.jpg)
ឆៃ សារ៉ា (ឆ្វេង) និង វង្ស វិឆ័យ សុទ្ធតែបានទទួលជ័យជម្នះ។ រូប ពន្លក
ភ្នំពេញៈ កីឡាករកម្ពុជា ឆៃ សារ៉ា និង វង្ស វិឆ័យ សុទ្ធតែបានចាត់ទុកជ័យជម្នះរបស់ខ្លួននៅក្នុងការប្រកួតប្រដាល់គុនខ្មែរដណ្តើមមេដាយមាសទម្ងន់ ៦៩ គីឡូក្រាមចម្រុះជាតិសាសន៍នៅលើសង្វៀន SEATV កាលពីព្រឹកថ្ងៃអាទិត្យជារឿង «ចៃដន្យ» ដែលមិនស្របទៅនឹងសមត្ថភាពពិតរបស់ពួកគេ។
សម្រាប់ការប្រកួតដែលតម្រូវឲ្យធ្វើការចាប់ឆ្នោតរួចធ្វើការប្រកួតភ្លាមៗនោះ កីឡាករ ឆៃសារ៉ា របស់សមាគមប្រដាល់កីឡាក្រសួងការពារជាតិបានផ្តួលកីឡាករថៃ Fa MeChhai ត្រឹមទឹកទី ៤ ហើយ វង្ស វិឆ័យ មកពីក្លិបកងទ័ពឆត្រយោង ៩១១ បានឈ្នះកីឡាករ Mar Tin មកពីអ៊ីរ៉ង់នៅត្រឹមទឹកទី ២ ដើម្បីឆ្លងទៅប្រកួតនៅវគ្គទី ២ ឬវគ្គ ៨ នាក់ចុងក្រោយជាបន្តទៀត។
កីឡាករ ឆៃ សារ៉ា ធ្លាប់បានឈ្នះខ្សែក្រវាត់នៅក្នុងទម្ងន់ស្រាលនោះបានចាញ់ប្រៀបថៃ Fa MeChhai ផ្នែកកម្លាំង និងក្បាច់ជង្គង់សម្រាប់ការប្រកួត ២ ទឹកដំបូងដោយបានដួលញឹកញាប់ ប៉ុន្តែនៅទឹកទី ៣ និងទឹកទី ៤ ឆៃ សារ៉ា បានប្តូរយុទ្ធសាស្ត្រទៅលេងក្បាច់កែងរូស និងឱបឡើងជង្គង់បានយ៉ាងល្អបំផុត។
នៅចុងទឹកទី ៣ ស្នៀតជង្គង់របស់ ឆៃ សារ៉ា កាន់តែមានប្រសិទ្ធភាព និងចូលគោលដៅល្អបានបង្ខំឲ្យកីឡាករថៃវង្វេងវង្វាន់ និងត្រូវអាជ្ញាកណ្តាល ឡុង វិបុល រាប់ Fa MeChhai ជាលើកទី ១ ហើយចូលទឹកទី ៤ ឆៃ សារ៉ា នៅតែបន្តគ្រប់គ្រង និងកាន់តែមានប្រៀបឡើងជាលំដាប់ហើយនៅចុងទឹកនេះ ស្នៀតជង្គង់ជាច្រើន និងបន្ថែមដោយកែងស្តាំចូលគោលដៅបានធ្វើឲ្យ FaMeChhai សន្លប់ធំតែម្តងនាំឲ្យ ឆៃ សារ៉ា ទទួលបានជ័យជម្នះដ៏មិនគួរឲ្យនឹកស្មានដល់។
