ភ្នំពេញ៖ ក្រុមអត្តពលិកកីឡាករតេក្វាន់ដូ ITF របស់ខេត្តប៉ៃលិន បានបង្កើតនូវស្នាដៃដ៏ពិសេសមួយ គឺការទទួលបានជោគជ័យយ៉ាងធំធេង តាមរយៈការដណ្តើមបានមេដាយមាស ៤ ប្រាក់ ១ និងមេដាយសំរឹទ្ធ ៤ ពីការប្រកួតកីឡាតេក្វាន់ដូ ITF ជ្រើសរើសជើងឯកថ្នាក់ជាតិ ឆ្នាំ ២០១៩។
បើទោះបីជាការប្រមាញ់បានមេដាយសរុបចំនួន ៩ នេះ បានត្រឹមជួយឲ្យក្រុមខេត្តប៉ៃលិន បានត្រឹមឈរនៅចំណាត់ថ្នាក់លេខ ១ ក្រោមក្រុមអត្តពលិកក្រសួងមហាផ្ទៃ ដែលឈ្នះបានមេដាយមាស ៦ ប្រាក់ ២ និងសំរឹទ្ធ ៣ ប៉ុន្តែប្រធានមន្ទីរអប់រំ យុវជន និងកីឡាខេត្តប៉ៃលិន លោក តង់ ធារ៉ា បានចាត់ទុកលទ្ធផលនេះថា ជាមោទនភាព និងជាជោគជ័យយ៉ាងធំធេង ដែលខេត្តប៉ៃលិន មិនធ្លាប់ទទួលបាន។
ស្មារតីខិតខំហ្វឹកហាត់ និងប្រឹងប្រែងប្រកួតក្នុងការស្វែងរកមេដាយរបស់អត្តពលិក និងគ្រូបង្វឹកជាកត្តាចម្បង ដែលលោក តង់ ធារ៉ា ជឿថា បានជួយឲ្យក្រុមអត្តពលិករបស់ខេត្តប៉ៃលិន ទទួលបានជោគជ័យយ៉ាងធំធេង ក្នុងការប្រកួតកីឡាតេក្បាន់ដូ ITF ជ្រើសរើសជើងឯកថ្នាក់ជាតិ ឆ្នាំ ២០១៩ ដែលបានបញ្ចប់កាលពីថ្ងៃអាទិត្យកន្លងមកនេះ។
លោក តង់ ធារ៉ា បានប្រាប់ប្រព័ន្ធផ្សព្វផ្សាយ ក្រោយការប្រកួតថា៖ ««កត្តាដែលនាំឲ្យខេត្តប៉ៃលិនជោគជ័យ ទី ១ គឺស្មារតីកីឡាករដែលបានខិតខំប្រឹងប្រែងហ្វឹកហាត់ និងប្រកួត ដោយសារកន្លងមកខេត្តប៉ៃលិន ពុំដែលមានមោទនភាពលើវិស័យកីឡា ពិសេសកីឡាតេក្វាន់ដូ ITF នេះតែម្តង។ ទី ២ ការយកចិត្តទុកដាក់ពីគ្រូបង្វឹកដែលបានខិតខំបង្វឹក ផ្តល់ដំបូន្មាន និងផ្ទេរបច្ចេកទេសថ្មីៗដល់កីឡាករ ជាពិសេសមានការយកចិត្តទុកដាក់ពីថ្នាក់ដឹកនាំខេត្ត»។
ប្រធានមន្ទីរអប់រំ យុវជន និងកីឡាខេត្តប៉ៃលិនរូបនេះ បានបន្ថែមថា៖ «យើងមិននឹកស្មានថា ក្នុងការប្រកួតនេះ កីឡាករកីឡាការិនីយើងបានខិតខំប្រឹងប្រែង តស៊ូ ប្តូរផ្តាច់ ទោះបីមានរបួសក៏ដោយ ប៉ុន្តែពួកគេបានខំប្រឹងប្រកួតអស់ពីសមត្ថភាព រហូតអាចស្វែងរកមេដាយបានច្រើនលើសលប់ ពិសេសមេដាយមាសតែម្តង ដែលជាមោទនភាពសម្រាប់ខេត្តរបស់យើង»។
ចំណែកក្រុមអត្តពលិករបស់ក្លិបក្រសួងសេដ្ឋកិច្ច និងហិរញ្ញវត្ថុឈរលេខ ៣ ក្រោយឈ្នះមេដាយមាស ៣ ប្រាក់ ៤ និងសំរឹទ្ធ ៥ ខណៈសេរីភាព របស់ខេត្តកណ្តាលឈរនៅលេខ ៤ ក្រោយឈ្នះមេដាយមាស ៣ និងប្រាក់ ៤ ហើយក្រុម ស.ស.យ.ក ខេត្តកំពង់ស្ពឺ ដណ្តើមបានមេដាយមាស ២ ប្រាក់ ៤ និងសំរឹទ្ធ ៣ ដើម្បីឈរនៅលេខ ៥ រីឯក្លិបសមាគមចំនួន ១៣ ទៀត ក៏ដណ្តើមបានមេដាយពីការប្រកួតថ្នាក់ជាតិនេះដែរ។
ទាក់ទងទៅនឹងការប្រកួតកីឡាតេក្វាន់ដូ ITF ជ្រើសរើសជើងឯក ឆ្នាំ ២០១៩ នេះ ទាំង លោក កែវ រ៉េមី ជាប្រធានសហព័ន្ធ និងលោក បួនហ៊ីង សុធីយ៉ា ជាអគ្គលេខាធិការសហព័ន្ធ សុទ្ធតែបានវាយតម្លៃខ្ពស់ចំពោះការប្រកួតនេះថា បានប្រព្រឹត្តទៅយ៉ាងរលូន ហើយសមត្ថភាពរបស់កីឡាករកីឡាការិនីនៅឆ្នាំនេះ មានការរីកចម្រើនខ្លាំងដ៏គួរឲ្យកត់សម្គាល់ បើធៀបនៅនឹងការប្រកួតឆ្នាំមុនៗ៕