ភ្នំពេញៈ ក្រុមជម្រើសជាតិកម្ពុជានឹងប្រើប្រាស់ការហ្វឹកហាត់រួមគ្នាបានត្រឹម ៣ ថ្ងៃដើម្បីប្រកួតជម្រុះ World Cup 2022 និង Asian Cup 2023 ជុំទី ១ ក្នុងតំបន់អាស៊ីជាមួយក្រុមជម្រើសជាតិប៉ាគីស្ថាននៅពហុកីឡដ្ឋានជាតិវេលាម៉ោង ៦:៣០ ថ្ងៃព្រហស្បតិ៍នេះ ប៉ុន្តែគ្រូបង្វឹកជនជាតិអាហ្សង់ទីនលោក Felix Dalmas បានបង្ហាញទំនុកចិត្តខ្ពស់ទៅលើក្រុមកម្ពុជា និងបានសរសើរថា ពួកគេសុទ្ធតែមានឆន្ទៈលេង ដើម្បីជាតិទាំងអស់គ្នា។
លោក Felix បាននិយាយក្នុងសន្និសីទកាសែតនៅសណ្ឋាគារភ្នំពេញកាលពីថ្ងៃពុធថា៖ «សម្រាប់ការរៀបចំការប្រកួតលើកនេះគឺខ្ញុំមានទំនុកចិត្តទៅលើកីឡាករ និងក្រុមការងាររបស់យើង ដែលយើងទើបបានផ្លាស់ប្តូរ និងបង្កើតថ្មី ហើយពួកគាត់ពិតជាធ្វើបានល្អចំពោះក្រុម។ យើងមានទំនុកចិត្តខ្លាំងទៅលើកីឡាករ ព្រោះជាក្រុមដែលមានកាយសម្បទាល្អ និងមានគុណភាពខ្ពស់ក្នុងការប្រកួតអ៊ីចឹងយើងនឹងធ្វើបានល្អ»។
យ៉ាងណាក៏ដោយការមិនបានកោះហៅខ្សែប្រយុទ្ធឆ្នើម ចាន់ វឌ្ឍនាកា ដែលទើបចែកផ្លូវនឹងក្លិប PKNS របស់ម៉ាឡេស៊ី និងកីឡាករជើងចាស់មួយចំនួនទៀតឲ្យចូលប្រមូលផ្តុំលើកនេះបានធ្វើឲ្យមានការងឿងឆ្ងល់ពីអ្នកគាំទ្រ ហើយបញ្ហានេះត្រូវបានអ្នកកាសែតចោទសួរនៅក្នុងសន្និសីទកាសែតកាលពីម្សិលមិញនោះដែរ។
ប៉ុន្តែលោក Felix បានឆ្លើយតបថា៖ «យើងត្រូវស្វែងរកកីឡាករ ២៣ នាក់នៅក្នុងចំណោមអ្នកទាំង ២៦ នាក់ដែលយើងបានប្រមូលផ្តុំ ដើម្បីចូលរួមការប្រកួតនេះអ៊ីចឹងរឿងសំខាន់គឺក្រុម គឺយើងត្រូវការកីឡាករដែលមានចំណង់ និងឆន្ទៈខ្ពស់ក្នុងការលេងសម្រាប់ជម្រើសជាតិ ហើយកីឡាករទាំងអស់ដែលយើងបានប្រមូលផ្តុំលើកនេះ គឺពួកគាត់មានទឹកចិត្ត និងឆន្ទៈខ្ពស់ក្នុងការលេងឲ្យក្រុមជម្រើសជាតិអស់ពីចិត្ត»។
លោកបានបន្ថែមថា៖ «មានកីឡាករមួយចំនួនមិនសូវបានលេងនៅក្នុងលីក ប៉ុន្តែយើងបានទំនាក់ទំនងទៅកាន់ក្រុមការងាររបស់ក្លិប ដើម្បីបានដឹងពីសកម្មភាព អាកប្បកិរិយា និងអ្វីដែលគាត់បានធ្វើនៅក្នុងក្លិប ហើយយើងបានយល់ច្បាស់ថា ហេតុអ្វីគាត់មិនមានវត្តមានច្រើននៅក្នុងលីក? ប៉ុន្តែសំខាន់យើងដឹងពីគុណភាព អត្តចរិត និងសកម្មភាពរបស់កីឡាករនោះ ទើបយើងកោះហៅពួកគេឲ្យចូលជម្រើសជាតិ ព្រោះបាល់ទាត់ត្រូវលេងជាក្រុម អ៊ីចឹងយើងត្រូវការមនុស្សដែលធ្វើការងារជាក្រុមបានគឺធ្វើការងារដើម្បីក្រុម»។
ចំណែកលោក Jose Antonio Nogueira គ្រូបង្វឹកក្រុម ជម្រើសជាតិប៉ាគីស្ថាន ថ្លែងថា៖ «ការជួបក្រុមកម្ពុជាគឺជាការប្រកួតដ៏គួរឲ្យចាប់អារម្មណ៍សម្រាប់យើង ហើយយើងបានព្យាយាមគ្រប់យ៉ាងក្នុងការត្រៀមខ្លួនជាមួយនឹងរយៈពេលខ្លី ប៉ុន្តែយើងមានការហ្វឹកហាត់ល្អខ្លះដែរ និងរៀបចំក្រុមបានល្អដើម្បីប្រកួតទល់នឹងកម្ពុជា ព្រោះពួកគេជាក្រុមដ៏ល្អ និងជាក្រុមដែលគ្រោះថ្នាក់សម្រាប់យើង»។
នៅពេលមានការលើកឡើងថា ក្រុមប៉ាគីស្ថានអាចមានបៀបលើក្រុមកម្ពុជា ផ្នែកកាយសម្បទា និងកម្លាំងនោះលោក Jose Antonio Nogueira បានឆ្លើយតបថា៖ «វាមិនដូច្នេះទេ! ខ្ញុំមិនបានគិតអំពីកាយសម្បទា និងកម្លាំងរបស់កីឡាករឡើយអ្វីដែលសំខាន់គឺ បច្ចេកទេសភាពវៃឆ្លាតក្នុងការប្រកួតគឺរបៀបដែលពួកគេធ្វើ របៀបដែលពួកគេបង្ហាញក្នុងពេលប្រកួត ដូច្នេះក្រុមខ្ញុំមិនមានគុណសម្បត្តិទៅលើកាយសម្បទាអ្វីឡើយ ប៉ុន្តែពិតណាស់យើងរៀបចំបានល្អ ព្រោះកីឡាករកម្ពុជារហ័សរហួន និងមានភាពឆ្លាតវៃក្នុងការប្រកួត»៕