ភ្នំពេញ: លំដាប់កីឡាករជើងខ្លាំងរបស់កម្ពុជាទាំង ៦ នាក់ មាន វ៉ាន់ វឿន, ឡុង សំណាង, ផល សោភ័ណ្ឌ, ឡៅ ចន្ទ្រា, រឿង សោភ័ណ្ឌ និង ឃីម ឌីម៉ា ត្រូវបានម្ចាស់សង្វៀនប៉ុស្តិ៍លេខ ៥ រៀបចំដាក់ឲ្យធ្វើការប្រកួតជាមួយអ្នកប្រយុទ្ធមកពី ៥ ប្រទេសក្នុងព្រឹត្តិការណ៍ Khmer Fight នៅសង្ក្រាន្តក្រុងព្រៃវែង ខេត្តព្រៃវែងថ្ងៃចូលឆ្នាំទី ២ នាថ្ងៃទី ១៥ ខែមេសា ហើយសង្វៀនមួយនេះក៏បានរៀបចំការប្រកួតដណ្តើមពានរង្វាន់រវាងកីឡាករក្នុងស្រុកនៅថ្ងៃទី ១៤ ខែមេសាក្នុងសង្ក្រាន្តក្រុងព្រៃវែងរយៈពេល ២ ថ្ងៃផងដែរ។
លោក ហ៊ ង៉ែត អ្នកអត្ថាធិប្បាយកីឡាប្រចាំស្ថានីយទូរទស្សន៍កងយោធពលខេមរភូមិន្ទប៉ុស្តិ៍លេខ ៥ បានប្រាប់ថា៖ «ការប្រកួតរៀបចំឡើង ២ ថ្ងៃរបស់សង្វៀនប៉ុស្តិ៍លេខ ៥ នេះគឺក្រោមអធិបតីភាពលោក ស សុខា និង សម្តេច ស ខេង គឺនៅថ្ងៃទី១៤ មួយព្រឹត្តិការណ៍ មានប្រកួតថា្នក់ជាតិជម្រើសកំពូលអ្នកខ្លាំងៗដែលធ្លាប់ឈ្នះខ្សែក្រវាត់កន្លងមកដោយឲ្យឈ្មោះថាដណ្តើមពានរង្វាន់មហាសង្ក្រាន្តឆ្នាំថ្មី។ ចំណែកព្រឹត្តិការណ៍អន្តរជាតិ Khmer Fight ថ្ងៃទី ១៥ ខែមេសាជាការប្រកួតធំបំផុតសម្រាប់បម្រើការកម្សាន្តដែលផ្សាយផ្ទាល់តាម TV5 ពីក្រុងព្រៃវែងតែម្តង»។
ចំណែកលោក សេង កដិកា នាយកគ្រប់គ្រងកម្មវិធីប្រកួតប្រចាំសង្វៀនបានប្រាប់ថា៖ សមាសភាពអ្នកប្រដាល់ត្រូវបានជម្រើសយ៉ាងល្អបំផុត ហើយការចំណាយជាទូទៅគឺទ្វេគុណ។ ជាមួយគ្នានោះអ្នកប្រដាល់ដែលមានឈ្មោះទៅប្រកួតភាគច្រើនគឺអ្នកធ្លាប់ឈ្នះខ្សែក្រវាត់កន្លងមកហើយបើនិយាយពីកម្មវិធីអន្តរជាតិ Khmer Fight ៦ ប្រទេសវិញ សុទ្ធតែកំពូលកីឡាករល្បីល្បាញប្រចាំព្រះរាជាណាចក្រកម្ពុជាយើងរួមមានវ៉ាន់ វឿន,ឡុង សំណាង,ផល សោភ័ណ្ឌ,ឡៅចន្ទ្រា,រឿង សោភ័ណ្ឌ និង ឃីម ឌីម៉ា»។
