.jpg)
កីឡាករ កូយ ឡាយ (ឆ្វេង) និង ព្រឿង សុជាតិ ប្រកួតដណ្តើមពានវគ្គផ្តាច់ព្រ័ត្រ នៅថ្ងៃសៅរ៍។ ឈន ណន
ភ្នំពេញ៖ ព្រឹត្តិការណ៍ប្រដាល់គុនខ្មែរ TV5 Boxing Knock-Out Serie បានឈានដល់វគ្គផ្តាច់ព្រ័ត្រហើយ ដែលនឹងត្រូវធ្វើនៅសង្វៀនប៉ុស្តិ៍លេខ ៥ ព្រែកកំពឹស ថ្ងៃសៅរ៍នេះ ដោយក្នុងនោះ អ្នកប្រដាល់ ព្រឿង សុជាតិ ក្លិបកងពលធំអន្តរាគមន៍លេខ ២ ត្រូវជួប កូយ ឡាយ ក្លិបទ័ពឆត្រយោង ៩១១ ដណ្តើមយកលេខ ១ អមដោយទឹកប្រាក់ ៤ ០០០ ដុល្លារ ហើយ សូត្រ ខេវិន របស់ក្លិបបក្សីស្លាបដែក ត្រូវប្រកួតដណ្តើមយកលេខ ៣ ជាមួយ ទូច ដេវីដ របស់ក្លិបអារុណរះកីឡាខេត្តកណ្តាល។
សម្រាប់ការប្រកួតជម្រុះទាំង ៤ ជុំ កន្លងមកនេះ ព្រឿង សុជាតិ បានឈ្នះ លីន វីរៈ ដោយពិន្ទុ រួចបន្តផ្ដួល ភួង ពិសិដ្ឋ នៅទឹកទី ២ និងឈ្នះ លាប រដ្ឋា ដោយពិន្ទុទាំងត្រដាបត្រដួស នៅជុំទី ៣ ហើយនៅវគ្គពាក់កណ្ដាលផ្ដាច់ព្រ័ត្រ រូបគេបានឈ្នះ សូត្រ ខេវិន។ ចំណែក កូយ ឡាយ បានឈ្នះ កំពែង ខ្មៅ ដោយពិន្ទុ រួចបន្តឈ្នះលើ រឿន ឈី និង ស៊ន រ៉ាគីម ដែលអវត្តមានដោយស្វ័យប្រវត្តិដូចគ្នា ខណៈវគ្គ ១/២ ផ្ដាច់ព្រ័ត្រ កូយ ឡាយ បានឈ្នះ ទូច ដេវីដ ដោយពិន្ទុ។
តាមរយៈការប្រកួតកន្លងមកនេះ គឺបេក្ខជនដណ្តើមយកលេខ ១ កូយ ឡាយ និង ព្រឿង សុជាតិ ត្រូវបានគេមើលឃើញថា មានសមត្ថភាពប្រហាក់ប្រហែលគ្នា និងជាកីឡាករខ្លាំងជំនាន់ក្រោយ ក្នុងទម្ងន់ ៦០ គីឡូក្រាមដូចគ្នា។
លោក ធន់ សុភា គ្រូបង្វឹក ព្រឿង សុជាតិ បាននិយាយថា៖ «ខ្ញុំមានទំនុកចិត្តឈ្នះ ៧០ ភាគរយ ដោយយើងនឹងប្រើស្នៀតវាយសម្រុកកណ្តាប់ដៃ និងជង្គង់ ហើយតាមរយៈការហ្វឹកហាត់ជាប្រចាំខ្ញុំគិតថា ព្រឿង សុជាតិ ពិតជាឈ្នះ ប៉ុន្តែវាមានស្វិតស្វាញ និងតឹងតែងបំផុត»។
បើនិយាយពីបទពិសោធវិញ ព្រឿង សុជាតិ ចាស់វស្សាជាង ដោយប្រកួតបាន ៤៩ ដង ចាញ់តែ ៩ ដងប៉ុណ្ណោះ ចំណែក កូយ ឡាយ ក៏មានសមត្ថភាពលំដាប់គ្នានេះដែរ ហេតុនេះការចាញ់ ឬឈ្នះ គឺលំបាកទស្សន៍ទាយបំផុត ព្រោះទឹកចិត្តប្រកួត និងការហ្វឹកហាត់ គឺត្រៀមបានល្អដូចគ្នា។
ចំណែកលោក សួន ប៊ុនសូត្រ ដែលជាគ្រូបង្វឹក សូត្រ ខេវិន បានប្រាប់ថា ខេវិន ប្តេជ្ញាវ៉ៃយកលេខ ៣ ឲ្យបាន ព្រោះហ្វឹកហាត់ត្រៀមបានល្អ។ លោកបន្ថែមថា៖ «យុទ្ធសាស្ត្រសម្រាប់ឈ្នះ ដេវិដ គឺបិទតែកណ្តាប់ដៃឲ្យជាប់ ហើយឱបឡើងជង្គង់ គឺមានប្រៀបឈ្នះដាច់តែម្តង ដោយយើងមានទំនុកចិត្តឈ្នះ ៧០ ភាគរយឯណោះ ខណៈការប្រកួតបានដាក់លក្ខខណ្ឌឲ្យវាយសម្រុកគ្នាតែ ៣ ទឹក ហើយគ្មានទុកឱកាសឲ្យស្ទាបស្ទង់នោះឡើយ»។
គួររំឭកថា សូត្រ ខេវិន បានឈ្នះ ថន ភឿត ដោយពិន្ទុនៅជុំទី ១ រួចបន្តឈ្នះ ចិត្រ ភក្តី ដោយពិន្ទុ និងផ្តួល រ៉ែម រាជ ឲ្យសន្លប់នៅទឹកទី ៣ មុនពេលរូបគេមកចាញ់ ព្រឿង សុជាតិ ក្នុងវគ្គ ១/២ ផ្តាច់ព្រ័ត្រ។ ចំណែក ទូច ដេវីដ បានឈ្នះ កុយ ចាន់តូ ដោយពិន្ទុ ឈ្នះ ទិត្យ សុវណ្ណគីរី ដែលអវត្តមាន និងឈ្នះជើងខ្លាំង ឡុង ជិន ដោយពិន្ទុនៅជុំទី ៣។
ចំណែកការប្រកួតមិត្តភាពអន្តរជាតិវិញ អ្នកប្រដាល់កម្ពុជា អ៊ូច ធារិទ្ធ ក្លិបអាណាចក្រគុនខ្មែរខេត្តសៀមរាប ត្រូវជួបថៃ Chhreunlap Sit VireakChhat។ មួយរយៈនេះ ធារិទ្ធ ជាអ្នកប្រដាល់មួយរូបដែលមានស្នៀតវ៉ៃបានល្អ ឯអ្នកប្រដាល់ថៃ ទើបតែឆ្លងដែនមកប្រកួតនៅស្រុកខ្មែរជាលើកដំបូងនេះទេ មិនដឹងថាមានសមត្ថភាពប៉ុនណានោះទេ៕
