.jpg)
មុត ខ្លឹមខ្មៅ (ឆ្វេង) និងមឿន សុខហ៊ុច អាចនឹងជួបគ្នានៅសប្តាហ៍នេះ។ ស្រេង ម៉េងស្រ៊ុន
ភ្នំពេញ: មឿន សុខហ៊ុច ត្រូវប៉ះជាមួយកីឡាករថៃ Chek Nuondaengyim ហើយកីឡាករមុត សំបូរ ហៅមុត ខ្លឹមខ្មៅ នឹងជួបជាមួយកីឡាករថៃ Rong Napha ក្នុងជុំដំបូងដែលមាន ៣ ទឹក ក្នុងការប្រកួតប្រដាល់គុនខ្មែរលក្ខណៈអន្តរជាតិម៉ារាតុងទម្ងន់ ៦៥ គីឡូក្រាម ក្នុងកម្មវិធីជើងឯកភេសជ្ជៈ Zorus ប្រាក់លាននៅព្រឹកថ្ងៃសៅរ៍ ទី១៧ ខែវិច្ឆិកា ឆ្នាំ ២០១៨ នៅ សង្វៀនទូរទស្សន៍ CNC។
តាមរូបមន្តប្រកួតដែលភ្នំពេញ ប៉ុស្តិ៍ ទទួលបានពីសហព័ន្ធប្រដាល់គុនខ្មែរ ប្រសិនមុត ខ្លឹមខ្មៅ និងមឿន សុខហ៊ុច មានឱកាសឈ្នះកីឡាករថៃដូចគ្នា ពួកគេនឹងត្រូវឆ្លងចូលវគ្គទី ១ ភ្លាមៗដើម្បីប្រកួតម៉ារ៉ាតុងក្នុងវគ្គផ្តាច់ព្រ័ត្រ ៥ ទឹកយកប្រាក់លានតែម្តង។
លោក ម៉ា ស៊ីថេត អ្នកគ្រប់គ្រងកម្មវិធីប្រកួតប្រចាំសង្វៀនប្រដាល់ CNC មិនអាចទំនាក់ទំនងសុំប្រវត្តិការប្រកួតរបស់កីឡាករប្រដាល់ថៃចំនួន ២ នាក់ ដែលត្រៀមប៉ះប្រកួតជាមួយកីឡាករខ្មែរបានទេ ដោយទូរស័ព្ទរបស់លោកគ្មានអ្នកទទួលកាលពីព្រឹកថ្ងៃទី ១៥ ខែវិច្ឆិកា ឆ្នាំ ២០១៨ ម្សិលមិញ។
ទោះជាយ៉ាងណា តាមកំណត់ត្រា និងសមត្ថភាពរបស់កីឡាករថៃ Chek Nuondaengyim ដែលត្រូវប៉ះមឿន សុខហ៊ុច និង Rong Napha ដែលត្រូវប៉ះជាមួយមុត ខ្លឹមខ្មៅ ពួកគេសុទ្ធតែធ្លាប់មកប្រកួតស្រុកខ្មែរកន្លងមកដែលមានសមត្ថភាពខ្លាំងគួរឲ្យកត់សម្គាល់។
និយាយពីសមត្ថភាពកីឡាករកម្ពុជា មុត ខ្លឹមខ្មៅ វិញ មួយរយៈពេលពេញ ១ ឆ្នាំ ២០១៨ នេះ រូបគេប្រកួតមិនដែលចាញ់សោះ ហើយថ្មីៗនេះ រូបគេបានឈ្នះពានស្រាបៀរ Ganzberg ទម្ងន់ ៦៥ គីឡូក្រាម នៅសង្វៀនអាស៊ីអាគ្នេយ៍ផងដែរ។
ប្រវត្តិសំខាន់ៗរបស់កីឡាករខ្លឹមខ្មៅ រូបគេធ្លាប់ឈ្នះខ្សែក្រវាត់ ៣ ស្ថាប័ន និងពានចំនួន ៣ ព្រមទាំងជើងឯកមេដាយមាសកីឡាជាតិលើកទី ២ ឆ្នាំ ២០១៨។ មុត ខ្លឹមខ្មៅ បាននិយាយថា៖ «ខ្ញុំមិនធ្លាប់ប៉ះប្រកួតជាមួយកីឡាករថៃ Rong Napha នោះទេ ប៉ុន្តែធ្លាប់មើលវីដេអូប្រកួតរបស់គាត់ដែលមានកម្រិតបច្ចេកទេសល្អ កម្លាំងល្អ និងសមត្ថភាពខ្ពស់»។
កីឡាកររូបនេះបានបន្តថា៖ «ខ្ញុំហ្វឹកហាត់ត្រៀមបានល្អ និងមានជំនឿខ្លួនឯងថា ប្រឹងយកឈ្នះឲ្យបាន។ ខ្ញុំសង្ឃឹមឈ្នះ ៧០ ភាគរយ ហើយក្បាច់ជង្គង់របស់ខ្ញុំ អាចទប់ទល់ជាមួយថៃបានល្អ»។ អ្វីដែលខ្ញុំបារម្ភគឺបញ្ហាកម្លាំងធ្លាក់ចុះ ចំណែកបច្ចេកទេសនៅតែល្អ ពីព្រោះប្រកួតសរុបទៅច្រើនទឹក»។
មឿន សុខហ៊ុច ដែលធ្លាប់សាងភាពល្បីល្បាញកន្លងមក និងធ្លាប់ឈ្នះខ្សែក្រវាត់ចំនួន ៣ ស្ថាប័ន ក្នុងឆ្នាំ ២០១៧ នោះ មកដល់បច្ចុប្បន្នមានបច្ចេកទេស និងទឹកចិត្តប្រកួតល្អ ប៉ុន្តែបញ្ហាកម្លាំងសុទ្ធតែធ្លាក់ចុះជាងមុនដោយវ័យកាន់តែចាស់។
សុខហ៊ុច បាននិយាយថា៖ «ខ្ញុំមានការព្រួយបារម្ភក្នុងវគ្គដំបូង ពីព្រោះកីឡាករថៃរូបនេះល្អដែរ ហើយបើឆ្លងផុតចូលដល់វគ្គទី ២ គឺមិនអីទេ ហើយបើមានឱកាសប៉ះ ខ្លឹមខ្មៅ ក៏ងាយស្រួលជាងដែរ។ ខ្ញុំ សង្ឃឹមឈ្នះត្រឹម ៦០ ភាគរយប៉ុណ្ណោះ»៕
