ភ្នំពេញៈ គ្រូបង្វឹកណាហ្គាវើលលោក មាស ចាន់ណា មានទំនុកចិត្តថា ក្រុមរបស់លោកនឹងមិនទទួលភាពជូរចត់ក្រោមថ្វីដៃក្រុម Hanoi FC គឺការចាញ់រហូតដល់ ១០-០ ដូចការប្រកួតជើងទី១ នៅលើទឹកដីវៀតណាមនោះទេ។
លោក មាស ចាន់ណា បាននិយាយថា៖ «ទាក់ទងទៅនឹងគ្រូគឺបើលើកទី១ យើងចាញ់ច្រើន ហើយលើកទី២ នេះនៅតែបន្តចាញ់ច្រើនទៀតមានន័យថា គ្រូហ្នឹងកាន់តែអន់ហើយ អ៊ីចឹងហើយទី១ យើងមិនឲ្យចាញ់ច្រើនទៀតនោះទេ ឯទី២ បើយើងមានឱកាសយើងអាចស្មើ ឬក៏ឈ្នះ»។
លោកបានបន្តថា៖ «ធម្មតាការដាក់គោលដៅលេង យើងត្រូវការឈ្នះរហូត អ៊ីចឹងយើងត្រូវធ្វើអ្វីទៅតាមស្ថានភាព។ យើងមិនអាចឲ្យចាញ់ច្រើនគ្រាប់ដូចមុននោះទេ គឺយើងព្យាយាមឲ្យមានគ្រាប់បាល់តិចបំផុត ព្រោះយើងមានប្រព័ន្ធការពារថ្មី អ៊ីចឹងខ្ញុំគិតថាខ្សែប្រយុទ្ធរបស់គេពិបាកនឹងចូលកន្លែងយើងណាស់ ហើយម្យ៉ាងទៀតទីលាននៅកីឡដ្ឋានជាតិតែងតែនាំសំណាងដល់ក្រុមណាហ្គាវើល ព្រោះយើងតែងតែធ្វើបានល្អនៅលើទីលានមួយនេះ»។
ការលើកឡើងរបស់លោក មាស ចាន់ណា នៅក្នុងសន្និសីទកាសែតកាលពីថ្ងៃអង្គារនោះគឺសំដៅទៅដល់ការធ្វើជាម្ចាស់ផ្ទះរបស់ណាហ្គាវើល ដើម្បីប្រកួតជើងទី២ ជាមួយក្រុម Hanoi FC នៅពហុកីឡដ្ឋានជាតិនារសៀលម៉ោង ៥ ថ្ងៃពុធនេះ។ រីឯក្រុមឈរនៅពូល F ជាមួយគ្នា Tampines Rovers របស់សិង្ហបុរីត្រូវជួប Yangon United របស់មីយ៉ាន់ម៉ានៅលើទឹកដីខ្លួនឯងយប់ម៉ោង ៧:៣០ ថ្ងៃនេះដែរ។
ក្រុម Hanoi ដែលកំពុងឈរនៅលេខ ២ មាន ៧ ពិន្ទុនោះត្រូវការឈ្នះ ៣ ពិន្ទុពីក្រុមមាន ៣ ពិន្ទុណាហ្គាវើលខ្លាំងបំផុតដើម្បីប្រជែងយកលេខ ១ ពីក្រុម Tampines Rovers ដែលមាន ១០ ពិន្ទុ។
លោក Chu Dinh Nghien អ្នកចាត់ក្រុម Hanoi និយាយថា៖ «កីឡាករសំខាន់ៗរបស់យើងមួយចំនួនមិនបានមកប្រកួតទេ ប៉ុន្តែនេះជាការប្រកួតដ៏សំខាន់អ៊ីចឹងយើងត្រូវការឈ្នះ ៣ ពិន្ទុ ដើម្បីទទួលបានឱកាសទៅប្រកួតនៅវគ្គបន្តទៀត»៕