.jpg)
ខ្សែការពារ Anderson Zogbe របស់ណាហ្គាវើល (ស្តាំ) បានព្យាយាមបិទ Osene Bolayi របស់ក្រុម Hanoi។
ភ្នំពេញៈ ការវិលជួបក្រុមភ្នំពេញក្រោន សម្រាប់ការប្រកួតលីកកំពូលនៅចុងសប្តាហ៍នេះ វាបានក្លាយជាការប្រកួតមុនគេដែលក្រុមណាហ្គាវើលត្រូវព្យាយាមបង្ហាញពីការផ្លាស់ប្តូរនូវទម្រង់លេង និងទម្លាប់នៃការលេងរបស់ខ្លួន ដើម្បីបំពេញទៅតាមការចង់បានរបស់គ្រូបង្វឹកលោក មាស ចាន់ណា បន្ទាប់ពីក្រុមមួយនេះនៅតែបង្ហាញចំណុចមិនសប្បាយចិត្តពេលពួកគេបន្តចាញ់ក្រុម Hanoi FC ក្នុងការប្រកួតជម្រុះតាមពូលពានរង្វាន់ AFC Cup 2019 នៅលើទឹកដីខ្លួនឯងនោះ។
បើទោះបីជាក្រុមណាហ្គាវើលបានបន្តចាញ់ក្រុមលីកកំពូលវៀតណាម Hanoi ៥-១ ក្នុងការប្រកួតជើងទី ២ នៅពហុកីឡដ្ឋានជាតិកាលពីពុធ ប៉ុន្តែលោក មាស ចាន់ណា ពេញចិត្តនឹងទទួលយកព្រោះលទ្ធផលនេះ វាប្រសើរជាងការចាញ់ ១០-០ នៅលើទឹកដីក្រុម Hanoi។
ប៉ុន្តែការរហូត ២ គ្រាប់នៅចុងម៉ោងដែលរកបានដោយខ្សែបម្រើពាក់លេខ ១៣ Van Kein នៅនាទីទី ៨៦ និង ខ្សែប្រយុទ្ធពាក់លេខ ៩០ Osene Bolayi នៅនាទីទី ៩០+១ របស់ក្រុម Hanoi បន្ទាប់ពីកីឡាករ Aderson Zogbe រកបាន ១ គ្រាប់ឲ្យណាហ្គាវើលវិញនៅនាទីទី ៦៣ នោះបានធ្វើឲ្យលោក មាស ចាន់ណា មានការមិនសប្បាយចិត្តទាល់តែសោះ។
លោក មាស ចាន់ណា បាននិយាយក្រោយការប្រកួតថា៖ «ខ្ញុំសប្បាយចិត្ត នៅពេលដែលពួកគាត់ធ្វើបានល្អពីនាទីទី ១ ដល់នាទី ៣៥ ទៅតាមអ្វីដែលជាផែនការរៀបចំ ប៉ុន្តែ ១០ នាទីចុងក្រោយពេលគាត់ហត់ គាត់ចាប់ផ្ដើមធ្លាក់ ធ្វើឲ្យគេមានឱកាសទាត់ចូលយើងភ្លាមៗ ហើយនេះវាជាបញ្ហាដែលខ្ញុំមិនសប្បាយចិត្តគឺយើងមានបញ្ហាត្រង់គេទាត់ចូលនៅចុងម៉ោង»។
