.jpg)
Chan Sung-jung (ឆ្វេង) របស់កូរ៉េខាងត្បូង វាយទៅលើគូប្រកួតរបស់ខ្លួន។ AFP
ក្រុងសេអ៊ូល: កីឡាករសិល្បៈក្បាច់គុនចម្រុះ (MMA) ដ៏ឆ្នើមបំផុតរបស់ទ្វីបអាស៊ី បានបញ្ជាក់ថា អ្នកប្រយុទ្ធទាំងអស់ត្រូវតែចាំថា ពួកគេគឺជានិមិត្តរូបសម្រាប់ក្មេងៗ ខណៈដែលរូបគេបានរិះគន់ទៅលើទិដ្ឋភាព «ដ៏គួរឲ្យតក់ស្លុត» កាលពីសប្តាហ៍មុន ក្រោយពីការរងបរាជ័យរបស់កីឡាករ Conor McGregor ក្រោមស្នាដៃកីឡាករ Khabib Nurmagomedov។
កីឡាករ Chan Sung-jung ដែលមានរហស្សនាមថា The Korean Zombie បាននិយាយបន្ទាប់ពីអំពើហិង្សា ក្រោយការប្រកួត នៅពេលដែលកីឡាករ Nurmagomedov និងក្រុមរបស់គេបានវាយប្រហារទៅលើកីឡាករ McGregor និងក្រុមលើកទឹកចិត្តរបស់គេ ក្នុងទិដ្ឋភាពមួយដែលត្រូវបានឃើញទូទាំងពិភពលោកថា បានបង្កើតឲ្យមានដំណើរវិលត្រឡប់ថយក្រោយចំពោះការព្យាយាមសម្អាតកេរិ៍្តឈ្មោះរបស់កីឡា MMA។
នៅមុនពេលការប្រកួតក្នុងព្រឹត្តិការណ៍ Angel''s Fighting MMA នៅសប្តាហ៍នេះ ក្នុងទីក្រុងសេអ៊ូល ដែលរាល់ប្រាក់ចំណេញទាំងអស់នឹងត្រូវចំណាយទៅលើសម្ភារសុខាភិបាលសម្រាប់ក្មេងៗមាន ជំងឺធ្ងន់ធ្ងរ តារាក្បាច់គុនចម្រុះក្នុងទម្ងន់ ៦១,២ គីឡូក្រាម ដែលមានមូលដ្ឋានក្នុងទីក្រុងសេអ៊ូលរូបនេះបានឲ្យដឹងថា៖ «យើងគួរតែក្លាយជាគំរូរបស់ក្មេងៗ ហើយមិនមែនធ្វើឲ្យពួកគេតក់ស្លុតឡើយ»។
Chan ដែលកំពុងស្ថិតក្នុងចំណាត់ថ្នាក់លេខ ១០ នៅលើតារាងពិភពលោករបស់ UFC ក្នុងប្រភេទទម្ងន់របស់គេនោះ បានបន្ថែមទៀតថា៖ «ក្នុងនាមជាអ្នកប្រយុទ្ធក្បាច់គុនចម្រុះ យើងដើរតួនាទីធ្វើជាគំរូផ្សេង។ ការបង្ហាញពីភាពខ្លាំងក្នុងការប្រកួតគឺជារឿងដែលអាចយល់បាន ប៉ុន្តែ អំពើហិង្សានៅខាងក្រៅសង្វៀនដាក់ទ្រុង គឺជារឿងមិនអាចទទួលយកបាន។ យើងទាំងអស់គ្នាសុទ្ធសឹងជាមនុស្សពេញវ័យ និងគួរតែចងចាំពីផលប៉ះពាល់ដែលយើងធ្វើលើក្មេង»។
Chan បានបញ្ចេញមតិរិះគន់នៅឯក្លិប Korean Zombie Gym របស់គេក្នុងទីក្រុងសេអ៊ូល ខណៈដែលរូបគេត្រៀមធ្វើដំណើរទៅធ្វើការប្រកួតបន្ទាប់របស់គេ ជាមួយនឹងអតីតម្ចាស់ខ្សែក្រវាត់ UFC និងជាកីឡាករមានចំណាត់ថ្នាក់លេខ ៣ ក្នុងកម្រិតទម្ងន់របស់គេគឺ Frankie "The Answer" Edgar។
ការប្រកួតនេះ នឹងត្រូវរៀបចំឡើងដើម្បីអបអរខួបនៃកម្មវិធីប្រកួតលើកទី ២៥ របស់ UFC ក្នុងទីក្រុង Denver នាថ្ងៃទី ១០ ខែវិច្ឆិកា ក៏ដូចជាបង្ហាញពីភាពជោគជ័យក្នុងអាជីពរបស់ Chan និងការពង្រីកខ្លួនរបស់កីឡានេះទូទាំងពិភពលោក។
ប្រសិនបើរូបគេអាចស្វែងរកឃើញវិធីសាស្ត្រក្នុងការផ្តួលកីឡាករជើងចាស់របស់អាមេរិក Edgar អ្នកប្រយុទ្ធរបស់កូរ៉េខាងត្បូងរូបនេះ ត្រូវបានរំពឹងទុកថា នឹងទទួលបានឱកាសឡើងប្រកួតដណ្តើមខ្សែក្រវាត់ទម្ងន់ ៦១,២ គីឡូក្រាមជាលើកទី ២ និងឱកាសក្នុងការក្លាយជាម្ចាស់ខ្សែក្រវាត់ពិភពលោកមកពីទ្វីបអាស៊ីដំបូងគេរបស់ អង្គភាព UFC។
Chan បានបន្ថែមទៀតថា៖ «អ្នកប្រយុទ្ធជាច្រើន កំពុងតែបង្ហាញខ្លួនមកពីទូទាំងអាស៊ី និងមកពីកូរ៉េខាងត្បូង។ កេរិ៍្តឈ្មោះរបស់កីឡានេះ បានឈានទៅរកភាពល្អប្រសើរ ហើយវាអាស្រ័យទៅលើយើងដែលជាអ្នកសិល្បៈក្បាច់គុន ក្នុងការធ្វើឲ្យដំណើរនេះបន្តទៅទៀត»៕
