ភ្នំពេញ: សហព័ន្ធកីឡាបាល់ទាត់កម្ពុជា (FFC) បានសម្រេចប្រកាសរំសាយក្រុមយុវជនចំនួន ១៦ នាក់ (៣ នាក់សុំលាឈប់) បន្ទាប់ពីពួកគេបានប្រមូលផ្តុំហ្វឹកហាត់ នៅមជ្ឈមណ្ឌល និងសាលាបាល់ទាត់ជាតិបាទី អស់រយៈពេល ៤ ឆ្នាំ ហើយមានតែក្លិបលេងក្នុងលីកកំពូលកម្ពុជាចំនួន ៤ ប៉ុណ្ណោះ ទទួលបានយុវជនទាំងនេះយកទៅរួមរស់ជាមួយក្លិបរបស់ខ្លួន ក្នុងនោះមានបឹងកេត វិសាខា ណាហ្គាវើល និងក្លិបអគ្គិសនីកម្ពុជា។
ចំពោះលក្ខខណ្ឌនៃការទទួលបានយុវជនទាំងនេះត្រូវបានលោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា ប្រាប់ឲ្យដឹងនៅក្នុងសន្និសីទកាសែត កាលពីថ្ងៃអង្គារ ម្សិលមិញថា៖ «តាមគោលការណ៍របស់ឯកឧត្តមប្រធាន (សៅ សុខា) គឺយើងត្រូវការកម្លាំងយុវជនទៅជួយដល់ក្លិបនានា ហេតុនេះយើងមិនទាន់មានគោលការណ៍ឲ្យក្លិបបង់ប្រាក់ សម្រាប់ការទទួលបានយុវជនទាំងនេះនៅឡើយទេ»។
យ៉ាងណាក៏ដោយ តាមលោក កែវ សារ៉េត បានឲ្យដឹងថា ចំពោះក្លិប ដែលទទួលបានយុវជនទាំងនេះ ត្រូវបាន FFC ដាក់លក្ខខណ្ឌ ៣ ឲ្យអនុវត្ត ទី ១ ត្រូវឲ្យយុវជនទាំងនេះបានប្រមូលផ្តុំហ្វឹកហាត់ឲ្យមានលក្ខណៈស្តង់ដារ ដូចនៅបាទី និងមានការប្រកួតផងដែរ។ ទី ២ នៅពេល FFC មានការប្រមូលផ្តុំក្រុមយុវជនជម្រើសជាតិពីអាយុក្រោម ១៨ ឆ្នាំ ដល់ក្រោម ២២ ឆ្នាំ ក្លិបត្រូវបង្កការងាយស្រួល ដោយឲ្យពួកគេមកប្រមូលផ្តុំវិញ ហើយទី ៣ ក្លិបត្រូវឲ្យយុវជនទាំងនោះ បានសិក្សារៀនសូត្រ ដើម្បីឲ្យពួកគេអាចមានលទ្ធផលរកការងារធ្វើ ក្រោយឈប់ពីអាជីពជាកីឡាករ។
គួរបញ្ជាក់ថា នៅក្នុងចំណោមយុវជនទាំង ១៦ នាក់ ដែលត្រូវបានរំសាយនេះ ក្លិបវិសាខា បានទទួលច្រើនជាងគេ គឺរហូតដល់ ៦ នាក់ ក្នុងនោះមានកីឡាករ គង់ ពីលត់, ផុន តែនិញ, ឡុង ម៉េងហាវ, ទូច គឹមឆាយ, អាត អូនតូច និង ទៀត គឹមហេង ឯក្លិបអគ្គិសនីកម្ពុជា បាន ៤ នាក់ មាន ផាច សុជាវីឡា, ឈឿង វិស៊ីនុ, លន ថេន និងកីឡាករ សៀន សុភត្ត្រា។
ចំណែកក្លិបណាហ្គាវើល បានទទួលយុវជនទាំងនេះចំនួន ៣ នាក់ ក្នុងនោះមានកីឡាករ សេត ម៉ាន់ស៊ូត, ហេង ទីណា និង រ័ត្ន ប៊ុននូ ហើយក្លិបបឹងកេត ទទួលបាន ៣ នាក់ដែរមានកីឡាករ ហ៊ុល គីមហ៊ុយ, ទេស សម្បត្តិ និង សឿត ណាវ៉ា។ រីឯប្រាក់តម្លៃខ្លួនដែលយុវជនទាំង ១៦ នាក់នេះទទួលបានពីក្លិប មិនត្រូវបានគេបង្ហើបឲ្យដឹងនោះទេ។
សម្រាប់ការបែកគ្នាពីការរំសាយ នៃការប្រមូលផ្តុំ និងរួមរស់ជាមួយគ្នាអស់រយៈពេល ៤ ឆ្នាំ ដើម្បីទៅប្រកបអាជីពនៅតាមក្លិបនេះ កីឡាករ ទៀត គឹមហេង បាននិយាយថា៖ «សម្រាប់កម្រិតសមត្ថភាព ដែលទទួលបានពីការហ្វឹកហាត់ជុំគ្នានៅបាទីរយៈពេល ៤ ឆ្នាំនេះ គឺនៅមិនទាន់គ្រប់គ្រាន់សម្រាប់ពួកយើងនោះទេ អ៊ីចឹងការបែកគ្នា ទៅក្លិបពេលនេះ យើងនឹងប្រឹងប្រែងហ្វឹកហាត់ ពង្រឹងសមត្ថភាពរបស់ពួកយើងបន្ថែមទៀត»។
ជាមួយគ្នានេះ ទៀត គឹមហេង ក៏បានប្តេជ្ញាចិត្តខំហ្វឹកហាត់ឲ្យបានខ្លាំង ធ្វើឲ្យគ្រូបង្វឹកក្រុមវិសាខា ចាប់អារម្មណ៍មកលើរូបគេ ផងដែរដើម្បីរូបគេអាចប្រជែងបានឱកាសលេងក្នុងជម្រើស ១១ នាក់ដំបូង។ ចំណែកកីឡាករ ផាច សុជាវីឡា បានចាត់ទុកការទៅរួមរស់ជាមួយក្លិបអគ្គិសនីកម្ពុជា ជាកន្លែងដែលពួកគេអាចបង្ហាញពីសមត្ថភាព ក្នុងការប្រកួតនៅលីកកំពូលកម្ពុជា។
សុជាវីឡា បាននិយាយថា៖ «ការសម្រេចទៅនៅក្លិបអគ្គិសនីកម្ពុជានេះ ដោយសារក្លិបមួយនេះ មានគោលការណ៍មិនយកកីឡាករបរទេស ដោយផ្តល់អាទិភាពឲ្យកីឡាករក្នុងស្រុកបានលេង ដូច្នេះសមត្ថភាព ពួកយើង អាចនឹងជួយឲ្យក្លិបនេះ កាន់តែល្អជាងនេះទៀត ហើយយើងក៏នឹងមានឱកាសប្រកួតប្រជែងជាមួយកីឡាករបរទេស និងកីឡាករល្អៗក្នុងស្រុកផ្សេងទៀតផងដែរ»៕