.jpg)
ឌន សៅ បានចាប់បោក ហេង វុទ្ធី ក្នុងការប្រកួតថ្នាក់ជាតិ ចុងក្រោយរបស់គេ កាលឆ្នាំ ២០១៦។ ស្រេង ម៉េងស្រ៊ុន
ភ្នំពេញៈ អតីតជើងខ្លាំងផ្នែកកីឡាចំបាប់របស់កម្ពុជា ឌន សៅ ដែលធ្លាប់បានឈ្នះមេដាយមាសពីការប្រកួតស៊ីហ្គេម និងការប្រកួតជើងឯកអាស៊ានឲ្យកម្ពុជា ជាច្រើនកន្លងមកនេះ បានសម្រេចវិលមកប្រកួតប្រជែងនៅលើទីលានជាថ្មី ដើម្បីប្រជែងរកមេដាយ ក្នុងការប្រកួតកីឡាចំបាប់ជើងឯកអាស៊ាន ដែលត្រូវធ្វើនៅហ្វីលីពីន ពីថ្ងៃទី ៦ ដល់ទី ៩ ខែវិច្ឆិកា ខាងមុខ។
កីឡាករទម្ងន់ធ្ងន់ ឌន សៅ ដែលបានវិវឌ្ឍខ្លួនទៅជាគ្រូបង្វឹកនៃក្រុមថ្នាលជម្រើសជាតិចំបាប់កម្ពុជា និងបានដកខ្លួនចេញពីការប្រកួត នៅលើឆាកអន្តរជាតិ អស់រយៈពេល ៣ ឆ្នាំមកហើយនោះ នឹងត្រូវរួមដំណើរជាមួយមិត្តរួមជាតិចំនួន ១០ នាក់ ក្រោមការដឹកនាំរបស់លោក ធិន វិចិត្រ ព្រមទាំងគ្រូបង្វឹកលោក Kim Soo Gil និងគ្រូជំនួយ កាង ដែនពិសិដ្ឋ ឆ្ពោះទៅកាន់ហ្វីលីពីន នៅព្រឹក ម៉ោង ៨:២០ ថ្ងៃចន្ទនេះ។
យ៉ាងណាក៏ដោយ សម្រាប់ការវិលត្រឡប់មកកាន់ទីលានប្រកួតជាថ្មីនេះ ឌន សៅ ដែលមានទម្ងន់ត្រឹម ៩៧ គីឡូក្រាម ហើយធ្លាប់ឈ្នះបានមេដាយមាស ៣ ឆ្នាំជាប់ៗគ្នា ក្នុងការប្រកួតជើងឯកអាស៊ាននេះ កាលពីឆ្នាំ ២០១៤ ឆ្នាំ ២០១៥ នៅសិង្ហបុរី និងឆ្នាំ ២០១៦ នៅកម្ពុជានោះ ត្រូវដាក់ឲ្យប្រកួតក្នុងទម្ងន់ ១២៥ គីឡូក្រាម ដើម្បីប្រជែងរកមេដាយផង និងវាស់ស្ទង់កម្រិតសមត្ថភាព ព្រោះ ឌន សៅ នឹងត្រូវដាក់ឲ្យប្រកួតក្នុងទម្ងន់ធ្ងន់នេះ ក្នុងស៊ីហ្គេម នៅហ្វីលីពីន ឆ្នាំ ២០១៩ ខាងមុខ។
ឌន សៅ ដែលធ្លាប់ឈ្នះបានមេដាយមាស ១ និងប្រាក់ ១ ក្នុងការប្រកួតចុងក្រោយនៅស៊ីហ្គេម កាលពីឆ្នាំ ២០១៣ បានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា៖ «ការវិលមកប្រកួតជាថ្មីនេះ វាមានការលំបាកដែរ ព្រោះខ្ញុំខានប្រកួតចូល ៣ ឆ្នាំហើយ ហើយខ្ញុំក៏លែងបានដឹងពីសមត្ថភាពគូប្រកួតរបស់ខ្ញុំ ពីមុនៗមកដែរ គឺមួយរយៈពេលនេះ ខ្ញុំបានផ្តោតខ្លាំងទៅលើតែការបង្វឹកសិស្ស មិនសូវបានហ្វឹកហាត់ខ្លួនឯងប៉ុន្មានទេ»។
