ភ្នំពេញ៖ ក្រុមនារីជម្រើសជាតិហុកគីកម្ពុជា បានកើនភាគរយមួយកម្រិតទៀត ដោយឈានទៅបង្កើតប្រវត្តិសាស្រ្ត ដើម្បីដណ្តើមឲ្យបានមេដាយ ជាលើកដំបូង ក្នុងការប្រកួតស៊ីហ្គេមលើកទី ៣០ ដែលកំពុងធ្វើនៅប្រទេស ហ្វីលីពីន ហើយការកើនភាគរយនេះ ដោយសារតែក្រុមខ្លាំងរបស់ឥណ្ឌូនេស៊ី ត្រូវបានគណៈកម្មការសម្រេចដកសិទ្ធិចេញពីការប្រកួតនេះ។
លោក កាំង សុធា អគ្គលេខាធិការ សហព័ន្ធកីឡាហុកគីកម្ពុជា បានប្រាប់ភ្នំពេញប៉ុស្តិ៍ មុនចេញដំណើរទៅប្រទេស ហ្វីលីពីន ថា៖ «ការចូលរួមប្រកួតស៊ីហ្គេម ជាលើកដំបូង នៅប្រទេស មីយ៉ាន់ម៉ា កាលពីឆ្នាំ ២០១៣ ក្រុមហុកគីនារីរបស់យើង មិនទទួលបានលទ្ធផលល្អទេ ប៉ុន្តែការចូលរួមស៊ីហ្គេមជាលើកទី ២ នេះ យើងមានការរំពឹងខ្ពស់ ថានឹងទទួលបានលទ្ធផលល្អ»។
គួររំឭកថា ក្រុមហុកគីនារីកម្ពុជាធ្លាប់បានចូលរួមការប្រកួតស៊ីហ្គេមជាលើកដំបូង នៅប្រទេស មីយ៉ាន់ម៉ា កាលពីឆ្នាំ ២០១៣ ប៉ុន្តែតាមរយៈការប្រកួតនោះ ក្រុមកម្ពុជា បានចាញ់គូប្រកួតដាច់ស្ទើរគ្រប់ការប្រកួត។ យ៉ាងណាក៏ដោយ ការប្រឹងប្រែងហ្វឹកហាត់នៅក្នុងស្រុក និងការចេញទៅហាត់នៅក្រៅប្រទេស ព្រមទាំងការចូលរួមប្រកួតនៅលើឆាកអន្តរជាតិជាញឹកញយនោះ បានធ្វើឲ្យក្រុមនារីតំណាងឲ្យប្រទេស កម្ពុជា ទាំងនេះ មានកម្រិតបច្ចេកទេសរីកចម្រើនគួរឲ្យកត់សម្គាល់។
លោក កាំង សុធា បានបន្ថែមថា៖ «ការហ៊ានរំពឹងខ្ពស់នេះ ក៏ព្រោះតែក្រុមហុកគីកម្ពុជា បានទៅហ្វឹកហាត់ និងប្រកួតដងស្រង់បច្ចេកទេសនៅប្រទេស ថៃ បានរយៈពេល ១ ខែកន្លះ ព្រមទាំងបានចេញទៅប្រកួតព្រឹត្តិការណ៍ផ្សេងៗ នៅលើឆាកអន្តរជាតិផងដែរ ដែលធ្វើឲ្យសមត្ថភាពរបស់ពួកគេ មានការកើនឡើងច្រើន ព្រោះតាមការប្រៀបធៀបទៅសមត្ថភាពក្រុម ដែលបានចូលរួមប្រកួតស៊ីហ្គេម កាលពីឆ្នាំ ២០១៧ យើងមើលឃើញថា សមត្ថភាពរបស់ក្រុមយើងពេលនេះ អាចនៅលើគេ ឬស្មើគេ»។
បន្ថែមលើការរំពឹងនេះ ក្រុមហុកគីនារីកម្ពុជា បានកើនភាគរយមួយកម្រិតទៀត ក្នុងការឈានទៅសម្រេចការឈ្នះបានមេដាយនៅស៊ីហ្គេមលើកនេះ ខណៈក្រុមធ្លាប់ឈ្នះមេដាយមាសរបស់ឥណ្ឌូនេស៊ី ត្រូវបានគណៈកម្មការសម្រេចដាក់ឈ្នះចេញពីការប្រកួតក្នុងការប្រជុំបច្ចេកទេស កាលពីល្ងាចថ្ងៃអង្គារ។
ការដកបេក្ខភាពរបស់ក្រុមនារីឥណ្ឌូនេស៊ី បានធ្វើឲ្យការប្រកួតហុកគីផ្នែកនារី ក្នុងយុទ្ធនាការស៊ីហ្គេមនៅហ្វីលីពីនលើកនេះ នៅសល់ ៥ ក្រុមប៉ុណ្ណោះ គឺមានកម្ពុជា ថៃ ម៉ាឡេស៊ី សិង្ហបុរី និងម្ចាស់ផ្ទះហ្វីលីពីន ហើយតាមរូបមន្ត និងលក្ខខណ្ឌប្រកួត គឺមានតែ ១ ក្រុមប៉ុណ្ណោះ ដែលមិនបានមេដាយពីការប្រកួតនេះ ខណៈ ៤ ក្រុមទៀត យ៉ាងហោចណាស់ក៏បានមេដាយសំរឹទ្ធដែរ។
ចំណែករូបមន្តនៃការប្រកួត គឺក្រុមទាំង ៥ នេះ ត្រូវប្រកួតវិលជុំចំនួន ៤ លើកដូចគ្នា រួចទើបធ្វើការបូកសរុបលទ្ធផល ដើម្បីយក ៤ ក្រុម មានពិន្ទុខ្ពស់ជាងគេ ឡើងទៅវគ្គពាក់កណ្តាលផ្តាច់ព្រ័ត្រ ហើយក្រុមទាំង ៤ នេះ ក៏មានមេដាយសំរឹទ្ធក្នុងដៃរួចជាស្រេចផងដែរ។ ចំណែកកម្ពុជានឹងត្រូវប្រកួតបើកឆាកជាមួយក្រុមសិង្ហបុរី នៅថ្ងៃពុធនេះ មុនទៅជួបក្រុមម៉ាឡេស៊ី ថៃ ហ្វីលីពីន និងម៉ាឡេស៊ី។
ជុំវិញការដកបេក្ខភាពក្រុមឥណ្ឌូនេស៊ីនេះ លោក កាំង សុធា បានប្រាប់ពីប្រទេស ហ្វីលីពីន ថា៖ «ពិតណាស់ក្រុមឥណ្ឌូនេស៊ី គឺជាក្រុមខ្លាំងមួយ អ៊ិចឹងការគ្មានវត្តមានក្រុមនេះ នឹងធ្វើឲ្យយើងកាន់តែមានសង្ឃឹមខ្ពស់ ក្នុងការឈានទៅដណ្តើមបានមេដាយ»៕