.jpg)
ស្រេង ម៉េងស្រ៊ុន
ភ្នំពេញ៖ ក្រុមហ្វុតសាលជម្រើសជាតិកម្ពុជា មិនអាចប្រើប្រាស់បទពិសោធ ដែលកើតចេញពីការត្រៀមខ្លួនរយៈពេលមិនដល់ ១ ខែ ដើម្បីទៅទប់ទល់ជាមួយក្រុមហ្វុតសាលជម្រើសជាតិ ម៉ាឡេស៊ី បាននោះទ គឺពួកគេបានចាញ់រហូតដល់ ១០-០ នៅក្នុងការប្រកួតបើកឆាកពានរង្វាន់ AFF Futsal Championship 2018 នៅប្រទេស ឥណ្ឌូនេស៊ី នៅថ្ងៃចន្ទនេះ។
សម្រាប់ការប្រកួតត្រឹមរយៈពេល៤០នាទី ដែលបានចាប់ផ្តើម កាលពីព្រឹកម៉ោង ១១:៣០ ថ្ងៃចន្ទនេះ ក្រុមហ្វុតសាលជម្រើសជាតិ ម៉ាឡេស៊ី បានធ្វើការដាក់សម្ពាធ ជាបន្តបន្ទាប់ ដែលធ្វើឲ្យក្រុមហ្វុតសាល កម្ពុជា បានព្យាយាមបិទនៅតំបន់ការពារភាគច្រើន និងបានវាយបកទៅកាន់ក្រុមម៉ាឡេស៊ី បានម្តងម្កាលផងដែរ។
យ៉ាងណាក៏ដោយ ឱកាសដ៏តិចតួចរបស់ក្រុមកម្ពុជា មិនអាចជួយឲ្យពួកគេ រកបានគ្រាប់បាល់នោះទេ ផ្ទុយទៅវិញការវាយសម្រុករបស់ម៉ាឡេស៊ី បានជួយឲ្យពួកគេ រកបាន ៤ គ្រាប់ ក្នុងការប្រកួតរយៈពេល ២០ នាទី ក្នុងតង់ទី ១ ហើយនៅតង់ទី ២ គឺពេលដែលក្រុមហ្វុតសាលកម្ពុជា ថមថយគុណភាពកម្លាំងនោះ ក្រុមម៉ាឡេស៊ី រកបាន ៦ គ្រាប់បន្ថែមទៀត។
ការយកឈ្នះក្រុមហ្វុតសាលកម្ពុជា ១០-០ ក្នុងការប្រកួតបើកឆាកនេះ បានក្លាយជាជ័យជម្នះដ៏ធំមួយ ចំពោះក្រុមហ្វុតសាលម៉ាឡេស៊ី ដែលធ្វើឲ្យពួកគេ មានកម្លាំងចិត្តកាន់តែខ្លាំង ក្នុងការបន្តទៅប្រជែងជាមួយក្រុមហ្វុតសាលជម្រើសជាតិមីយ៉ាន់ម៉ា និងក្រុមម្ចាស់ផ្ទះឥណ្ឌូនេស៊ី ខណៈក្រុមហ្វុតសាលហ្វីលីពីន បានដកខ្លួនចេញពីការប្រកួតនោះ។
ប៉ុន្តែក្រុមហ្វុតសាលជម្រើសជាតិកម្ពុជា ដែលទើបចូលរួមការប្រកួតពានរង្វាន់ AFF Futsal Championship នេះជាថ្មី ក្រោយអាក់ខានចូលរួមអស់ជាច្រើនឆ្នាំនោះ ត្រូវធ្វើការងារកាន់តែធ្ងន់ ព្រោះ ២ ប្រកួតចុងក្រោយ ក្នុងពូល A នេះ ពួកគេត្រូវជួបក្រុមមីយ៉ាន់ម៉ា នៅព្រឹកម៉ោង ១១:៣០ ថ្ងៃអង្គារស្អែកនេះ មុនពេលប្រឈមជាមួយក្រុមម្ចាស់ផ្ទះ ឥណ្ឌូនេស៊ី ក្នុងការប្រកួតជម្រុះចុងក្រោយ នៅរសៀលម៉ោង ២ ថ្ងៃពុធ៕
