ភ្នំពេញ៖ គ្រូបង្វឹកក្រុមជម្រើសជាតិកម្ពុជា លោក Felix Agustin Gonzalez Dalmas បានចាត់ទុកការសម្រេចទីមិនបាន ទៅលើក្រុមសិង្ហបុរី ក្នុងការប្រកួតមិត្តភាពអន្តរជាតិ នៅពហុកីឡដ្ឋានជាតិ កាលពីយប់ថ្ងៃអង្គារ ថា «ជារឿងឈឺចាប់» ដែលតែងតែកើតមាន នៅក្នុងពិភពបាល់ទាត់ រីឯគ្រូបង្វឹកសិង្ហបុរី បានចាត់ទុកកម្ពុជា ជាក្រុមបានបង្កគ្រោះថ្នាក់ដល់ក្រុមរបស់លោក។
លោក Felix បាននិយាយក្រោយការប្រកួតថា៖ «នៅក្នុងពិភពបាល់ទាត់ ពេលខ្លះ វាជារឿងដ៏គួរឲ្យឈឺចាប់ ព្រោះយើងបានបង្កើតឱកាសជាច្រើន តែយើងធ្វើមិនបានសម្រេច ចំណែកខាងសិង្ហបុរី បានបង្កើតឱកាសល្អតែ ២ ទៅ ៣ លើក តែគេធ្វើបានសម្រេច អ៊ីចឹងយើងបានដាក់ទណ្ឌកម្មទៅលើខ្លួនឯង ដោយសារការបង្កើតឱកាសច្រើន តែធ្វើមិនបានសម្រេចនេះ»។
តាមរយៈការប្រកួតកាលពីយប់ថ្ងៃអង្គារ ដែលមានអ្នកចូលរួមទស្សនាផ្ទាល់រាប់ម៉ឺននាក់នោះ ក្រុមកម្ពុជា បានបង្ហាញទម្រង់លេងបានល្អ ក្នុងការវាយលុកទៅលើក្រុមភ្ញៀវសិង្ហបុរី ដែលពួកគេធ្លាប់ឈ្នះ ២-១ ក្នុងការប្រកួតមិត្តភាពចុងក្រោយ កាលពីឆ្នាំ ២០១៦។
ជាមួយការលេងបាល់បាល់ខ្លីៗ ហើយបញ្ជូនលឿនៗនោះ បានធ្វើឲ្យកម្ពុជា អាចបង្កើតឱកាស នៅមុនទីរបស់ក្រុមសិង្ហបុរី ជាបន្តបន្ទាប់ តែពួកគេធ្វើមិនបានសម្រេចនោះទេ ខណៈការរកបាន ១ គ្រាប់នៅនាទីទី ១៨ ជាការភ្លាត់ធ្វើឲ្យបាល់ចូលទីរបស់ខ្លួន ពីសំណាក់ខ្សែការពារ Wai Loon Ho នោះ។
ចំណែកការប្រកួតនៅតង់ទី ២ ក្រុមកម្ពុជា នៅតែអាចបង្កើតបានឱកាសល្អមួយៗផងដែរ តែនៅតែធ្វើមិនបានសម្រេចដដែល។ ផ្ទុយទៅវិញ ការវាយបករបស់ក្រុមសិង្ហបុរី បានផ្តល់ឱកាសឲ្យខ្សែបម្រើ Jacob Mahler ស៊ុតតាមស្មើឲ្យក្រុមសិង្ហបុរី នៅនាទីទី ៦១ មុនពេលខ្សែការពារ ហុង ផេង បានបង្កើតកំហុស ដោយបណ្តោយឲ្យ ខ្សែប្រយុទ្ធ Ikhsan Fandi រត់ទៅឆាបបាល់ចេញពីជើង រួចស៊ុតបញ្ចូលទីបានយ៉ាងល្អ ដើម្បីជួយឲ្យសិង្ហបុរី ឈ្នះកម្ពុជា ២-១ នៅត្រឹមនាទីទី ៧៥។
យ៉ាងណាក៏ដោយ លោក Fandi Ahmad គ្រូបង្វឹកក្រុមសិង្ហបុរី បានសរសើរពីទម្រង់លេងរបស់កម្ពុជា ថាមានការរីកចម្រើន និងបានចាត់ទុកការវាយលុករបស់កម្ពុជា ជាការដាក់សម្ពាធ ដែលមានគ្រោះថ្នាក់ចំពោះក្រុមរបស់លោក។
លោកបាននិយាយថា៖ «ខ្ញុំមើលឃើញថា កម្ពុជា លេងបានល្អមែនទែន ដោយបានបង្កើតបញ្ហាជាច្រើនដល់ក្រុមរបស់ខ្ញុំ»។
លោក Fandi បានបន្ថែមថា៖ «នៅពេលកម្ពុជា បើកការវាយលុកនៅតំបន់ប្រយុទ្ធ ពិតជាធ្វើឲ្យក្រុមរបស់យើងមានគ្រោះថ្នាក់ខ្លាំង ជាពិសេសការប្រកួតនៅតង់ទី ១ ដោយកម្ពុជា បានគ្រប់គ្រងតំបន់បម្រើកណ្តាល ធ្វើឲ្យយើងមានបញ្ហាច្រើន។ ប៉ុន្តែខ្ញុំពិតសប្បាយរីករាយណាស់ ដែលយើងបានប្រកួតជាមួយក្រុមមួយ ដែលល្អ ព្រោះការដាក់សម្ពាធយ៉ាងខ្លាំងរបស់កម្ពុជា បានក្លាយជាតេស្តដ៏ល្អសម្រាប់កូនក្រុមខ្ញុំ សម្រាប់ការប្រកួតនេះ»៕