ភ្នំពេញ: កីឡាប្រដាល់ចាស់វស្សា Dy Sellak ដែលធ្លាប់ជាជើងខ្លាំងរបស់ថៃម្នាក់នោះ ត្រូវបានគណៈកម្មការផ្គូផ្គងប្រចាំសង្វៀនអាស៊ីអាគ្នេយ៍ ដាក់ឲ្យជួបប្រកួតជាមួយអ្នកលេងកណ្តាប់ដៃរឿង សោភ័ណ្ឌ មកក្លិបមកុដរាជសីហ៍នៃសមាគមប្រដាល់ក្រសួងមហាផ្ទៃ ក្នុងទម្ងន់ ៦៩ គីឡូក្រាម នៅល្ងាចថ្ងៃអាទិត្យ ទី ១៦ ខែធ្នូ ឆ្នាំ ២០១៨។
នៅថ្ងៃ និងសង្វៀនតែមួយនេះ កីឡាករអេ រដ្ឋា ដែលពីមុនលំបាកសុំប្រកួតជាលក្ខណៈអន្តរជាតិ ប៉ុន្តែបានផ្លាស់ប្តូរក្លិបមកនៅជាមួយអេ ភូថង ទទួលបានសំណាងឡើងប្រកួតជាមួយកីឡាករថៃម្តងទៀត ដោយរូបគេជួបជាមួយ Oup Sai ក្នុងទម្ងន់ ៥៧ គីឡូក្រាម។
នាយកគ្រប់គ្រងកម្មវិធីប្រកួតប្រចាំសង្វៀនអាស៊ីអាគ្នេយ៍លោកញាន សុធី បានប្រាប់ភ្នំពេញ ប៉ុស្តិ៍ ថា៖ «គណៈកម្មការផ្គូផ្គងប្រចាំសង្វៀនបានជ្រើសកីឡាករថៃ Dy Sellak ជាកីឡាករលំដាប់ខ្លាំងទម្ងន់ធ្ងន់ ខណៈដែលតាមប្រភពបានឲ្យដឹងកីឡាករថៃរូបនេះ មានអាយុ និងបទពិសោធចាស់វស្សាហើយដែរ»។
លោកញាន សុធី បាននិយាយថា៖ «កីឡាកររឿង សោភ័ណ្ឌ ពិតជាលំបាករកគូ ប្រកួតណាស់ពីព្រោះជើងខ្លាំងៗមួយចំនួនដែលធ្លាប់មកប្រកួតនៅកម្ពុជា សុទ្ធតែប្រកួតចាញ់ ហើយភាគច្រើនបានរងនូវការចាញ់សន្លប់ថែមទៀត ហេតុនេះកីឡាករថៃមួយចំនួនធំ គេចមិនចង់ប្រកួតជាមួយរឿង សោភ័ណ្ឌ នោះឡើយ ដែលធ្វើឲ្យលំបាករកដៃគូ»។
តាមកំណត់ត្រានៃការប្រកួតដែលភ្នំពេញ ប៉ុស្តិ៍ ទទួលបានពីគណៈកម្មការផ្គូផ្គង រឿង សោភ័ណ្ឌ មានចំនួនប្រកួតច្រើនជាងកីឡាករថៃ ដល់ទៅ ៩០ លើកឯណោះ ប៉ុន្តែចំនួនប្រកួតពិតប្រាកដរបស់កីឡាករថៃ មួយចំនួនមកប្រកួតនៅកម្ពុជាដំបូងលាក់ប្រវត្តិប្រកួត។
រឿង សោភ័ណ្ឌ ប្រកួតបានចំនួន ១៦៥ លើក ឈ្នះ ១៤៥ លើក ចាញ់ ១៧ លើក និងស្មើ ៣ លើក។ បើតាមស្ថិតិដែលទទួលបានកីឡាករថៃ Dy Sellak ប្រកួតបានតែ ៧៥ លើកឈ្នះ ៦៥ លើកចាញ់ ១០ លើកមិនដែលស្មើខណៈដែលកម្ពស់ ១,៦៧ ម៉ែត្រ។ លោកថាញ់ វ៉ាឡេក គ្រូបង្វឹកកីឡាករថៃ បាននិយាយថា Dy Sellak ធ្លាប់ជាកីឡាករលំដាប់ខ្លាំងចាស់វស្សា ប៉ុន្តែមួយរយៈចុងក្រោយខកខានយូរមិនសូវបានប្រកួត។ ការប៉ះប្រកួតជាមួយរឿង សោភ័ណ្ឌ អាចជាការប្រកួតដ៏លំបាកមួយ និងមានភាពស្វិតស្វាញ»។
កីឡាករអេ រដ្ឋា នឹងត្រូវប៉ះ ជាមួយនឹងកីឡាករថៃ Oup Sai ក្នុងការប្រកួតទម្ងន់ ៥៧ គីឡូក្រាម។ អេ រដ្ឋា មានបទពិសោធប្រកួតច្រើនជាងកីឡាករថៃ ដោយរូបគេធ្លាប់ប្រកួតបាន ៨៥ លើក ឈ្នះ ៧១ លើក ចាញ់ ១៣ លើក និងស្មើ ១ លើក ហើយ រូបគេមានកម្ពស់ ១,៦៤ ម៉ែត្រ។ ដោយឡែក កីឡាករថៃ ធ្លាប់ប្រកួតបាន ៦០ លើក ឈ្នះ ៥២ លើក ចាញ់ ៨ លើក មិនដែលស្មើ ហើយរូបគេមានកម្ពស់ ១,៦៦ ម៉ែត្រ៕