ ៥-១។
ចំណែកក្រុមកំពុងឈរលេខរៀងទី ៣ មាន ២៦ ពិន្ទុ វិសាខា ត្រូវជួបក្រុម-អង្គរថាយហ្គឺរ ដែលពួកគេធ្លាប់ឈ្នះ ២-០ ហើយក្រុមប៉ូលិស ឈរនៅលេខ ៦ មាន ២០ ពិន្ទុ ត្រូវវិលមកជួបក្រុមព្រះខ័នរាជស្វាយរៀង ដែលពួកគេធ្លាប់ស្មើ ០-០ ខណៈក្រុមអាស៊ីអឺរ៉ុប ត្រូវប៉ះក្រុមសូលទីឡូអង្គរ ដែលពួកគេធ្លាប់ឈ្នះ ២-១៕
កម្មវិធីប្រកួតនៅថ្ងៃសៅរ៍
-ណាហ្គាវើល v អគ្គិសនីកម្ពុជា នៅកីឡដ្ឋានស្តាតចាស់ ម៉ោង ៣:០០
-ស្វាយរៀង v ប៉ូលិស នៅកីឡដ្ឋានស្វាយរៀង ម៉ោង ៦:០០
-បឹងកេត v វេស្ទើន នៅពហុកីឡដ្ឋានជាតិ ម៉ោង ៦:០០
៣ ប្រកួតនៅថ្ងៃអាទិត្យ
-អាស៊ីអឺរ៉ុប v សូលទីឡូអង្គរ នៅ AEU Sport Park ម៉ោង ៣:០០
-ភ្នំពេញក្រោន v ទ័ព នៅកីឡដ្ឋាន RSN វេលាម៉ោង ៦:០០
-វិសាខា v អង្គរថាយហ្គឺរ នៅកីឡដ្ឋានស្តាតចាស់ ម៉ោង ៦:០០
