ភ្នំពេញ: ចាន់ រតនា អ្នកលេងកីឡាប្រយុទ្ធច្រើនប្រភេទ (MMA) ដែលខកខានមិនបានប្រកួតជិត ១ ឆ្នាំនោះ នឹងចេញបង្ហាញខ្លួនជាថ្មីនៅលើសង្វៀនជាលក្ខណៈអន្តរជាតិនៅដើមខែ និងចុងខែធ្នូ ឆ្នាំ ២០១៨ ក្នុងព្រឹត្តិការណ៍របស់ ONE Championship (ONE) នៅប្រទេសម៉ាឡេស៊ីជាមួយកីឡាករឥណ្ឌូនេស៊ី Abro Fernandes។
បន្ថែមពីលើនេះ ចាន់ រតនា ក៏មានឈ្មោះចូលប្រកួតក្នុងព្រឹត្តិការណ៍សម្ពោធវិមានឈ្នះឈ្នះខួប ២០ ឆ្នាំនៃការបញ្ចប់សង្គ្រាមរបស់លោកនាយករដ្ឋមន្ត្រីហ៊ុន សែន នាថ្ងៃទី ២៨ ដល់ទី ៣១ ខែធ្នូ ឆ្នាំ ២០១៨ នៅឯពហុកីឡដ្ឋានមរតកតេជោ ផងដែរ។ ចាន់ រតនា និងកីឡាករឥណ្ឌូនេស៊ី Abro Fernandes តាមគម្រោងត្រូវបានណាត់ជួបប្រកួតគ្នាកាលពីថ្ងៃទី ៩ ខែវិច្ឆិកា ឆ្នាំ ២០១៨ កន្លងទៅនៅសិង្ហបុរី ប៉ុន្តែដោយសារដៃគូមានបញ្ហាក៏ត្រូវបានពន្យារ ដោយលើកពេលទៅប្រកួតថ្ងៃទី ៧ ខែធ្នូ ឆ្នាំ ២០១៨ វិញ។
សម្រាប់ចាន់ រតនា ទោះជាការពន្យារពេល ឬខកខានការប្រកួតជិតមួយឆ្នាំក៏ដោយ ប៉ុន្តែ រូបគេមិនដែលឃ្លាតពីការហ្វឹកហាត់ម្តងណាឡើយ ពោលគឺក្រៅពីហ្វឹកហាត់ខ្លួនឯង ចាន់ រតនា គឺជាគ្រូបង្វឹកគុនខ្មែរក្លិបសិល្បៈ ដែលមានកូនសិស្សជាជនបរទេសច្រើន។
ក្នុងវ័យ ៣២ ឆ្នាំ រូបគេធ្លាប់ឆ្លងកាត់បទពិសោធច្រើនផ្នែកកីឡាប្រយុទ្ធមានហាប់គីដូ តេក្វាន់ដូ និងវ៉ូវីណាម ហើយគេក៏ធ្លាប់បានសាងឈ្មោះល្បីក្នុងសង្វៀនរបស់ ONE ចាប់តាំងពីឆ្នាំ ២០១៣ មកទល់បច្ចុប្បន្នផងដែរ។
ចាន់ រតនា បាននិយាយថា៖ «សម្រាប់ការប្រកួតរបស់ខ្ញុំនៅខែធ្នូនេះ មាន ២ ប្រកួតធំៗដែលខ្ញុំកំពុងហ្វឹកហាត់ត្រៀមឲ្យបានល្អដើម្បីបង្ហាញអ្វីដែលថ្មីក្នុងកម្មវិធីប្រកួតលំដាប់អន្តរជាតិរបស់ ONE Championship នាថ្ងៃទី ៧ ខែធ្នូ ឆ្នាំ ២០១៨ ខាងមុខ ដែលជាកម្មវិធីប្រកួតមួយ ខ្ញុំបានចុះកិច្ចសន្យាយូរមកហើយ»។
ចាន់ រតនា បានបន្តឲ្យដឹងថា៖ «បន្ទាប់ពីការប្រកួតលំដាប់អន្តរជាតិរួចមក ខ្ញុំត្រូវប្រកួតមួយលើកទៀតក្នុងទម្ងន់ ៦៣,៥ គីឡូក្រាមជាប្រដាល់គុនខ្មែរជាមួយកីឡាករថៃ ក្នុងព្រឹត្តិការណ៍ប្រកួតធំក្នុងព្រះរាជាណាចក្រកម្ពុជាបុណ្យឆ្លងវិមានឈ្នះឈ្នះខួបទី ២០ នៃការបញ្ចប់សង្គ្រាម នាថ្ងៃទី ៣០ ខែធ្នូ ឆ្នាំ ២០១៨ នៅស្តាតមរតកតេជោ រាជធានីភ្នំពេញ ដែលមានការប្រកួតរយៈពេល ៤ ថ្ងៃ»។
កីឡាកររូបនេះបានបន្ថែមថា៖ «ខ្ញុំមានដៃគូបង្វឹកជាជនជាតិស្បែកខ្មៅចេះខ្មែរ គឺលោក Emmanuel Onyedikachi ជាគ្រូបង្វឹកផ្ទាល់ កំពុងជួយត្រៀមស្នៀតពិសេសៗបន្ថែមទៅលើសមត្ថភាព និងភាពខ្លាំងរបស់ខ្ញុំថែមទៀត»។
ចាប់តាំងពីប្រឡូកក្នុងវិស័យក្បាច់គុនខ្មែរមក រតនា បង្ហាញពីជំនឿ និងមោទនភាពរបស់ក្បាច់គុនខ្មែរ ដែលមានប្រវត្តិយូរលង់តាំងពីសម័យអង្គរមកម្ល៉េះ។
រូបគេជឿជាក់ថា ការចូលប្រកួតក្នុងទ្រុងជាមួយ Fernandes នៅខែធ្នូ សប្តាហ៍ក្រោយនេះ នឹងក្លាយជាកំណត់ត្រាមួយទៀតក្នុងប្រវត្តិរបស់ខ្លួន។
ចាន់ រតនា បានបញ្ជាក់ថា៖ «សម្រាប់ការប្រកួតជាមួយ Abro Fernandes ក្នុង ONE ខ្ញុំសង្ឃឹមខ្ពស់ក្នុងការដណ្តើមយកឈ្នះ ពីព្រោះបានហ្វឹកហាត់គ្រប់គ្រាន់ ចំណែកការប្រកួតលក្ខណៈអន្តរជាតិប្រដាល់គុនខ្មែរនៅចុងខែធ្នូ ខ្ញុំមិនទាន់ហ៊ានថា យ៉ាងណាទេ ពីព្រោះកីឡាករថៃភាគច្រើនខ្លាំងហើយក៏មិនទាន់បានដឹងពីសមាសភាពដែរ»៕