ភ្នំពេញ៖ គ្រូបង្វឹកក្រុមជម្រើសជាតិកម្ពុជា លោក Felix Dalmas បានប្រាប់ឲ្យកូនក្រុមត្រូវចងចាំភាពឈឺចាប់ ដែលពួកគេបានជួបប្រទះក្នុងការប្រកួតស៊ីហ្គេមលើកទី ៣០ នៅប្រទេស ហ្វីលីពីន ហើយត្រូវប្រើការឈឺចាប់នោះ ទៅជាកម្លាំងនៃការអភិវឌ្ឍសមត្ថភាពខ្លួនឲ្យបានកាន់តែប្រសើរ ដើម្បីឈានទៅរកការទទួលបានជោគជ័យកាន់តែប្រសើរសម្រាប់ការប្រកួតនាពេលអនាគត។
លោក Felix មិនបានគិតថា ការដណ្តើមមិនបានមេដាយសំរឹទ្ធ ក្រោយកម្ពុជាចាញ់ក្រុមមីយ៉ាន់ម៉ា ដោយការទាត់បាល់ប៉េណាល់ទី ៥-៤ បន្ថែមលើលទ្ធផលស្មើគ្នា ២-២ និងការចាញ់ក្រុមវៀតណាម ៤-០ ក្នុងការប្រកួតវគ្គពាក់កណ្តាលផ្តាច់ព្រ័ត្រ ជាការបរាជ័យដែលកម្ពុជាត្រូវតែខូចចិត្តនោះទេ។
ផ្ទុយទៅវិញ លោកបានប្រាប់ក្រុមកម្ពុជាឲ្យយកបទពិសោធ ឈឺចាប់ទាំងនោះ ជាមេរៀនជំរុញខ្លួនឯងឲ្យខំប្រឹងអភិវឌ្ឍសមត្ថភាពថែមទៀត។ «សូមគិតឡើងវិញថា ពួកយើងបានធ្វើរឿងដ៏អស្ចារ្យ ដែលយើងមិនបានរំពឹងទុកនោះទេ អ៊ីចឹងយើងគួរតែយកអ្វីដែលយើងបានធ្វើ មកកែតម្រូវបន្ថែម ឲ្យទៅជាចំណុចដែលយើងគិតថា ប្រសើរជាងនេះ»។
គ្រូបង្វឹករូបនេះបានបន្ថែមថា៖ «ពេលខ្លះខ្ញុំបានបង្ខំឲ្យពួកយើង ធ្វើឲ្យបានខ្លាំងជាងមុន ធ្វើឲ្យច្រើនជាងមុន ដែលបញ្ហានេះ ប្រហែលជាមិនចាំបាច់ធ្វើដល់ថ្នាក់ហ្នឹងទេ បើសិនជាយើងលេងនៅក្នុងលីក ប៉ុន្តែនៅពេលដែលយើងចេញមកប្រកួតខាងក្រៅ តំណាងឲ្យជាតិយើង គឺអ្វីដែលយើងមាននៅមិនទាន់គ្រប់គ្រាន់នោះទេ អ៊ីចឹងយើងត្រូវតែចងចាំការឈឺចាប់ ដែលយើងទទួលបាននៅពេលនេះ ដើម្បីកុំឲ្យភាពឈឺចាប់នេះ វាកើតនៅក្នុងជីវិតរបស់យើងម្តងទៀត»។
លោក Felix បញ្ជាក់ថា៖ «យើងមិនសោកស្តាយចំពោះការចាញ់នេះទេ ប៉ុន្តែយើងត្រូវដុតកំហឹងនៃភាពឈឺចាប់របស់យើងដើម្បីឲ្យខ្លួនយើងកាន់តែមានការខំប្រឹងប្រែងទៅមុខថែមទៀត។ បើសិនជាយើងអាចផ្លាស់ប្តូរទម្លាប់ និងគំនិត ដោយផ្សារភ្ជាប់ជាមួយការខំប្រឹងធ្វើការឲ្យបានខ្លាំងជាងហ្នឹងនោះ គឺវាប្រសើរជាងការឈ្នះបានមេដាយទៅទៀត»។
សម្រាប់ការប្រកួតស៊ីហ្គេមលើកនេះ ក្រុមកម្ពុជាដែលឈរនៅពូល A គឺបានស្មើក្រុមម្ចាស់ផ្ទះហ្វីលីពីន ១-១ ឈ្នះក្រុមទីម័រ ៥-០ ចាញ់មីយ៉ាន់ម៉ា ២-១ និងឈ្នះម៉ាឡេស៊ី ៣-១ ហើយលទ្ធផលនេះបានជួយឲ្យកម្ពុជា ឡើងទៅកាន់វគ្គ ១/២ ផ្តាច់ព្រ័ត្រជាប្រវត្តិសាស្រ្ត ក្រោយរង់ចាំអស់រយៈពេល ៥៨ ឆ្នាំ ប៉ុន្តែលោក Felix មានការជឿជាក់ថា ទៅថ្ងៃអនាគតក្រុមកម្ពុជា នឹងទទួលបានលទ្ធផលកាន់តែល្អប្រសើរជាងនេះ។
«បើយើងនៅតែរក្សាការធ្វើការងារឲ្យបានខ្លាំង និងអភិវឌ្ឍខ្លួនឯងឲ្យបានកាន់តែប្រសើរជាងនេះ គឺយើងនឹងមានឱកាសនាំយកភាពជោគជ័យច្រើនជាងនេះទៅទៀត! ខ្ញុំហ៊ានសន្យា ព្រោះពួកយើងសុទ្ធតែមានសក្តានុពលអាចធ្វើរឿងនេះបាន គឺទាំងការប្រកួតស៊ីហ្គេមលើកក្រោយ Suzuki Cup និងការប្រកួតជម្រុះ World Cup ក៏ដោយ គឺពួកយើងសុទ្ធតែនៅមានឱកាសធ្វើបានល្អជាងនេះទៀត ប៉ុន្តែយើងត្រូវយកការឈឺចាប់នៅពេលនេះ ដើម្បីដុតកម្តៅឲ្យយើងមានកំហឹងក្នុងការខំប្រឹងទៅមុខទៀត»។
គ្រូបង្វឹកជនជាតិអាហ្សង់ទីន លោក Felix បានបញ្ជាក់ពីអារម្មណ៍ពិតថា៖ «ខ្ញុំពិតជាមានមោទនភាពខ្លាំង ដែលបានធ្វើជាគ្រូបង្វឹករបស់អ្នកទាំងអស់គ្នា ព្រោះតាមរយៈការប្រកួតស៊ីហ្គេមនេះ គេបានដឹងពីរបៀប និងអ្វីដែលយើងចង់លេង ហើយអ្នកកាសែតបានសួរខ្ញុំថា តើអ្នកជឿថា កម្ពុជានឹងអាចប្រកួតប្រជែងជាមួយក្រុមធំទាំងនេះបានទៀតអត់នៅឆ្នាំក្រោយ? រឿងនេះវាអាស្រ័យទៅលើពួកយើង បើយើងខំប្រឹងធ្វើការងារខ្លាំង គឺប្រាកដណាស់ថា យើងនឹងធ្វើបានល្អជាងនេះ និងមានការប្រកួតប្រជែងខ្លាំងជាងនេះទៅទៀត»៕