.jpg)
កីឡាករ ចិត្ត សុភី បានក្លាយជាម្ចាស់ខ្សែក្រវាត់ទាំងវ័យក្មេង ក្រោយឈ្នះ រឿង សារិទ្ធ។ ពន្លក
ភ្នំពេញៈ កីឡាករវ័យក្មេងមកពីខេត្តបន្ទាយមានជ័យ ចិត្ត សុភី បានក្លាយជាម្ចាស់ខ្សែក្រវាត់គោជល់ទម្ងន់ ៦៣,៥ គីឡូក្រាម បន្ទាប់ពីរូបគេបានយកឈ្នះ រឿង សារិទ្ធ របស់ក្លិបមកុដរាជសីហ៍ក្នុងការប្រកួតផ្តាច់ព្រ័ត្រនៅលើសង្វៀន CNC កាលពីថ្ងៃសៅរ៍ ប៉ុន្តែជើងខ្លាំង រឿង សោភ័ណ្ឌ បានជួបការបរាជ័យក្រោមស្នាដៃថៃ Ship Meurn ទាំងមិនអស់ចិត្ត។
កីឡាករ ចិត្ត សុភី ដែលជាប់ជាកីឡាករជម្រើសជាតិគុនខ្មែរផងនោះបានឈ្នះ រឿង សារិទ្ធ ដោយពិន្ទុ ហើយក្នុងការប្រកួតយ៉ាងស្វិតស្វាញគ្នា ៥ ទឹកពេញនោះគឺគ្មានភាពចម្រូងចម្រាសអ្វីឡើយ ដោយសារពួកគេមានក្រមសីលធម៌ល្អក្នុងការប្រកួតគ្នា។ ជ័យជម្នះនេះបានជួយឲ្យ ចិត្ត សុភី ក្លាយជាម្ចាស់ខ្សែក្រវាត់ទាំងវ័យក្មេងអមដោយទឹកប្រាក់ចំនួន ១៤ លានរៀល ឯ រឿង សារិទ្ធ បាន ៦ លានរៀលផងដែរ។
ចិត្ត សុភី បាននិយាយទាំងរំភើបថា៖ «ខ្ញុំមិននឹកស្មានថា ឈ្នះបានខ្សែក្រវាត់នេះទេ ព្រោះខ្ញុំភ័យពេក និងអស់កម្លាំងរលីង»។ ចំណែក រឿង សារិទ្ធ បាននិយាយថា៖ «ខ្ញុំចាញ់ដោយអស់ចិត្ត ព្រោះគេវាយបានពិន្ទុច្រើនជាងខ្ញុំ ហើយការវាយសម្រុកខ្លាំងរបស់ខ្ញុំមានបំណងចង់ចូលទៅវ៉ៃឲ្យគេសន្លប់តែម្តង តែគេរឹងដែរបានត្រឹមវង្វេងវង្វាន់ប៉ុណ្ណោះ»។
ដោយឡែកគូមិត្តភាពអន្តរជាតិវិញ ជើងខ្លាំង រឿង សោភ័ណ្ឌ បានចាញ់ជើងខ្លាំងថៃ Ship Meurn ដោយពិន្ទុទាំងប្រផិតប្រផើយ និងមិនអស់ចិត្ត បន្ទាប់ពីប្រកួតគ្នាយ៉ាងស្វិតស្វាញចំនួន ៥ ទឹកពេញ ខណៈដែលរយៈពេល ២ ឆ្នាំនៅសង្វៀន CNC នេះគេទើបតែចាញ់ម្តងនេះគត់។
រឿង សោភ័ណ្ឌ បានចាត់ទុកជំនួបនេះជាការប្រកួតដែលមានការលំបាកខ្លាំង ដោយសារថៃ Ship Meurn មានកម្ពស់ខ្ពស់ វ៉ៃដកថយ និងរត់ព្រមទាំងឈរក្នុងលំដាប់ចាំយកឈ្នះច្រើនជាងការវ៉ៃសម្រុកហើយការចាញ់នេះ គឺអាស្រ័យលើចៅក្រម គឺមិនមែនកីឡាករទេ ព្រោះ Ship Meurn វាយតិចតួច ដកថយរង់ចាំឈ្នះតែម្តងដូចជាស្រួលពេក។
អ្នកលេងកណ្តាប់ដៃឆ្វេង រឿង សោភ័ណ្ឌ បាននិយាយថា៖ «រយៈពេលជិត ៣ ឆ្នាំនេះខ្ញុំប្រកួតទទួលបានលទ្ធផលឈ្នះជានិច្ច ប៉ុន្តែការប្រកួត ២ លើកក្នុងខែនេះ ខ្ញុំបានជួបសុទ្ធតែកីឡាករថៃលំដាប់ខ្លាំងៗមានកម្ពស់ខ្ពស់គឺ ១ នៅសង្វៀន SEATV កាលពីថ្ងៃទី ៩ និងលើកនេះធ្វើឲ្យខ្ញុំចាញ់ត្រឹមពិន្ទុប្រផិតប្រផើយ ២ ទល់ ៣ ពីសំណាក់ចៅក្រមទាំង ៥ ដូចគ្នា។
កីឡាករកំពុងមានទីផ្សារប្រកួតខ្លាំងរូបនេះបានបន្ថែមថា៖ «ខ្ញុំគ្មានប្រតិកម្មទេ ព្រោះគ្រូប្រាប់ថាចាញ់ឈ្នះ ខ្ញុំជាកីឡាករមិនអាចសុំតវ៉ាបានទេ ត្រូវតែទទួលយកលទ្ធផលពីសំណាក់ចៅក្រម និងគណៈកម្មការរៀបចំប្រកួត ហើយបើមិនពេញចិត្តសង្វៀនណាឈប់ប្រកួតទៅគ្មាននរណាបង្ខំទេ»។
រឿង សោភ័ណ្ឌ បានបញ្ជាក់ថា៖ «សម្រាប់កីឡាករថៃដែលខ្ញុំប្រកួតចាញ់ចំនួន ២ នាក់មាន អាវវ៉ាតាន និង ស៊ឹបម៉ឺន នេះហើយខ្ញុំសុំសងសឹកឡើងវិញទោះជានៅសង្វៀនណាក៏បាន ប៉ុន្តែសុំតម្លៃខ្លួនប្រកួតឡើងបន្តិចផង ព្រោះការងារធ្ងន់ណាស់»៕
