ក្រុងប៉ារីស៖ ជម្រើសជាតិអ៊ីតាលីបានក្លាយជាក្រុមទី ២ ដែលមានឱកាសលេងនៅព្រឹត្តិការណ៍ Euro 2020 ក្រោយពីបានឈ្នះប្រទេស ក្រិក ពីថ្ងៃសៅរ៍ ខណៈជម្រើសជាតិអេស្ប៉ាញជាម្ចាស់ជើងឯក ៣ ជំនាន់ បានកាត់បន្ថយឱកាសឡើងទៅព្រឹត្តិការណ៍នេះ នៅការប្រកួតចុងក្រោយដោយធ្វើឲ្យរបូតគ្រាប់បាល់ធ្វើឲ្យស្មើគ្នានឹងក្រុមជម្រើសជាតិន័រវែស។
ខ្សែបម្រើ Jorginho នៅក្លិប Chelsea រកបានគ្រាប់បាល់បើកឆាកដោយការស៊ុតបាល់ពិន័យ ១១ ម៉ែត្រ នៅតង់ទី ២ មុនពេលកីឡាករ Federico Bernardesch បន្ថែម ១ គ្រាប់ទៀត សម្រាប់ក្រុមអ៊ីតាលីធ្វើឲ្យពួកគេឈ្នះក្រុមក្រិក ២-០ និងឈ្នះទាំង ៧ ប្រកួតក្នុងពូល J។
ក្រុមរបស់លោក Roberto Mancini បានចូលរួមក្រុមបែលហ្ស៊ិកក្នុងលទ្ធផលស្មើគ្នាសម្រាប់វគ្គផ្ដាច់ព្រ័ត្រនៅឆ្នាំក្រោយជាទីដែលក្រុមអ៊ីតាលីនឹងលេងក្នុងការប្រកួត ២ ក្រុមដំបូង នៅកីឡដ្ឋាន Stadio Olimpico។
លោក Mancini គ្រូបង្វឹកជម្រើសជាតិអ៊ីតាលីដែលដឹកនាំរយៈពេល ១៨ ខែមកនេះបាននិយាយថា៖ «យើងអាចបង្កើតក្រុមមួយក្នុងរយៈពេលខ្លីបាន ប៉ុន្តែវាមិនងាយស្រួលទេ ប៉ុន្តែយើងត្រូវអរគុណកីឡាករដែលបានយល់ចិត្តគ្នា»។
គ្រូបង្វឹករូបនេះបានបន្ថែមថា៖ «វាជាក្រុមមួយដែលមានចរិតលក្ខណៈប្រយុទ្ធ និងលេងជាមួយបាល់ ប៉ុន្តែជាក្រុមមួយដែលត្រូវកែលម្អទម្រង់លេងផងដែរ។ ឥឡូវនេះយើងមានរយៈពេល ១ ឆ្នាំ ដើម្បីព្យាយាម និងធ្វើឲ្យប្រសើរឡើង»។
លោក Mancini បានបន្ថែមថា៖ «យើងមានការងារជាច្រើន ប៉ុន្តែយើងមិនទាន់ជាក្រុមអឺរ៉ុបល្អបំផុតទេ ហើយខ្ញុំសប្បាយចិត្ត និងមានមោទនភាពដែលបានជួយជម្រើសជាតិឲ្យឆ្លងផុតទីលានដ៏តឹងតែងនេះ»។
ទន្ទឹមនេះដែរ ជម្រើសជាតិអេស្ប៉ាញបានធ្លាក់ពិន្ទុលើកដំបូងក្នុងពូល F ខណៈកីឡាករ Joshua King បានស៊ុតបាល់ពិន័យ ១១ ម៉ែត្រ យ៉ាងល្អក្នុងនាទីទី ៩៤ ដើម្បីជួយឲ្យជម្រើសជាតិន័រវែស តាមស្មើពួកគេក្នុងលទ្ធផល ១-១ ពីថ្ងៃសៅរ៍។
កីឡាករ Gergio Ramos បានបំបែកកំណត់ត្រាក្នុងការបង្ហាញខ្លួនអន្តរជាតិសម្រាប់ក្រុមអេស្ប៉ាញច្រើនជាងគេបំផុតរហូតដល់ ១៦៨ លើក ដែលវ៉ាដាច់កីឡាករ Iker Casillas។
ក្រុមភ្ញៀវអេស្ប៉ាញបាននាំមុខ ១ គ្រាប់មុនទៅលើក្រុមម្ចាស់ផ្ទះន័រវែស ខណៈកីឡាករ Saul Niguez ស៊ុតបាល់ពីចម្ងាយចូលទីយ៉ាងល្អ ប៉ុន្តែក្រុមអេស្ប៉ាញមិនបានឈ្នះជាប់គ្នា ៧ លើកនោះទេ ដោយសារក្រុមម្ចាស់ផ្ទះបានតាមស្មើវិញក្នុងនាទីទី ៩៤។
ប្រធានក្រុមអេស្ប៉ាញ Ramos បាននិយាយថា៖ «វាពិតជាការឈឺចាប់មួយដែលបានបាត់បង់ពិន្ទុនៅក្នុងវិនាទីចុងក្រោយបែបនេះ។ វាពិតជាស្មុគស្មាញក្នុងការប្រកួតនឹងក្រុមមួយដែលបានដឹងហើយថា ប្រសិនបើពួកគេចាញ់ ពួកគេពិតជានឹងត្រូវធ្លាក់»។
ក្រុមន័រវែសបានមានឱកាសលេងនៅព្រឹត្តិការណ៍ជើងឯក Euro ឆ្នាំ ២០០០ ប៉ុន្តែឥឡូវនេះពួកគេបានជាប់ចំណាត់ថ្នាក់ទី ៤ មាន ១០ ពិន្ទុ គឺតាមពីក្រុមជម្រើសជាតិស៊ុយអែត ៤ ពិន្ទុ ជាមួយការនៅសល់ ៣ ប្រកួតទៀត៕ AFP/SN