.jpg)
ក្រុមនារីកម្ពុជា (ខៀវ) ពេលប្រកួតជាមួយឥណ្ឌូនេស៊ី។ រូបថត FFC
ភ្នំពេញៈ ក្រុមកីឡាការិនីជម្រើសជាតិកម្ពុជា បានត្រឹមនាំយកបទពិសោធដ៏ជូរចត់ ជាមួយការចាញ់គ្រប់ប្រកួតក្នុងពានរង្វាន់ AFF Women''s Championship 2019 មកដល់មាតុប្រទេសវិញ កាលពីរសៀលថ្ងៃពុធម្សិលមិញ ប៉ុន្តែក្រុមកីឡាករជម្រើសជាតិកម្ពុជាអាយុក្រោម ១៥ ឆ្នាំ បាននិងកំពុងប្រកួតប្រជែងក្នុងពាន “Jinshan Cup” International Youth Football Championship 2019 នៅ ស៊ាងហៃ ប្រទេស ចិន។
សម្រាប់ការប្រកួតដែលបានធ្វើនៅប្រទេស ថៃ នោះ ក្រុមកីឡាការិនីកម្ពុជា បានចាញ់ទាំង ៣ ប្រកួត និងបានរបូតគ្រាប់បាល់រហូតដល់ ២៤ គ្រាប់ និងរកបានតែ ១ គ្រាប់គត់ ដែលជាការស៊ុតបាល់ពិន័យ ១១ ម៉ែត្រ បានសម្រេចរបស់កីឡាការិនី សំរ៉ិត និមល នៅពេលក្រុមពួកគេចាញ់ក្រុមនារីមីយ៉ាន់ម៉ា ១០-១ ក្នុងការប្រកួតជម្រុះលើកទី២ ប្រចាំពូល B កាលពីថ្ងៃទី ១៨ ខែ សីហា។
ចំណែក ២ ប្រកួតទៀត ក្រុមនារីកម្ពុជា បានចាញ់ក្រុមនារីវៀតណាម ១០-០ ក្នុងការប្រកួតបើកឆាកកាលពីថ្ងៃទី ១៦ ខែ សីហា ហើយការប្រកួតបង្រ្គប់កិច្ចលើកចុងក្រោយកាលពីថ្ងៃអង្គារ ក្រុមកម្ពុជាចាញ់ក្រុមនារីឥណ្ឌូនេស៊ី ៤-០ មុនពេលក្រុមទាំង ២ នេះ បានធ្លាក់ និងវិលត្រឡប់មកផ្ទះវិញ កាលពីម្សិលមិញ។
ចំណែកក្រុមវៀតណាម ដែលទទួលបានលេខ ១ ដោយឈ្នះទាំង ៣ ប្រកួត មាន ៩ ពិន្ទុពេញ និងក្រុមមីយ៉ាន់ម៉ាឈរនៅលេខ ២ ជាមួយការឈ្នះ ២ និងចាញ់ ១ មាន ៦ ពិន្ទុ ត្រូវបន្តដំណើរឡើងទៅប្រកួតវគ្គពាក់កណ្តាលផ្តាច់ព្រ័ត្រ ដោយក្រុមទាំង ២ នេះ អាចនឹងត្រូវជួបក្រុមនារីថៃ និងក្រុមនារីហ្វីលីពីន ព្រោះក្រុមទាំង ២ នេះ កំពុងមានពិន្ទុនាំមុខ និងមានប្រៀបលើក្រុមម៉ាឡេស៊ី ទីម័រខាងកើត និងក្រុមនារីសិង្ហបុរី ដែលឈរនៅពូល A ជាមួយគ្នា។
ដោយឡែកក្រុមកីឡាករជម្រើសជាតិកម្ពុជាអាយុក្រោម ១៥ ឆ្នាំ បាននិងកំពុងប្រកួតប្រជែង ក្នុងពានរង្វាន់ “Jinshan Cup” International Youth Football Championship 2019 ដែលធ្វើនៅទីក្រុងស៊ាងហៃ ខណៈព្រឹត្តិការណ៍នេះមានប្រទេសចំនួន ៧ ចូលរួម ស្មើនឹង១២ក្រុម ហើយការប្រកួតមានទាំងក្របខ័ណ្ឌ U15 និង U14។
តាមកម្មវិធីប្រកួតនៃក្របខ័ណ្ឌ U15 គឺក្រុម U15 កម្ពុជា បានឈរនៅពូល B ជាមួយក្រុម U15ជម្រើសរបស់ចិន ក្រុម U15 West Austrlia របស់អូស្រ្តាលី និងក្រុមយុវជន U15 Standard de Liege របស់ប្រទេស បែលហ្ស៊ិក ខណៈពូល A មានក្រុម U15 Hubei FA របស់ចិន ក្រុម U15 SK Slavia Praha របស់ឆែក ក្រុម U15 AJ Auxerre របស់ប្រទេស បារាំង និងក្រុម U15 Sh.Shenxin របស់ចិន។
ការប្រកួតជម្រុះតាមពូលទាំង ២ នេះ បានចាប់ផ្តើមកាលពីថ្ងៃពុធ គ្រោងនឹងបញ្ចប់នៅថ្ងៃទី ២៦ ខែសីហា ដោយក្នុងនោះក្រុមបានលេខ ១ ពូល A និងលេខ ១ ពូល A ត្រូវឡើងទៅជួបគ្នា ដើម្បីប្រជែងយកលេខ ១ និងលេខ ២ ឯក្រុមលេខ ២ នៃពូលទាំង ២ ត្រូវប្រកួតគ្នាដណ្តើមយកលេខ ៣ និងលេខ ៤ ចំណែកក្រុមលេខ ៣ ពូល A និងពូល B ប្រកួតគ្នាយកលេខ ៥ និងលេខ ៦ ខណៈក្រុមលេខ ៤ បាតតារាងនៃពូលទាំង ២ ក៏ត្រូវប្រកួតគ្នា យកលេខ ៧ និងលេខ ៨ ផងដែរ។
ដោយឡែកការប្រកួតក្របខ័ណ្ឌ U14 មាន ៤ ក្រុម គឺ U14 West Austrlia របស់អូស្រ្តាលី ក្រុម U14 Sh.Shenxin របស់ម្ចាស់ផ្ទះចិន ក្រុម U14 Hong Kong និងក្រុម U14 Shonan Bellmare របស់ប្រទេស ជប៉ុន ដោយក្រុមទាំង ៤ នេះ ត្រូវប្រកួតវិលជុំ រួចយកក្រុមលេខ ១ និងលេខ ២ ដណ្តើមយកពាន ខណៈក្រុមលេខ ៣ និងលេខ ៤ គឺត្រូវប្រកួតគ្នាដណ្តើមយកលេខ ៣ និងលេខ ៤៕
