.jpg)
វី សម្ផស្ស (ពីឆ្វេង) បាំង ណុន និង សៅ រង្សី នឹងចេញទៅប្រកួតនៅចិន ថ្ងៃនេះ។ សហការី
ភ្នំពេញ៖ កីឡាករ បាំង ណុន របស់សមាគមប្រដាល់ក្រសួងមហាផ្ទៃ និងកីឡាករ សៅ រង្សី មកពីក្លិបក្រសួងសេដ្ឋកិច្ចហិរញ្ញវត្ថុ ដែលទើបឈ្នះបានមេដាយមាសក្នុងការប្រកួតកីឡាប្រដាល់សកលថ្នាក់ជាតិ កាលពីពេលថ្មីៗនេះ ព្រមទាំងកីឡាករ វី សុភ័ស្ស ដែលឆ្នាំនេះធ្លាក់ចេញពីជយលាភីប្រចាំឆ្នាំ ត្រូវបានសហព័ន្ធកីឡាប្រដាល់សកលកម្ពុជា បញ្ជូនឲ្យទៅចូលរួមការប្រកួត 2nd Belt and Road CHINA-ASIAN Boxing Championship 2019 នៅប្រទេស ចិន។
អ្នកប្រដាល់សកលកម្ពុជាទាំង ៣ នាក់ខាងលើ និងប្រតិភូ នឹងចាកចេញពីមាតុប្រទេសនៅថ្ងៃពុធនេះ ដើម្បីចូលរួមការប្រកួត 2nd Belt and Road CHINA-ASIAN Boxing Championship 2019 នៅខេត្តណាននីង ដែលប្រកួតផ្លូវការពីថ្ងៃទី ២៥ ដល់ថ្ងៃ ២៧ ខែតុលា។
អត្តពលិកមកពីប្រទេសចំនួន ៩ បានចូលរួមក្នុងព្រឹត្តិការណ៍នេះ ហើយកីឡាករកម្ពុជាទើបមានឱកាសបានចូលប្រកួតលើកនេះ ដោយសារប្រទេស ចិន ជាម្ចាស់ផ្ទះ ជាអ្នកជួយឧបត្ថម្ភ ខណៈប្រទេសផ្សេងទៀត ដែលបានចូលរួមប្រកួតប្រជែងមាន ថៃ ហ្វីលីពីន ម៉ាឡេស៊ី ឡាវ ឥណ្ឌូនេស៊ី សិង្ហបុរី និងវៀតណាម ជាដើម។
លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានប្រាប់ថា៖ «ការប្រកួតនេះ សហព័ន្ធបានធ្វើការជ្រើសរើសយ៉ាងសម្រិតសម្រាំងនូវកីឡាករឆ្នើមចំនួន ៣ រូប ទៅចូលរួម ដើម្បីទទួលបានលទ្ធផលល្អ គឺកីឡាករ សៅ រង្សី ទើបតែឈ្នះមេដាយមាសថ្នាក់ជាតិ ក្នុងទម្ងន់ ៤៩ គីឡូក្រាម កីឡាករ បាំង ណុន ទើបឈ្នះមេដាយមាសក្នុងទម្ងន់ ៥២ គីឡូក្រាម និងកីឡាករ វី សុភ័ស្ស ក្នុងទម្ងន់ ៦៤ គីឡូក្រាម ហើយពួកគាត់ សុទ្ធតែជាកីឡាករជម្រើសជាតិ ដែលត្រៀមចូលរួមប្រកួតកីឡាស៊ីហ្គេម នៅហ្វីលីពីន ចុងឆ្នាំនេះផងដែរ»។
សម្រាប់ការទៅចូលរួមប្រកួតនេះ ដឹកនាំដោយលោក វេជ្ជបណ្ឌិត ឆឹង យ៉ៅយ៉េន ជាប្រធានសហព័ន្ធប្រដាល់សកល និងលោក ប៊ុយ សោភ័ណ្ឌ ព្រមទាំងគ្រូបង្វឹកលោក ជ័យ ដារា និងលោក សួស លីណា ហៅ ឡុង ស៊ីលីន។
ជាមួយគ្នានេះ សហព័ន្ធកីឡាប្រដាល់សកលកម្ពុជាត្រូវបានម្ចាស់ផ្ទះអញ្ជើញឲ្យចូលរូមប្រជុំជាមួយថ្នាក់ដឹកនាំសហព័ន្ធកីឡាប្រដាល់សកលចិន និងបណ្ដាប្រទេសនៅក្នុងតំបន់អាស៊ាន ដើម្បីពិភាក្សាពីការពង្រីកកិច្ចសហប្រតិបត្តិការអភិវឌ្ឍន៍កីឡាប្រដាល់សកល ក្នុងតំបន់អាស៊ានជាមួយប្រទេស ចិន ក្នុងគោលដៅពាក្យថា «Belt មួយ Road មួយនៃ CHINA-ASIAN Boxing Championship 2019»។
លោក ប៊ុយ សោភ័ណ្ឌ បានលម្អិតទៀតថា៖ «នេះគឺជាឱកាសដ៏ល្អបំផុត ដែលកីឡាប្រដាល់សកលកម្ពុជា បានធ្វើការដកស្រង់បទពិសោធ និងបច្ចេកទេស ជាមួយបណ្ដាប្រទេសក្នុងតំបន់ ហើយក៏ជាឱកាសក្នុងការវាស់ស្ទង់នូវកម្រិតបច្ចេកទេស មុនពេលចេញទៅស៊ីហ្គេមចុងឆ្នាំផងដែរ ហើយសកម្មភាពរបស់ប្រដាល់សកល គឺមានទីផ្សារប្រកួតឡើងវិញលើឆាកអន្តរជាតិ»។
ចំណែកលោក ឆឹង យ៉ៅយ៉េន បានថ្លែងថា៖ «បេសកកម្មចេញទៅប្រកួតនេះ សហព័ន្ធទទួលបានការហូបចុកស្នាក់នៅ ព្រមទាំងសំបុត្រយន្តហោះពីម្ចាស់ផ្ទះចិន ខណៈដែលប្រាក់ហោប៉ាវទទួលបានពីគណៈកម្មាធិការរៀបចំកីឡាអាស៊ានលើកទី ៣២ (CAMSOC) ហើយក្រសួងអប់រំ យុវជន និងកីឡា អនុញ្ញាតច្បាប់»៕
