.jpg)
ក្រុមបាល់បោះជនពិការកម្ពុជាទាំង ២ ក្រុមពេលថតជាមួយគ្រូបង្វឹកលោក ម៉ៅ សុខជា។
ភ្នំពេញៈ ក្រុមកីឡាករ កីឡាការិនីបាល់បោះជនពិការកម្ពុជា សុទ្ធតែដណ្តើមបានមេដាយរៀងៗខ្លួននៅក្នុងការប្រកួតកីឡាបាល់បោះជិះរទេះដណ្តើមពានអន្តរជាតិ Bali Cup លើកទី ៦ ឆ្នាំ ២០១៩ (6th Bali Cup International Wheelchair Basketball 2019) នៅបាលី ប្រទេសឥណ្ឌូនេស៊ី។
តាមរយៈការប្រកួតដាច់ដោយឡែកពីគ្នានេះក្រុមកីឡាការិនីបាល់បោះជនពិការកម្ពុជាធ្វើបានល្អប្រសើរជាងក្រុមបុរស ប៉ុន្តែក្រុមតំណាងឲ្យកម្ពុជាទាំង ២ នេះសុទ្ធតែចាញ់ក្រុមបារាំងដូចគ្នា មុនពេលដណ្តើមបានមេដាយប្រាក់ និងមេដាយសំរឹទ្ធនៅក្នុងព្រឹត្តិការណ៍នេះ។
ជាមួយការប្រកួតយ៉ាងស្វិតស្វាញក្នុងប្រភេទវិញ្ញាសា ៣ នាក់ទល់ ៣ នាក់ដែលមាន ៤ ក្រុមចូលរួមនោះ ក្រុមនារីកម្ពុជាបានចាញ់តែម្តងគត់ក្នុងវគ្គជម្រុះវិលជុំទាំង ២ ជើងដោយពួកគេរកបាន ៩ ពិន្ទុជាមួយការឈ្នះ ៤ ស្មើ ១ និងចាញ់ ១ ប្រកួតមុនពេលក្រុមនារីដ៏ស្វាហាប់មួយនេះបានបន្តយកឈ្នះក្រុមម្ចាស់ផ្ទះបាលីជាមួយពិន្ទុ ៨-២ នៅវគ្គពាក់កណ្តាលផ្តាច់ព្រ័ត្រ ហើយក្រុមលេខ ១ របស់បារាំងបានលត់ក្រុម Jakarta ១៣-១ ក្នុងវគ្គនេះផងដែរ។
លទ្ធផលនេះបានធ្វើឲ្យក្រុមនារីកម្ពុជា និងក្រុមនារីបារាំងឡើងទៅជួបគ្នាម្តងទៀតនៅវគ្គផ្តាច់ព្រ័ត្រ ខណៈការជួបគ្នា ២ លើកក្នុងវគ្គជម្រុះវិលជុំ ក្រុមបារាំងបានឈ្នះពិន្ទុ ៩-៧ ក្នុងជើងទី ១ និងស្មើគ្នា ៨-៨ ក្នុងជើងទី ២។ ប៉ុន្តែវាពិតជាគួរឲ្យសោកស្តាយបំផុតដែលក្រុមកម្ពុជាបានបន្តចាញ់ក្រុមបារាំង ៩-៨ ដោយទទួលបានមេដាយប្រាក់ ខណៈបារាំងបានមេដាយមាស រីឯក្រុមបាលីបានយកឈ្នះក្រុម Jakarta ជាមួយពិន្ទុ ៤-០ ដើម្បីទទួលបានមេដាយសំរឹទ្ធ។
ដោយឡែកសម្រាប់ការប្រកួត ៥ នាក់ទល់ ៥ នាក់ផ្នែកបុរសវិញ ក្រុមកម្ពុជា បានទទួលចំណាត់ថ្នាក់លេខ ៤ ក្នុងការប្រកួតជម្រុះវិលជុំដែលមាន ៦ ក្រុមចូលរួមដោយឈ្នះ ២ និងចាញ់ ៣ ដង ប៉ុន្តែការឡើងទៅជួបក្រុមបារាំងនៅវគ្គ ១/២ ផ្តាច់ព្រ័ត្រ ក្រុមកម្ពុជាបានបន្តចាញ់ ៩៥-១២ បន្ថែមទៅលើការចាញ់ពិន្ទុ ៧៨-១៧ កាលជួបគ្នាក្នុងវគ្គជម្រុះ។
យ៉ាងណាក៏ដោយក្រុមកីឡាករកម្ពុជាបានសម្រេចការសងសឹកលើក្រុមសិង្ហបុរីតាមរយៈការយកឈ្នះជាមួយពិន្ទុ ៣០-២៥ ក្នុងការប្រកួតដណ្តើមយកមេដាយសំរឹទ្ធដើម្បីលុបចោលការចាញ់ ២៣-១៩ កាលជួបគ្នាក្នុងវគ្គជម្រុះ។ ចំណែកឯក្រុមបារាំងបានយកឈ្នះក្រុមម៉ាឡេស៊ី ៧៦-៤ ពិន្ទុ នៅវគ្គផ្តាច់ព្រ័ត្រ ដើម្បីទទួលបានមេដាយមាសជាមួយកំណត់ត្រាឈ្នះគ្រប់ការប្រកួតទាំង ៦ លើក៕
