ក្រុងមីឡានៈ ក្រោយពីបានកែប្រែប្រព័ន្ធហ្វឹកហាត់ដោយសារមានបញ្ហាប្រឈមសំខាន់ៗមួយចំនួនរួចហើយនោះ គ្រូបង្វឹកក្លិប Napoli លោក Carlo Ancelotti អាចមានឱកាសល្អបំផុតក្នុងការបញ្ចប់ការរង់ចាំរយៈពេល ៣០ ឆ្នាំ របស់ក្លិប Napoli ដើម្បីលើកពាន Serie A។
ប៉ុន្តែការចូលមកដឹកនាំរបស់លោក Antonio Conte នៅក្លិប Inter Milan ក៏បង្កើនក្ដីរំពឹងផងដែរ ក្នុងការបញ្ចប់ការគ្រងតំណែងជើងឯកអ៊ីតាលី Serie A ជាយូរឆ្នាំមកហើយរបស់ក្លិប Juventus នៅក្នុងរដូវកាលនេះ ដែលនឹងចាប់ផ្ដើមនៅថ្ងៃសៅរ៍ខាងមុខ។
ក្លិប Napoli ដែលជាម្ចាស់ជើងឯករង Serie A នេះ បានខកខានលើកពាននេះតាំងពីវីរបុរសអាហ្សង់ទីន Diego Maradona បានជួយឲ្យពួកគេលើកពាននេះតែ ២ លើកគត់ គឺនៅឆ្នាំ ១៩៨៧ និងឆ្នាំ ១៩៩០។
យុទ្ធនាការរបស់លោក Ancelotti នឹងចាប់ផ្ដើមនៅទីក្រុង Fiorentina ប្រទេស អ៊ីតាលី នៅថ្ងៃសៅរ៍ បន្ទាប់ពីក្លិប Juventus ដឹកនាំដោយលោក Maurizio Sarri នឹងចាប់ផ្ដើមនៅទីក្រុង Parma ក្នុងបំណងលើកពាននេះជាលើកទី៩។
ក្លិប Inter គ្រប់គ្រងដោយជនជាតិចិនក៏បានផ្លាស់ប្ដូរគ្រូបង្វឹកមួយចំនួនដែលបញ្ចុប្បន្នដឹកនាំដោយលោក Conte អតីតគ្រូបង្វឹកក្លិប Juventus និង Chelsea ដែលបានត្រឡប់ទៅប្រទេស អ៊ីតាលី វិញ។
ចំណែកលោក Sarri បានដឹកនាំក្លិប Napoli កាលពី ២ ឆ្នាំមុន ជាពេលដែលលោកបានជួយឲ្យក្លិបនេះក្លាយជាម្ចាស់ជើងឯករងដោយចាញ់ក្លិប Juventus តែ ៤ ពិន្ទុ មុនពេលគាត់បានទៅដឹកនាំបន្តក្លិប Chelsea។
នៅក្នុងអាយុ ៦០ ឆ្នាំ លោក Sarri បានត្រឡប់ទៅប្រទេស អ៊ីតាលី វិញ ដើម្បីដឹកនាំក្លិប Juventus ខណៈម្ចាស់ជើងឯកមួយនេះកំពុងស្វែងរកទិសដៅថ្មីមួយ ទោះជាទទួលបានជ័យជម្នះ ៥ រដូវកាលក្រោមការដឹកនាំរបស់លោក Massimiliano Allegri រួចមកហើយក៏ដោយ។
ការសម្រេចចិត្តរបស់លោក Sarri ក្នុងការទៅដឹកនាំក្លិបនេះបានធ្វើឲ្យមានការខកចិត្តយ៉ាងខ្លាំងចំពោះក្លិប Napoli ដែលជាទីកន្លែងកំណើតរបស់គាត់។
ប្រធានក្រុម និងខ្សែប្រយុទ្ធ Lorenzo Insigne នៅក្លិប Napoli បាននិយាយថា៖ «ក្នុងនាមយើងជាពលរដ្ឋនៅទីក្រុង Napoli បញ្ហានោះគឺជាអំពើក្បត់ ដូច្នេះហើយពេលនេះយើងត្រូវតែព្យាយាមយកឈ្នះគាត់នៅគ្រប់តម្លៃទាំងអស់»។
លោក Ancelotti បានចាប់ផ្ដើមឆ្នាំទី២ នៃកិច្ចសន្យារយៈពេល ៣ ឆ្នាំ របស់គាត់ និងចង់ឈ្នះពានសំខាន់មួយនៅរដូវកាលនេះ។
គ្រូបង្វឹកវ័យ ៦០ ឆ្នាំរូបនេះ បានឈ្នះពានមួយចំនួននៅក្នុងការប្រកួតលីកសំខាន់ចំនួន ៥ នៅអឺរ៉ុបក្នុងនោះមានពាន Serie A ក្នុងពេលគាត់ដឹកនាំនៅក្លិប AC Milan នៅឆ្នាំ ២០០៤។
គ្រូបង្វឹករូបនេះក៏ធ្លាប់ឈ្នះបានពាន Champions League ៣ លើក នៅពេលគាត់ដឹកនាំក្លិប Milan និង Real Madrid និងបានពាន Premier League ១ លើក ក្នុងពេលដឹកនាំរយៈពេល ២ ឆ្នាំនៅក្លិប Chelsea។
លោក Ancelotti បានទទូចថា គាត់បានរៀនសូត្រពីរដូវកាលដំបូងដែល «ជាដំណើរការផ្លាស់ប្ដូរ» របស់គាត់។
គ្រូបង្វឹកជើងចាស់រូបនេះបានបន្ថែមទៀតថា៖ «យើងបានទាញព្រួញដើម្បីត្រៀមខ្លួនបាញ់ឲ្យចំគោលដៅ»។
គ្រូបង្វឹកវ័យ ៦០ ឆ្នាំរូបនេះ បានបង្កើនគ្រប់តំបន់ទាំងអស់ជាមួយវត្តមានរបស់ខ្សែការពារ Kostas Manolas ខ្សែបម្រើ Elif Elmas និងខ្សែការពារស្លាប Hirving Lozano៕ AFP/SN