ភ្នំពេញៈ ក្រុមអត្តពលិកកីឡាវ៉ូវីណាមចំនួន ២០ នាក់ រួមទាំងថ្នាក់ដឹកនាំ និងគ្រូបង្វឹកសរុប ៥ នាក់ទៀត នឹងធ្វើដំណើរទៅកាន់កោះបាលី ប្រទេសឥណ្ឌូនេស៊ី នៅព្រឹកម៉ោង ៩:៣០ ថ្ងៃសុក្រនេះ ដើម្បីទៅចូលរួមការប្រកួតកីឡាវ៉ូវីណាមជើងឯកអាស៊ី លើកទី ៤ ឆ្នាំ ២០១៨ ៩The 4th AVF ASIAN Vovinam Cahmpionship 2018) នៅទីនោះ ដែលនឹងចាប់ដំណើរការប្រកួតប្រជែងពីថ្ងៃទី ៣ ដល់ថ្ងៃទី ៧ ខែវិច្ឆិកា។
បើទោះបីជា ក្រុមវ៉ូវីណាមកម្ពុជា ធ្លាប់បានចេញទៅប្រកួតនៅលើឆាកអន្តរជាតិ ច្រើនលើក និងធ្លាប់ឈ្នះមេដាយមាស ៤ ប្រាក់ ៩ និងសំរឹទ្ធ ៩ ពីការប្រកួតជើងឯកពិភពលោក ឆ្នាំ ២០១៧ នៅឥណ្ឌាក្តី ប៉ុន្តែនេះជាលើកទី ១ ដែលក្រុមវ៉ូវីណាម បានចូលរួមការប្រកួតជើងឯកអាស៊ី លើកនេះ តែជាការចូលរួមបែបលក្ខណៈទ្រង់ទ្រាយធំ ព្រោះក្រុមអត្តពលិកទាំង ២០ នាក់ បានចូលរួមគ្រប់វិញ្ញាសាតែម្តង ដោយក្នុងនោះមានប្រយុទ្ធ ១៣ ប្រភេទទម្ងន់ និងសម្តែង ២៤ វិញ្ញាសា។
លោក ទេព ជីវសុខុម អគ្គលេខាធិការសហព័ន្ធកីឡាវ៉ូវីណាមកម្ពុជា បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «នេះជាលើកទី ១ ហើយ ដែលយើងបានចូលរួមការប្រកួតជើងឯកអាស៊ី ហើយការទៅចូលរួមលើកនេះ យើងត្រៀមបានល្អលើការហ្វឹកហាត់ ក៏ដូចជាបច្ចេកទេសមួយចំនួន ដែលមានការអភិវឌ្ឍជាងមុន អ៊ីចឹងយើងអាចមានសង្ឃឹមដណ្តើមបានមេដាយជូនជាតិ គឺយើងរំពឹងថា អាចនឹងបានមេដាយមាស»។
យ៉ាងណាក៏ដោយ នៅក្នុង ចំណោមប្រទេសជាង ២០ ដែលបានចូលរួម ក្នុងការប្រកួតកីឡាវ៉ូវីណាមជើងឯកអាស៊ីនេះ លោក ជីវសុខុម បានចាត់ទុកប្រទេស ៣ ជារនាំងសម្រាប់ក្រុមកម្ពុជា។
លោកបាននិយាយថា៖ «យើង មិនអាចមើលស្រាលក្រុមវៀតណាមបានទេ ព្រោះគេជាម្ចាស់ក្បាច់គុននេះ ហើយឥណ្ឌូនេស៊ី ក៏អាចរៀបចំបានល្អដែរ ទើបគេហ៊ានធ្វើជាម្ចាស់ផ្ទះ។ ចំណែកអ៊ីរ៉ង់ ល្អប្រយុទ្ធ ជាងវៀតណាមទៅទៀត អ៊ីចឹងប្រទេសទាំង ៣ នេះ ស្ថិតក្នុងការបារម្ភរបស់យើង»។
បើទោះបីជា មានការបារម្ភពីប្រទេសទាំង ៣ ខាងលើនេះក្តី ប៉ុន្តែលោក ទេព ជីវសុខុម នៅតែមានការជឿជាក់ថា ក្រុមវ៉ូវីណាមកម្ពុជា នឹងនៅតែមានភាពអាទិភាពខ្ពស់ ប្រជែងយកមេដាយ ទាំងលើវិញ្ញាសាប្រយុទ្ធ និងសម្តែង។ បន្ថែមលើនេះ ការទើបសម្រេចដាក់ប្រភេទកីឡាវ៉ូវីណាម ឲ្យចូលរួមក្នុងការប្រកួតស៊ីហ្គេម ជាថ្មីវិញ របស់ម្ចាស់ផ្ទះហ្វីលីពីន ក្នុងឆ្នាំ ២០១៩ បានបន្ថែមកម្លាំងចិត្តថ្មីមួយដល់ដល់ក្រុមវ៉ូវីណាមកម្ពុជា ក្នុងការប្រជែងយកមេដាយ ការប្រកួតជើងឯកអាស៊ី លើកនេះ។
លោក ជីវសុខុម បញ្ជាក់ថា៖ «ការដាក់ប្រភេទកីឡាវ៉ូវីណាម ឲ្យចូលរួមស៊ីហ្គេមវិញ នៅហ្វីលីពីន ឆ្នាំ ២០១៩ បានក្លាយជាដំណឹងដ៏ល្អមួយ ដែលនឹងធ្វើឲ្យក្រុមអត្តពលិករបស់យើង មានការខិតខំប្រឹងប្រែងកាន់តែខ្លាំង ព្រោះយើងកំពុងសម្រួចទៅស៊ីហ្គេម ឆ្នាំ ២០២៣ នៅកម្ពុជា ដូច្នេះសូមបងប្អូនជនរួមជាតិ ចូលរួមលើកទឹកចិត្តដល់ក្រុមវ៉ូវីណាមកម្ពុជា ក្នុងការចេញទៅប្រកួតទាំងនៅក្រៅប្រទេស និងក្នុងប្រទេស ដើម្បីរួមចំណែកលើកស្ទួយវិស័យកីឡាទាំងអស់គ្នា ក្នុងទិសដៅទទួលបានជោគជ័យធំ នៅស៊ីហ្គេម ឆ្នាំ ២០២៣»៕