កីឡាករជើងចាស់រូបនេះ បន្ថែមថា៖ «ការឡើងទៅប្រកួតក្នុងទម្ងន់ ១២៥ គីឡូក្រាម ក៏ជាបញ្ហាមួយផងដែរ ដោយសារខ្ញុំមានទម្ងន់ត្រឹម ៩៧ គីឡូក្រាម ប៉ុន្តែខ្ញុំត្រូវតែខំប្រឹងប្រកួតឲ្យអស់ពីសមត្ថភាព ព្រោះវាជាឱកាសរបស់ខ្ញុំក្នុងការស្ទាបស្ទង់ពីកម្រិតសមត្ថភាពរបស់គូប្រកួត ក្នុងទម្ងន់ធ្ងន់នេះ។ បើសិនខ្ញុំធ្វើបានល្អក្នុងការប្រកួតនេះ ខ្ញុំនឹងបន្តទៅប្រកួតស៊ីហ្គេម តែបើខ្ញុំទទួលបានលទ្ធផលមិនល្អ ខ្ញុំប្រហែលជាឈប់ត្រឹមការប្រកួតនេះហើយ»។
យ៉ាងណាក៏ដោយ លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា នៅតែផ្តល់ការជឿជាក់លើ ឌន សៅ។ លោកបាននិយាយថា៖ «យើងគិតថា ឌន សៅ នៅតែមានសក្តានុពលជួយដល់ក្រុមចំបាប់យើង និងអាចលេងតំណាងឲ្យជាតិ ហើយការចេញទៅប្រកួតជើងឯកអាស៊ានលើកនេះ ជាការតេស្តសមត្ថភាពគាត់ ថាតើគាត់នៅរក្សាសមត្ថភាព បានកម្រិតណា? ដ្បិតអីនៅក្នុងទម្ងន់ធ្ងន់នេះ យើងនៅមិនទាន់រកបានអ្នកមានសមត្ថភាពលើ ឌន សៅ នៅឡើយទេ»។
មិនត្រឹមតែ ឌន សៅ ម្នាក់ទេ ដែលត្រូវតេស្តសមត្ថភាពខ្លួនឯង ប៉ុន្តែអត្តពលិក ១០ នាក់ទៀត មានកីឡាករ ហេង វុទ្ធី ប្រកួតក្នុងទម្ងន់ ៩២ គីឡូក្រាម ឆាំ ពិសិន ទម្ងន់ ៨៦ គ.ក្រ កែវ សុភ័ក្រ ទម្ងន់ ៧៩ គ.ក្រ ចាប់ សុខលី ទម្ងន់ ៦១ គ.ក្រ ច្រាយ ប្រុស ទម្ងន់ ៥៧ គ.ក្រ កីឡាការិនី សឿន នឿន ទម្ងន់ ៦៥ គ.ក្រ វថ្ថា លក្ខិណា ទម្ងន់ ៤៥ គ.ក្រ ឌន ស្រស់ ទម្ងន់ ៦០ គ.ក្រ ជា កញ្ញា ទម្ងន់ ៥៥ គ.ក្រ និង ឌិត សំណាង ទម្ងន់ ៥០ គ.ក្រ ក៏ត្រូវយកព្រឹត្តិការណ៍នេះ ដើម្បីតេស្តសមត្ថភាពខ្លួនឯងដូចគ្នា សម្រាប់ត្រៀមស៊ីហ្គេម ឆ្នាំ ២០១៩ ដែរ។
លោក ធិន វិចិត្រ បញ្ជាក់ថា៖ «បញ្ហាខ្វះថវិកា បានធ្វើឲ្យយើងខកខានការប្រកួតជើងឯកអាស៊ាននេះ កាលពីឆ្នាំ ២០១៧ ប៉ុន្តែលើកនេះលោក Casey Barnett អនុប្រធានសហព័ន្ធ បានឧបត្ថម្ភជាង ១ ម៉ឺនដុល្លារ សម្រាប់បញ្ជូនក្រុមអត្តពលិករបស់យើងទៅប្រកួតលើកនេះ ដោយយើងត្រូវប្រជែងរកមេដាយផង និងយកការប្រកួតនេះដើម្បីតេស្តសមត្ថភាពផង ហើយប្រទេសផ្សេងទៀត ក៏គេធ្វើបែបនេះដែរ ពិសេសម្ចាស់ផ្ទះ ព្រោះហ្វីលីពីន ចង់ដឹងកម្រិតសមត្ថភាពអត្តពលិកមកពីបណ្តាប្រទេសផ្សេងៗ មុនពេលពួកគេធ្វើជាម្ចាស់ផ្ទះ ការប្រកួតស៊ីហ្គេម នៅឆ្នាំ ២០១៩»៕