ជាមួយនឹងជ័យជម្នះនេះ ឆៃ សារ៉ា ដែលវ៉ៃបណ្តើរងាកមើលកូនយំនៅក្រៅសង្វៀនបណ្តើរនោះបាននិយាយ ក្រោយការប្រកួតថា៖ «សម្រាប់ការប្រកួតនេះ ខ្ញុំហ្វឹកហាត់មិនបានពេញទេ ដោយសារខ្ញុំជាប់មើលថែកូន ហើយពេលកំពុងប្រកួតអារម្មណ៍របស់ខ្ញុំ ក៏មិនមូលដែរ ខណៈខ្ញុំបានឃើញកូនរបស់ខ្ញុំ ស្រែកយំនោះហេតុនេះខ្ញុំអាចនិយាយបានថាការទទួលបានជ័យជម្នះលើកនេះ វាកើតឡើងដោយការចៃដន្យ»។
ទោះបីជាយ៉ាងណា ឆៃ សារ៉ា បានបញ្ជាក់ថា៖ «បើទោះបីជាជ័យជម្នះនេះកើតឡើងដោយការចៃដន្យ ប៉ុន្តែវាបានធ្វើឲ្យខ្ញុំមានកម្លាំងចិត្តកាន់តែខ្លាំងក្នុងការប្តេជ្ញាចិត្តយកឈ្នះសម្រាប់ការប្រកួតក្រោយៗគឺខ្ញុំនឹងទុកកូនខ្ញុំឲ្យនៅមួយឡែក ដើម្បីធ្វើការហ្វឹកហាត់ និងប្រកួតឲ្យបានកាន់តែល្អ ដោយខ្ញុំរំពឹងថាខ្ញុំអាចនឹងឡើងដល់វគ្គផ្តាច់ព្រ័ត្រ ព្រោះកីឡាករបរទេសផ្សេងៗទៀតមិនខ្លាំងដូច Fa MeChhai ដែលខ្ញុំបានឈ្នះនៅថ្ងៃនេះទេ»។
ស្រដៀងគ្នានេះកីឡាករជើងថ្មីរបស់កម្ពុជា វង្ស វិឆ័យ បានជួបការលំបាកខ្លាំង ក្នុងការទប់ទល់ជាមួយកីឡាករ Mar Tin មកពីអ៊ីរ៉ង់នៅក្នុងទឹកទី ១ ដំបូង ព្រោះ Mar Tin ល្អផ្នែកកណ្តាប់ដៃ និងវាយឲ្យ វង្ស វិឆ័យ រងរបួសក្បែរភ្នែកស្តាំទៀត។ ប៉ុន្តែចូលដល់ទឹកទី ២ វិឆ័យ បានប្តូរយុទ្ធសាស្ត្រទៅទាត់ផ្នែកជើងក្រោម និងដេញធាក់ពីចម្ងាយធ្វើឲ្យ Mar Tin រត់គេចពេញសង្វៀន ហើយនៅពេលមានការប្រតាយប្រតប់គ្នាកាន់តែខ្លាំងនោះ Mar Tin បានដួល និងគ្រេចជើងមិនអាចងើបរួចធ្វើឲ្យ វង្ស វិឆ័យ ឈ្នះតែម្តង។
ទោះយ៉ាងណា វង្ស វិឆ័យ បាននិយាយក្រោយការប្រកួតថា៖ «ជ័យជម្នះរបស់ខ្ញុំនៅថ្ងៃនេះវាបានកើតឡើងដោយការចៃដន្យ និងមានការលំបាកបំផុត ហេតុនេះសម្រាប់ខ្ញុំផ្ទាល់គឺពិតជាពិបាកឆ្លងផុតវគ្គជម្រុះនេះណាស់ ព្រោះនៅក្នុងចំណោមកីឡាករទាំងអស់ដែលប្រកួតក្នុងព្រឹត្តិការណ៍នេះគឺខ្ញុំមានបទពិសោធក្មេងខ្ចីជាងគេ ប៉ុន្តែខ្ញុំនឹងប្រឹងប្រែងប្រកួតឲ្យអស់ពីសមត្ថភាព រហូតដល់ចប់ចុងចប់ដើម»៕
