.jpg)
លោក Tan Cheng Hoe គ្រូបង្វឹកក្រុមជម្រើសជាតិម៉ាឡេស៊ី បានគិតទុកជាមុនថា សមាជិកក្រុមជម្រើសជាតិកម្ពុជា ទាំងអស់ នឹងប្រឹងប្រែងលេង១០០ភាគរយ ដើម្បីបង្ហាញដល់ Keisuke Honda។ ស្រេង ម៉េងស្រ៊ុន
ភ្នំពេញៈ គ្រូបង្វឹកក្រុមជម្រើសជាតិម៉ាឡេស៊ី លោក Tan Cheng Hoe បានគិតទុកជាមុនថា ក្រុមជម្រើសជាតិកម្ពុជា នឹងខំប្រឹងលេងឲ្យបាន១០០ភាគរយ ដើម្បីបង្ហាញដល់គ្រូបង្វឹកថ្មី Keisuke Honda សម្រាប់ការប្រកួតមិត្តភាពអន្តរជាតិ នៅពហុកីឡដ្ឋានជាតិ នាល្ងាចម៉ោង ៦:៣០ ថ្ងៃចន្ទស្អែកនេះ។
លោក Tan Cheng Hoe បាននិយាយ ក្នុងសន្និសីទកាសែត នៅសណ្ឋាគារភ្នំពេញ កាលពីព្រឹកថ្ងៃអាទិត្យនេះថា៖ «ក្រុមកម្ពុជា និងម៉ាឡេស៊ី ធ្លាប់បានជួបគ្នាជាច្រើនដងមកហើយ ហើយយើងក៏បានដឹងដែរថា រាល់ការប្រកួតទាំងអស់នោះ ពិតជាមិនងាយស្រួល ក្នុងយកឈ្នះក្រុមកម្ពុជាទេ។ ចំណែកនៅថ្ងៃស្អែក (ថ្ងៃចន្ទ) យើងដឹងថា កម្ពុជា មានកីឡាករ ដែលមានឆន្ទៈខ្ពស់ក្នុងការលេង ក្រោមការដឹកនាំរបស់គ្រូបង្វឹកថ្មី។ អ៊ីចឹងពួកគេ នឹងខំប្រឹងលេងឲ្យអស់ ១០០ ភាគរយ ដើម្បីបញ្ចេញសមត្ថភាព បង្ហាញដល់គ្រូបង្គោលថ្មីរបស់គាត់»។
ជាមួយគ្នានេះ លោក Tan Cheng Hoe នៅតែមានការចាប់អារម្មណ៍កីឡាករទាំង ៤ នាក់របស់កម្ពុជា ដែលធ្លាប់ទៅលេងនៅលីកកំពូលម៉ាឡេស៊ី។ លោកបាននិយាយថា៖ «ក្នុងនាមជាគ្រូបង្វឹក យើងត្រូវផ្តោតទៅលើកគុណភាពកីឡាច្រើនជាង ដូចជា កែវ សុខផេង, ចាន់ វឌ្ឍនាកា, ប្រាក់ មុន្នីឧត្ថម និង ធារី ចន្ថាប៊ីន ដែលនៅតែបន្តលេងក្នុងលីកកំពូលម៉ាឡេស៊ី»។
លោក Tan Cheng Hoe ក៏គិតថា ក្រុមកម្ពុជា នឹងមានទម្រង់លេងប្លែកខុសពីមុន ក្រោមការដឹកនាំរបស់ Keisuke Honda ផងដែរ។ លោកបានបញ្ជាក់ថា៖ «ខ្ញុំគិតថា ការលេង និងការរៀបចំរបស់ក្រុមកម្ពុជា ប្រាកដជាថ្មី និងខុសប្លែកពីមុន ព្រោះថា ពេលនេះ មានគ្រូបង្វឹកថ្មីមកដឹកនាំ ហើយការប្រកួតនៅថ្ងៃស្អែក ក៏នឹងមានអ្នកគាំទ្រចូលរួមច្រើនផងដែរ ដែលនឹងធ្វើឲ្យការប្រកួតនេះ កាន់តែមានការទាក់ទាញ»។
ចំណែកកីឡាករជាប្រធានក្រុម Muhammad Nazmi Faiz នៃក្រុមជម្រើសជាតិម៉ាឡេស៊ី បាននិយាយថា៖«សម្រាប់ការជួបក្រុមកម្ពជា លើកនេះ យើងដឹងថា កម្ពុជាមានកីឡាករល្អមួយចំនួន ប៉ុន្តែយើងនឹងព្យាយាមឲ្យអស់ពីសមត្ថភាព ដើម្បីយកឈ្នះការប្រកួតនេះ»៕
