.jpg)
គួច ដានី ត្រូវបានគេមើលឃើញថា មានទម្រង់លេងល្អ ពេលកម្ពុជា ចាញ់ក្រុមសិង្ហបុរី ២-១។ ស្រេង ម៉េងស្រ៊ុន
ភ្នំពេញៈ បើទោះបីជាក្រុម ជម្រើសជាតិកម្ពុជា បានវិលទៅរកកំណត់ត្រាច្រំដែលគឺការចាញ់សិង្ហបុរី ២-១ ក្នុងការប្រកួតមិត្តភាពអន្តរជាតិ នៅពហុកីឡដ្ឋានជាតិ កាលពីយប់ថ្ងៃអង្គារ ប៉ុន្តែគ្រូបង្វឹកកម្ពុជា លោក Felix Agustin Gonzalez Dalmas បានចាត់ទុកការប្រកួតនោះថាជាការលេង «ដ៏អស្ចារ្យមួយ» ដែលបានបង្ហាញពីការរីកចម្រើនរបស់ក្រុមកម្ពុជា ជាងការប្រកួតកន្លងមក។
ដោយប្រៀបប្រដូចការប្រកួតនេះ ទៅនឹងការប្រកួតចាញ់ក្រុមម៉ាឡេស៊ី ៣-១ និងស្មើ ២-២ ជាមួយក្រុមទីម័រខាងកើត កន្លងមក លោក Felix បាននិយាយក្នុងសន្និសីទកាសែត ក្រោយការប្រកួតថា៖ «សម្រាប់ខ្ញុំ មើលឃើញថា ការប្រកួតលើកនេះ ជាការប្រកួតដ៏អស្ចារ្យមួយ ព្រោះក្រុមរបស់យើង មានការរីកចម្រើនច្រើន បើប្រៀបធៀបការប្រកួតមិត្តភាព ២ លើកកន្លងមក»។
លោក Felix បានបន្ថែមថា៖ «បើមើលទៅលើលទ្ធផលការប្រកួតនេះ គឺប្រហែលជាមិនសូវល្អសម្រាប់ក្រុម សម្រាប់ខ្ញុំ ក៏ដូចជាសម្រាប់អ្នកគាំទ្រកម្ពុជានោះទេ ប៉ុន្តែនេះជាដំណើរការនៃ ការអភិវឌ្ឍបាល់ទាត់នៅកម្ពុជា ដែលយើងត្រូវព្យាយាមបន្តិចម្តងៗ ដោយយើងត្រូវព្យាយាមបន្ថែមទៀត ហើយខ្ញុំសង្ឃឹមថា ពួកយើងនឹងធ្វើបានល្អ សម្រាប់ការប្រកួតផ្លូវការ AFF Suzuki Cup 2018 ខាងមុខនេះ»។
ជាមួយនឹងការឆ្ពោះទៅកាន់ការប្រកួត AFF Suzuki Cup 2018 ដែលនឹងចាប់ដំណើរការ នៅថ្ងៃទី ៨ ខែវិច្ឆិកាខាងមុខនេះ លោក Felix បានបង្ហើបថា លោកនឹងធ្វើការប្រមូលផ្តុំក្រុមជម្រើសជាតិកម្ពុជា សាជាថ្មី ក្នុងរយៈពេល ៣ ទៅ ៤ ថ្ងៃខាងមុខនេះ ដើម្បីពង្រឹងបន្ថែមទៅលើចំណុចខ្វះខាតមួយចំនួនឲ្យបានប្រសើរជាងមុន។
លោកបាននិយាយថា៖ «សម្រាប់ការពិនិត្យមើលកីឡាករ ត្រូវបានបញ្ចប់ហើយ ហើយរយៈពេលប៉ុន្មានថ្ងៃទៀត បន្ទាប់ពីការប្រកួតនេះ យើងនឹងចាប់ផ្តុំប្រមូល ផ្តុំហ្វឹកហាត់ ដើម្បីត្រៀមការប្រកួត AFF Suzuki Cup 2018 ហើយយើងនឹងជ្រើសរើសកីឡាករ ដែលមានលក្ខណសម្បត្តិសមស្របទៅនឹងការប្រមូលផ្តុំនេះ ព្រោះយើងមានវីដេអូនៃការប្រកួត និងបានមើលពីសកម្មភាពផ្សេងៗទៀតរបស់កីឡាករផងដែរ»។
ទោះយ៉ាងណាក៏ដោយ លោក Felix មិនទាន់បានបង្ហាញឈ្មោះកីឡាករណាម្នាក់ ដែលនឹងប្រមូលផ្តុំហ្វឹកហាត់ជាថ្មីនៅឡើយទេ ប៉ុន្តែនៅពេលក្រុមកម្ពុជា បានប្រកួតមិត្តភាពអន្តរជាតិ លើកចុងក្រោយ ដោយបានចាញ់ក្រុមសិង្ហបុរី ២-១ កាលពីយប់ថ្ងៃអង្គារ គឺខ្សែប្រយុទ្ធ កែវ សុខផេង ដែលបានអវត្តមានម្តងរួចមកហើយពេលប្រកួតជាមួយក្រុមទីម័រនោះ ត្រូវបានលុបចេញពីបញ្ជីឈ្មោះតែម្តង ហើយ ប្រាក់ មុន្នីឧត្តម ក៏មិនត្រូវបានដាក់ឲ្យលេងនោះដែរ។
ជុំវិញការអវត្តមានរបស់ខ្សែប្រយុទ្ធមកពីក្លិបវិសាខា កែវ សុខផេង លោក Felix Agustin Gonzalez Dalmas បានប្រាប់ថា ប៉ុន្មានថ្ងៃមកនេះ សុខផេង ហាត់មិនគ្រប់គ្រាន់ មិនបាន ១០០ ភាគរយជាមួយក្រុម ដូច្នេះហើយ ទើបលោកជ្រើសរើសកីឡាករណា ដែលអាចហ្វឹកហាត់ ១០០ ភាគរយជាមួយក្រុមឲ្យ ចូលលេងជំនួស។
គួររំឭកថា សម្រាប់ការប្រកួតពានរង្វាន់ AFF Suzuki Cup 2018 នេះ ក្រុមជម្រើសជាតិកម្ពុជា ឈរនៅពូល A ជាមួយវៀតណាម ម៉ាឡេស៊ី មីយ៉ាន់ម៉ា និងឡាវ ក្នុងនោះកម្ពុជា ត្រូវធ្វើម្ចាស់ផ្ទះ ពេលប្រកួតបើកឆាកជាមួយនឹងក្រុមម៉ាឡេស៊ី នៅពហុកីឡដ្ឋានជាតិ ថ្ងៃទី ៨ ខែវិច្ឆិកា រីឯពូល B មានក្រុមថៃ ឥណ្ឌូនេស៊ី ហ្វីលីពីន សិង្ហបុរី និងទីម័រខាងកើត៕
