ក្រុងឡុងដ៍៖ លោក Mikel Arteta Mikel Arteta មានការសោកស្តាយយ៉ាងខ្លាំងពីក្រុមរបស់គាត់បន្ទាប់ពីក្រុម Crystal Palace បានវាយបកវិញកាលពីថ្ងៃសៅរ៍ ដើម្បីតាមស្មើ ១-១ ជាមួយក្រុម Arsenal ដែលនៅសល់គ្នា ១០ នាក់ ខណៈប្រធានក្រុម Pierre-Emerick Aubameyang ជាអ្នករកបានគ្រាប់បាល់បើកឆាកនោះត្រូវបានពិន័យកាតក្រហម។
គ្រូបង្វឹកក្រុមកាំភ្លើងធំរូបនេះកំពុងស្ថិតក្នុងដំណើរឆ្ពោះទៅរកជ័យជម្នះជាប់ៗគ្នាជាលើកទី ៣ នៅពេលដែលប្រធានក្រុមរបស់គាត់បានបើកឆាក ១ គ្រាប់ នៅក្នុងតង់ទី ១ ប៉ុន្តែកិច្ចប្រឹងប្រែងដើម្បីបន្តឈ្នះនោះត្រូវបានរារាំងដោយគ្រាប់បាល់របស់កីឡាករ Jordan Ayew ដើម្បីលុបចោលការនាំមុខនោះនៅដើមតង់ទី ២។
នៅពេលកីឡាករ Aubameyang បានទទួលកាតក្រហមនៅសល់រយៈពេល ២៣ នាទីទៀតនោះ លោក Roy Hodgson គ្រូបង្វឹកក្លិប Palace ដ៏មានបទពិសោធនោះ ជិតនឹងមានឱកាសទទួលបាន ៣ ពិន្ទុ បើធៀបនឹងគ្រូបង្វឹកក្មេងបំផុតនៅក្នុងលីកនេះ ប៉ុន្តែវាហាក់ដូចជាគ្មានសំណាងទាល់តែសោះ។
លទ្ធផលនេះមានន័យថា លោក Arteta បានឈ្នះតែម្ដងគត់នៅក្នុងចំណោមការប្រកួត ៤ លើក ក្នុងក្របខ័ណ្ឌ Premier League ក្នុងការដឹកនាំរបស់គាត់ ហើយលទ្ធផលស្មើនេះពិតជាធ្វើឲ្យគាត់ខកចិត្តមែនទែន ក្រោយពីបានទទួលជ័យជម្នះទៅលើក្រុម Man Utd និងឈ្នះទៅលើក្រុម Leeds នៅក្នុងការប្រកួតពានរង្វាន់ FA Cup។
លោក Arteta បានប្រាប់ BT Sport ថា៖ «រយៈពេល ៣៥ នាទីដំបូង គឺពិតជាអ្វីដែលខ្ញុំចង់ឲ្យក្រុម Arsenal របស់យើងលេងបែបនោះ។ យើងបានលេចធ្លោនៅក្នុងទីតាំងត្រឹមត្រូវ និងបានបង្កើតឱកាសជាច្រើន។ បន្ទាប់ពីនោះមក យើងបានចាប់ផ្តើមទាត់បាល់ free-kick ដែលធ្វើមិនបានសម្រេច»។
គ្រូបង្វឹករូបនេះបានបន្ថែមទៀតថា៖ «ក្នុងរយៈពេល ១៥ នាទីដំបូងនៅក្នុងតង់ទី ២ សូមសរសើរដល់ពួកគេពីព្រោះពួកគេបានប្រឹងសម្រុកយ៉ាងខ្លាំង ប៉ុន្តែយើងប្រឹងតស៊ូនឹងការវាយសម្រុកនោះ ហើយយើងបានស៊ុតចូល ១ គ្រាប់ទៀត ប៉ុន្តែត្រូវបានលុបចោលវិញ»។
ទន្ទឹមនេះដែរ ក្រុមតោខៀវ Chelsea បានខិតខំប្រឹងប្រែងនៅកីឡដ្ឋាន Stamford Bridge រហូតបានជ័យជម្នះ ៣-០ ទៅលើក្រុម Burnley ដែលបានរអិលជិតដល់ចំណាត់ថ្នាក់ទី ៣ នៃតំបន់បាតតារាង។
កីឡាករ Jorginho បើកឆាក ១ គ្រាប់ មុនគេដោយការស៊ុតបាល់ពិន័យ ១១ ម៉ែត្រ មុនពេលកីឡាករ Tammy Abraham បានបន្ថែមគ្រាប់ទី ២ មុនពេលបញ្ចប់តង់ទី ១ ហើយចូលដល់តង់ទី ២ កីឡាករ Callum Hudson-Odoi បានបន្ថែម ១ គ្រាប់ទៀត ដើម្បីជួយឲ្យក្រុមតោខៀវបាន ៣ ពិន្ទុ ដោយជោគជ័យ។
លោក Frank Lampard គ្រូបង្វឹកក្លិប Chelsea បាននិយាយថា៖ «ចំពោះការស៊ុតបាល់របស់ Callum ក្នុងប្រអប់ចម្ងាយ ៦ យ៉ាដនេះ គឺអស្ចារ្យជាងកាលដែលគាត់បានស៊ុតបាល់ចម្ងាយ ៣០ យ៉ាដទៅទៀត»។
បន្ទាប់ពីចាញ់ ៥ ប្រកួត ក្នុងការប្រកួតលីក ៩ លើកចុងក្រោយរួមទាំងការឈ្នះក្រុម Tottenham និងក្រុម Arsenal ដែរនោះ ក្រុមតោខៀវ Chelsea បានឈរនៅចំណាត់ថ្នាក់លេខ ៤ និងបាននាំមុខ ៥ ពិន្ទុ ទៅលើក្រុម Man Utd ដែលពួកគេអាចនឹងមានឱកាសឡើងទៅលេងក្របខ័ណ្ឌ Champions League នៅរដូវកាលបន្ទាប់ទៀត៕ AFP/SN