.jpg)
រូបថត ហ្វេសប៊ុករដ្ឋមន្ត្រីកសិកម្ម ឌិត ទីណា
ភ្នំពេញ៖ ក្រុមកីឡាការិនីប៉េតង់កម្ពុជា បានឈ្នះឈ្នះមេដាយមាសទី ២ ឲ្យកម្ពុជា សម្រាប់ការប្រកួតស៊ីហ្គេម លើកទី ៣០ ឆ្នាំ ២០១៩ ដែលកំពុងធ្វើនៅប្រទេសហ្វីលីពីន ហើយជ័យជម្នះដ៏ធំនេះ បានកើតមានឡើង បន្ទាប់ពួកគេបានរួមគ្នាយកឈ្នះក្រុមកីឡាការិនីរបស់ម៉ាឡេស៊ី ក្នុងការប្រកួតផ្តាច់ព្រ័ត្រ មុននេះបន្តិច។
មេដាយមាសទី ២ ដែលកម្ពុជាទើបតែដណ្តើមបាននេះ គឺរកបានដោយ ស្រ៊ាង សុរ៉ាឃីម, ឃួន យ៉ារី, អ៊ិន ស្រីយ៉ា និង ឌួង ឌីណា (បម្រុងម្នាក់) បន្ទាប់ពួកគេ បានយកឈ្នះក្រុមម៉ាឡេស៊ី ជាមួយពិន្ទុ ១៣-៤ ក្នុងការប្រកួតវិញ្ញាសា ៣ នាក់ ទល់ ៣ នាក់ ខណៈមេដាយមាសទី ១ រកបានដោយកីឡាករល្បក្កតោ យ៉ង់ ម៉េងលី លើការប្រកួតកីឡា Arnis។
ចំណែកការប្រកួតជាគូ របស់ម្ចាស់មេដាយមាសពិភពលោក សុខ ច័ន្ទមាន និង ញឹម បូរ៉ា គឺបានយកឈ្នះក្រុមឥណ្ឌូនេស៊ី ១៣-១ និងឈ្នះក្រុមវៀតណាម ១៣-១១ ហើយសម្រាប់ការប្រកួតលើកទី ៣ អ្នកទាំង ២ ត្រូវប្រឈមជាមួយក្រុមថៃ ដែលបានចាញ់ក្រុមវៀតណាម តែឈ្នះក្រុមឥណ្ឌូនេស៊ី ១៣-១ ដែរ។
ចំណែកការប្រកួតគូនារីរបស់វីរកីឡាការិនី កែ ឡេង និង អ៊ុក ស្រីមុំ បានចាញ់ក្រុមម៉ាឡេស៊ី ១៣-៩ និងបានឈ្នះក្រុមម្ចាស់ផ្ទះហ្វីលីពីន ១៣-២ ហើយលើកទី ៣ អ្នកទាំង ២ ត្រូវជួបក្រុមវៀតណាម នៅថ្ងៃនេះ។ ប៉ុន្តែក្រុមប៉េតង់បុរសកម្ពុជា ដែលមានកីឡាករ ថោង ឈឿង, តិប ណូរ៉ា និង សៀង វណ្ណា បានធ្លាក់ចេញពីការប្រកួតជាក្រុម ៣ នាក់ ទល់ ៣ នាក់នេះ ត្រឹមវគ្គជម្រុះតាមពូល៕