គ្រូបង្វឹករូបនេះបានបញ្ជាក់ថា៖ «ខ្ញុំបាននិយាយថាយ៉ាងហោចណាស់លទ្ធផលមិនឲ្យអាក្រក់ដូចនៅ Hanoi ទេអ៊ីចឹងលទ្ធផលនេះ ខ្ញុំទទួលយកបាន ប៉ុន្តែទាក់ទងនឹងគេទាត់ចូលចុងម៉ោង ខ្ញុំនឹងព្យាយាមទាំងលីកកំពូលកម្ពុជា និងប្រកួតបន្ទាប់នៅ AFC Cup នេះគឺខ្ញុំមិនឲ្យគេទាត់ចូលអ៊ីចឹងទៀតទេ! នៅតង់ទី ២ យើងគួរតែខ្លាំងជាងគេ និងគួរតែទាត់ចូលគេវិញ អ៊ីចឹងអ្វីៗ ខ្ញុំត្រូវតែផ្លាស់ប្ដូរខ្លះ»។
ជាមួយការប្តេជ្ញាចិត្តផ្លាស់ប្តូរទម្លាប់លេងមិនសូវល្អ នៅចុងម៉ោងនោះលោក មាស ចាន់ណា អាចនឹងចាប់ផ្តើមអនុវត្តពេល ណាហ្គាវើល វិលមកជួបក្រុមភ្នំពេញក្រោននៅថ្ងៃអាទិត្យនេះ ព្រោះក្រុមមាន ១២ ពិន្ទុមួយនេះត្រូវការ ៣ ពិន្ទុជាចាំបាច់ ដើម្បីរក្សាទីតាំងលេង ២ និងប្រជែងយកតំបន់កំពូលតារាងពីក្រុមមាន ១៥ ពិន្ទុ ព្រះខ័នរាជស្វាយរៀង ហើយជាពេលដ៏ល្អផងដែរ ខណៈភ្នំពេញក្រោនបានបាត់បង់ខ្សែការពារបរទេសម្នាក់ទៀតពេលកីឡាករប្រេស៊ីល Jhonata Sant''anna Da Silva ទើបតែបញ្ចប់កុងត្រាមុនពេលកំណត់ ជាមួយភ្នំពេញក្រោនដោយបញ្ហារបួសធ្ងន់ធ្ងរនោះ។
ចំណែកក្រុមវិសាខាដែលទើបធ្លាក់មកឈរនៅលេខ ៦ ត្រូវបានគេមើលឃើញថាអាចនឹងយកឈ្នះក្រុមខេត្តកំពង់ចាមច្រើនគ្រាប់ ដើម្បីយកប្រៀបលើក្រុមមាន ១០ ពិន្ទស្មើគ្នាវិញគឺក្រសួងការពារជាតិ (ទ័ព) និងបឹងកេតដែលកំពុងឈរនៅលេខ ៤ និង លេខ ៥ ប៉ុន្តែបឹងកេតក៏អាចនឹងរកបានគ្រាប់បាល់ច្រើនដែរ ព្រោះពួកគេត្រូវប៉ះក្រុមសាលាកីឡាបាល់ទាត់ជាតិបាទី៕
កម្មវិធីប្រកួតនៅថ្ងៃសៅរ៍
-វិសាខា v ខេត្តកំពង់ចាម កីឡដ្ឋានវិសាខា ៦:០០
-សូលទីឡូអង្គរ v ទ័ព កីឡដ្ឋានខេត្តសៀមរាប ៣:៣០
-ប៉ូលិស v គិរីវង់ នៅកីឡដ្ឋាន-អគ្គិសនីកម្ពុជា ៣:៣០
៤ ប្រកួត នៅថ្ងៃអាទិត្យ
-អាស៊ីអឺរ៉ុប v អគ្គិសនីកម្ពុជានៅកីឡដ្ឋានអគ្គិសនីកម្ពុជា ម៉ោង ៣:៣០
-ណាហ្គាវើល v ភ្នំពេញក្រោន កីឡដ្ឋានស្តាតចាស់ ៦:០០
-ព្រះខ័នរាជស្វាយរៀង v អង្គរថាយហ្គឺរ កីឡដ្ឋានស្វាយរៀង ម៉ោង ៦:០០
-សាលាកីឡាបាល់ទាត់ជាតិ v បឹងកេត នៅសាលាកីឡាបាល់ទាត់ជាតិបាទី ៣:៣០