ចំពោះសមត្ថភាព និងប្រវត្តិប្រកួតរបស់កីឡាករទាំង ៦ គូនៅក្នុងព្រឹត្តិការណ៍អន្តរជាតិ Khmer Fight នេះត្រូវបានគណៈកម្មការរៀបចំប្រាប់ថាកីឡាករ រឿង សោភ័ណ្ឌ មានអាយុ ២៩ ឆ្នាំកម្ពស់ ១,៦៥ ម៉ែត្រធ្លាប់ប្រកួតបាន ១៨០ ដង ឈ្នះ ១៥៨ ចាញ់ ១៧ ស្មើ ៥ ដងត្រូវដាក់ឲ្យប្រកួតក្នុងទម្ងន់ ៦៩ គីឡូក្រាមជាមួយកីឡាករថៃ Petchmai Chorrongsak ដែលមានអាយុ ២០ ឆ្នាំកម្ពស់ ១,៦៨ ម៉ែត្រ និងធ្លាប់ប្រកួតបាន ៨០ ដង ឈ្នះ ៦៥ ចាញ់ ១៥ ដង។
ចំណែកម្ចាស់មេដាយមាសស៊ីហ្គេមឆ្នាំ ២០១៧ ឃីម ឌីម៉ា ដែលមានអាយុ ២៨ ឆ្នាំ កម្ពស់ ១,៧២ ម៉ែត្រធ្លាប់ប្រកួតបាន ៧០ ឈ្នះ ៥២ ចាញ់ ១៣ ស្មើ ៥ ដង ត្រូវប៉ះកីឡាកររបស់ថៃ Thong meungsima ក្នុងទម្ងន់ ៦៣,៥ គីឡូក្រាម ហើយថៃម្នាក់នេះមានកម្ពស់ ១,៦៧ ម៉ែត្រប្រកួតបាន ១១០ ឈ្នះ ៨៦ និងចាញ់ ២៤ ដង។
ចំពោះកីឡាករវ័យ ២៣ ឆ្នាំកម្ពស់ ១,៧៣ ម៉ែត្រ ឡៅ ចន្ទ្រា ត្រូវប្រកួតក្នុងទម្ងន់ ៦៧ គ.ក្រ ជាមួយកីឡាករមកពីអ៊ីតាលី Federico Ernesto ដែលមានកម្ពស់ ១,៧៦ ម៉ែត្រធ្លាប់ប្រកួតបានត្រឹម ១៧ ឈ្នះ ១២ និងចាញ់ ៥ ដងគឺតិចជាង ចន្ទ្រា ដែលធ្លាប់ប្រកួតបាន ១២០ ឈ្នះ ១០៦ ស្មើ ៤ និងចាញ់ ១០ ដង។
ជាមួយគ្នានេះ វ៉ាន់ វឿន ដែលទើបតែឈ្នះខ្សែក្រវាត់ថ្មីៗនេះត្រូវតទល់នឹងកីឡាករឡាវ Narongrith S.Visetkit ក្នុងទម្ងន់ ៥៧ គីឡូក្រាម ហើយកីឡាករឡាវរូបនេះធ្លាប់ប្រកួតបាន ១២០ ឈ្នះ ៨៥ និងចាញ់ ៣៥ ដង។ រីឯម្ចាស់ខ្សែក្រវាត់ ២ ស្ថាប័ន ឡុង សំណាង ត្រូវប៉ះកីឡាករបារាំង Jordan ក្នុងទម្ងន់ ៦៣ គីឡូក្រាមដែលបរទេសម្នាក់នេះធ្លាប់ប្រកួតបាន ១៥ ដងឈ្នះ ១១ និងចាញ់ ៤ ដង។
យ៉ាងណាមិញកីឡាករ ផល សោភ័ណ្ឌ ត្រូវប្រកួតក្នុងទម្ងន់ ៦៣ គីឡូក្រាមជាមួយកីឡាករអ៊ូស្ត្រាលី Mehrdad Addinejad ក្នុងទម្ងន់ ៦៣ គីឡូក្រាមដែលគេម្នាក់នេះធ្លាប់ប្រកួតបាន ៤០ ដងឈ្នះ ៣៩ និងចាញ់តែ ១ ដងគត់ ហើយក្រៅពីការប្រកួតគូអន្តរជាតិ ៦ គូនេះក៏មានការប្រកួតគូមិត្តភាពក្នុងស្រុកចំនួន ២ គូទៀតដែរ ខណៈការប្រកួតដណ្តើមពានរង្វាន់មហាសង្ក្រាន្តឆ្នាំថ្មីនៅថ្ងៃទី ១៤ ខែមេសាដែលចាប់ធ្វើពីម៉ោង ៧ ដល់ម៉ោង ៩ យប់ដូចគ្នានោះមានការប្រកួតដណ្តើមពានចំនួន ៣ គូ និងប្រកួតមិត្តភាពក្នុងស្រុកចំនួន ៣ គូទៀតផងដែរ៕