.jpg)
Kane គ្រប់គ្រងបាល់មិនបានល្អធ្វើឲ្យរងរបួសភ្លៅខាងឆ្វេងក្នុងការប្រកួតជាមួយក្រុម Southampton ពីថ្ងៃទី ១ មករា។ រូប AFP
ក្រុងឡុងដ៍៖ លោក Jose Mourinho បាននិយាយដោយទទូចថា គាត់មិនបាន «ច្រណែន» នឹងក្លិបផ្សេងទៀតដូចជា Liverpool និង Man City នោះទេ ដោយអះអាងថា ក្រុម Spurs គឺជារឿងផ្សេងមួយទៀត។
ក្លិប Man City កំពុងព្យាយាមឈ្នះពានរង្វាន់ក្របខ័ណ្ឌ Premier League ជាប់ៗគ្នា ខណៈដែលក្រុម Liverpool កំពុងនាំមុខដាច់ ១៤ ពិន្ទុ ជាមួយការនៅសល់ ១ ប្រកួតទៀតនៅរដូវកាលនេះ។
លោក Mourinho ត្រូវបានតែងតាំងជាគ្រូបង្វឹកក្លិប Spurs កាលពីខែវិច្ឆិកា ហើយក្រុមរបស់គាត់កំពុងបឹ្រងប្រែងនៅក្នុងចំណាត់ថ្នាក់ទី ៨ នៅក្នុងក្របខ័ណ្ឌនេះ។
ប៉ុន្តែគ្រូបង្វឹកសញ្ជាតិព័រទុយហ្គាល់រូបនេះបាននិយាយថា ពួកគេមិនអាចយកទៅប្រៀបធៀបនឹងក្រុម Man City និងក្លិប Liverpool បានទេបើទោះជាគាត់មិនទាន់មានការអះអាងណាមួយក៏ដោយ។
លោក Mourinho បាននិយាយថា៖ «វាគឺបែបនេះឯង ប៉ុន្តែយើងមិនអាចយកក្រុមមួយទៅប្រៀបធៀបនឹងក្រុមផ្សេងទៀតបានទេព្រោះវាមិនមែនជាខ្លួនយើង»។
គ្រូបង្វឹករូបនេះបានបន្ថែមថា៖ «ខ្ញុំបានមើលក្រុម Man City ប្រកួតជាមួយក្រុម Aston Villa ហើយខ្ញុំក៏បានឃើញកីឡាករ [Raheem] Sterling, Bernardo Silva, [Ilkay] Gundogan, [Nicolas] Otamendi អង្គុយនៅកៅអីផងដែរ ហើយរឿងនេះអ្នកប្រហែលជាយល់ហើយ»។
គ្រូបង្វឹករូបនេះបានបន្ថែមទៀតថា៖ «រីឯក្រុម Liverpool ដូចអ្នកឃើញហើយក៏មានកីឡាករអង្គុយរង់ចាំនៅកៅអី ហើយក៏មានកីឡាកររបួសផងដែរ»។
គ្រូបង្វឹក Mourinho បានបន្តថា៖ «ខ្ញុំមិនច្រណែននោះទេ ហើយខ្ញុំមានការងារដ៏អស្ចារ្យមួយ ប៉ុន្តែពួកគេ គឺជាការងារផ្សេងពីយើងព្រោះនេះគឺជាក្លិបផ្សេងមួយទៀត»។
គ្រូបង្វឹករូបនេះបានបង្ហាញថា ការងារនៅក្លិប Spurs គឺជាការងារដ៏លំបាកបំផុតរបស់គាត់តាំងពីគាត់ស្ថិតនៅក្លិប Porto ជាទីដែលគាត់បានដឹកនាំនៅដើមឆ្នាំ ២០០២។
លោក Mourinho បាននិយាយថា៖ «វាជាលើកទី ២ ដែលខ្ញុំទទួលយកក្រុមមួយនៅពាក់កណ្ដាលរដូវកាលនេះ គឺទើបតែលើកទី ២ ប៉ុណ្ណោះ»។
គ្រូបង្វឹករូបនេះបានបន្ថែមថា៖ «លើកដំបូង គឺមិនងាយស្រួលទេព្រោះវាជាចុងបញ្ចប់នៃក្រុមមួយក៏ដូចជា ចុងបញ្ចប់នៃរដូវកាលមួយដែលមិនទទួលបានពានរង្វាន់ផងដែរ»។
ទន្ទឹមនឹងនេះ លោក Jose Mourinho បានបញ្ជាក់ពីព័ត៌មានចុងក្រោយពីស្ថានភាពរបួសរបស់កីឡាករ Harry Kane ហើយគាត់មិនបានដឹងថា តើខ្សែប្រយុទ្ធក្លិប Tottenham រូបនេះនឹងបន្តអវត្តមានក្នុងការប្រកួតរហូតដល់ខែមេសា ខែឧសភា ឬរដូវកាលក្រោយនោះទេ។
ក្លិបនេះបានបញ្ជាក់ពីសប្ដាហ៍មុនថា កីឡាករ Kane ត្រូវការវះកាត់សរសៃពួរភ្លៅខាងឆ្វេង ហើយនឹងអវត្តមានការប្រកួតរហូតដល់យ៉ាងហោចណាស់ខែមេសាក្រោយពីរងរបួសក្នុងការប្រកួតចូលឆ្នាំថ្មីជាមួយក្រុម Southampton នៅពេលរូបគេបានស៊ុតបាល់ចូលទី ប៉ុន្តែត្រូវលុបចោលវិញដោយសារបាល់ offside។
ក្លិប Spurs សង្ឃឹមថា កីឡាករអាយុ ២៦ ឆ្នាំរូបនេះ នឹងបានជាសះស្បើយឆាប់ៗ និងអាចចូលរួមប្រកួតឡើងវិញសម្រាប់ក្លិបនេះនៅចុងរដូវកាលនេះ និងសម្រាប់ក្រុមជម្រើសជាតិអង់គ្លេសក្នុងការប្រកួត Euro 2020 ផងដែរ។
លោក Mourinho បាននិយាយថា៖ «យើងនឹងព្យាយាមឲ្យអស់ពីសមត្ថភាព ហើយព័ត៌មានជុំវិញស្ថានភាពរបស់ Kane យើងមិនទាន់ដឹងច្បាស់នៅឡើយទេ ហើយប្រសិនបើអ្នកនៅតែបន្តសួរខ្ញុំគ្រប់ពេល យើងនឹងមកទីនេះបន្តឆ្លើយនូវសំណួរដដែលៗនេះ»៕ AFP/SN
