.jpg)
អត្តពលិកទាំង ៦ នាក់ (អង្គុយជួរមុខ) ថតជាមួយថ្នាក់ដឹកនាំ គ្រូបង្វឹក និងមិត្តរួមអាជីពមុនឡើងយន្តហោះ។
ភ្នំពេញៈ គណៈកម្មាធិការជាតិអូឡាំពិកកម្ពុជា (NOCC) បានបញ្ជូនកីឡាការិនីចំបាប់ ៥ នាក់ និងកីឡាករកាយសម្ព័ន្ធ ១ នាក់ដែលជាក្រុមថ្នាលជម្រើសជាតិ ឲ្យចេញទៅហ្វឹកហាត់រយៈពេលវែង នៅចិនក្រោមការឧបត្ថម្ភទាំងស្រុងរបស់លោក Tang Gordon ជាអនុប្រធានទី ១ NOCC ដើម្បីត្រៀមប្រជែងរកមេដាយក្នុងការប្រកួត ស៊ីហ្គេម នៅហ្វីលីពីននាចុងឆ្នាំ ២០១៩ និងត្រៀមឆ្ពោះទៅស៊ីហ្គេមឆ្នាំ ២០២៣ នៅកម្ពុជា។
លោក វ៉ាត់ ចំរើន អគ្គលេខាធិការ NOCC បានប្រាប់នៅព្រលានយន្តហោះអន្តរជាតិភ្នំពេញកាលពីព្រឹកថ្ងៃអង្គារថា ការបញ្ជូនអត្តពលិកទៅហ្វឹកហាត់រយៈពេលវែងនៅក្រៅប្រទេសនេះ ជាជំហានដំបូងដែលធ្វើទៅតាមផែនការត្រៀមស៊ីហ្គេម ២០១៩ និងការបណ្តុះបណ្តាលជំនាញថ្នាក់ថ្នាលឆ្ពោះទៅស៊ីហ្គេម ឆ្នាំ ២០២៣ ហើយអត្តពលិកទាំង ៦ នាក់នេះនឹងត្រូវហ្វឹកហាត់នៅទីក្រុងក្វាងចូវ ប្រទេសចិនរហូតដល់ថ្ងៃទី ៣០ ខែវិច្ឆិកា រួចពួកគេអាចនឹងចូលរួមប្រកួតស៊ីហ្គេមនៅហ្វីលីពីនតែម្តង។
លោក ចំរើន ថ្លែងថា៖ «នេះជាជំហានដំបូងដែលយើងបានបញ្ជូនអត្តពលិកជាក្រុមទៅហាត់នៅចិន ហើយនេះជាការខិតខំប្រឹងប្រែងរបស់ NOCC ក្រោមការដឹកនាំរបស់ឯកឧត្តមបណ្ឌិត ថោង ខុន ដោយមានការណែនាំ និងជួយឧបត្ថម្ភពីលោក Tang Gordon គឺយើងតែងតែគិតដល់ការហាត់ជាចម្បង ព្រោះការហ្វឹកហាត់ជាអាទិភាពទី ១ ក្នុងការស្វែងរកជោគជ័យនៅក្នុងការប្រកួតកីឡា»។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា និងលោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាក៏បានរួមដំណើរជាមួយលោក Wang Meng ជាទីប្រឹក្សាផ្ទាល់របស់លោក Tang Gordon និងលោក វ៉ាត់ ចំរើន សម្រាប់ការជូនដំណើរអត្តពលិកទាំង ៦ នាក់ទៅហាត់នៅចិនផងដែរ។
លោក ចំរើន បន្ថែមថា៖ «យើងទៅនេះមានគោលបំណង ២ ទី ១ យើងទៅសាកសួរសុខទុកដល់ថ្នាក់ដឹកនាំ និងខាងគ្រូបង្វឹកនៅចិន ដើម្បីឲ្យគាត់ជួយមើលអត្តពលិករបស់យើង និងជួយជំរុញពួកគេឲ្យដល់គោលដៅនៃកម្រិតបច្ចេកទេសឆ្ពោះទៅរកមេដាយហើយទី ២ យើងក៏ទៅដើម្បីសិក្សាស្រាវជ្រាវពីរបៀបរបប ការគ្រប់គ្រងផ្នែកការប្រមូលផ្តុំហ្វឹកហាត់នៅចិនផងដែរ ថាតើគេធ្វើរបៀបម៉េច ដើម្បីយើងយកមកធ្វើជាបទពិសោធដល់ការហ្វឹកហាត់នៅក្នុងប្រទេសរបស់យើង»។
លោក វ៉ាត់ ចំរើន ដែលជាប្រធាន សហព័ន្ធកីឡាចំបាប់កម្ពុជាផងនោះបានបញ្ជាក់ថា៖ «ចិនជាប្រទេសដែលមានគ្រូបង្វឹកកម្រិតអន្តរជាតិ និងគ្រូកម្រិតស្តង់ដាពិភពលោកច្រើន ហើយប្រទេសនេះក៏មានទីតាំងហ្វឹកហាត់ច្រើន និងម្ហូបអាហារប្រហាក់ប្រហែលនៅកម្ពុជាផងដែរ អ៊ីចឹងការទៅហ្វឹកហាត់នៅចិន ជាការស្រូបយកបច្ចេកទេសដ៏ល្អមួយ»។
លោកបានបន្តថា៖ «ចិនដូចជាបងប្អូនជាមួយកម្ពុជាទៅហើយ អ៊ីចឹងវានឹងធ្វើឲ្យយើងកាន់តែមានអារម្មណ៍កក់ក្តៅក្នុងការហ្វឹកហាត់នៅទីនោះគឺបច្ចេកទេសក៏ខ្ពស់ការគ្រប់គ្រងក៏មានកម្រិតស្តង់ដាខ្ពស់ ហេតុនេះការទៅហាត់នៅចិននេះជាកន្លែងមួយដែលស័ក្តិសមសម្រាប់កីឡាករ កីឡាការិនីយើងក្នុងការបង្កើនសមត្ថភាព»។
បន្ថែមលើនេះ NOCC ក៏គ្រោងនឹងបញ្ជូនអត្តពលិកជាង ១០០ នាក់ទៀតទៅហាត់នៅក្រៅប្រទេសដែរ។ លោក ចំរើន បានបង្ហើបថា៖ «បន្ទាប់ពីការបញ្ជូនក្រុមថ្នាលនេះទៅហាត់នៅចិនគឺនៅពេលឆាប់ៗនេះ យើងនឹងរៀបចំក្រុមធំជម្រើសជាតិជាង ១០០ នាក់ទៀតឲ្យចេញទៅហាត់នៅចិន កូរ៉េ ជប៉ុន និងមានទាំងការប្រកួតអន្តរជាតិជាប្រចាំដើម្បីវាស់ស្ទង់សមត្ថភាពពិតប្រាកដ ហើយកំណត់មេដាយសម្រាប់ស៊ីហ្គេម ឆ្នាំ ២០២៣ អ៊ីចឹងការអភិវឌ្ឍធនធានមនុស្សផ្នែកជំនាញ និងការអភិវឌ្ឍអត្តពលិកគឺជាអាទិភាពនៃស៊ីហ្គេម ២០២៣ ដែលយើងទាំងអស់គ្នា ខិតខំប្រឹងប្រែងជំរុញឲ្យអត្តពលិកយើងមានសមត្ថភាពពិតប្រាកដក្នុងការប្រជែងយកមេដាយ»៕
