.jpg)
លោក Felix (ទី ២ ពីឆ្វេង) និងលោក Strichko ពេលថតជុំគ្នា ក្នុងសន្និសីទកាសែត។ រូបថត NOCC
ភ្នំពេញ៖ គ្រូបង្វឹកក្រុមជម្រើសជាតិកម្ពុជា លោក Felix Dalmas នៅតែប្រកាន់គោលជំហរ រក្សាទស្សនៈបាល់ទាត់របស់លោក គឺការមិនលេង «បែបការពារ» បើទោះបីជាលោកដឹងថា ជម្រើសជាតិអ៊ីរ៉ាក់ គឺជាក្រុមខ្លាំង ដែលមានប្រៀបលើកម្ពុជាទាំងបច្ចេកទេស និងកម្រិតនៃការលេង និងកាយសម្បទាក៏ដោយ។ បន្ថែមលើនេះគ្រូបង្វឹកអ៊ីរ៉ាក់បានអះអាងថា ការជួបគ្នានៅកីឡដ្ឋានជាតិនាល្ងាចម៉ោង ៦:៣០ ថ្ងៃអង្គារនេះ លោកត្រូវដណ្តើមយក ៣ ពិន្ទុ ឲ្យបាន។
លោក Felix បានមើលឃើញថា សមត្ថភាពលេងរបស់កីឡាករក្រុមអ៊ីរ៉ាក់ ពិសេសខ្សែប្រយុទ្ធរបស់ក្រុមនេះ ដែលភាគច្រើនជាអ្នកប្រកបអាជីពនៅលីកកំពូលនៅអឺរ៉ុបនោះ វាអាចនឹងធ្វើឲ្យក្រុមកម្ពុជាទទួលបានលទ្ធផលដ៏ជូរចត់ម្តងទៀត ដូចពេលដែលពួកគេបានចាញ់ក្រុមម្ចាស់ផ្ទះអ៊ីរ៉ង់ ១៤-០ កាលពីយប់ថ្ងៃព្រហស្បតិ៍ ប៉ុន្តែលោក Felix បានបញ្ជាក់ថា កម្ពុជាអាចនឹងចាញ់ច្រើនជាងនេះ បើយើងលេងអង្គុយចាំតែការពារក្រុមអ៊ីរ៉ាក់។
លោក Felix Dalmas បាននិយាយនៅក្នុងសន្និសីទកាសែតកាលពីថ្ងៃចន្ទថា៖ «ការប្រកួតជាមួយក្រុមអ៊ីរ៉ាក់លើកនេះ គឺវាមានភាពខុសប្លែកគ្នា ពីការប្រកួតជាមួយក្រុមហុងកុង បារ៉ែន និងក្រុមប៉ាគីស្ថាន ដែលយើងធ្លាប់បានជួប ព្រោះអ៊ីរ៉ាក់ជាក្រុមខ្លាំង ដែលធ្លាប់ស្មើក្រុមអេស្ប៉ាញ និងបានចាញ់ក្រុមអាហ្សង់ទីន ត្រឹម ១-០ ប៉ុណ្ណោះ ហើយជម្រើស ១១ នាក់ដំបូងរបស់ពួកគេ ពិសេសខ្សែប្រយុទ្ធ គឺភាគច្រើនលេងនៅលីកកំពូលអឺរ៉ុប ដែលមានបទពិសោធ និងមានកម្រិតលេងខ្លាំង»។
គ្រូបង្វឹកជនជាតិអាហ្សង់ទីនរូបនេះបានបញ្ជាក់ថា៖ «យើងនឹងព្យាយាមបន្តដំណើរទៅមុខទៀត ព្រោះនេះជាឱកាស ដែលពួកយើងនៅតែក្រោកឡើង ដើម្បីប្រកួតប្រជែងឆ្ពោះទៅមុខទៀត ព្រោះបើសិនជាយើងអង្គុយចាំតែការពារ ប្រហែលជាយើងនឹងចាញ់ទ្វេដង ហើយការលេងបែបការពារ វាមិនមែនជាវិធីសាស្រ្តល្អ នៅពេលអនាគតនោះទេ ហេតុនេះយើងត្រូវតែយកទេពកោសល្យ សមត្ថភាព និងអ្វីដែលកីឡាកររបស់យើងមាន យកមកបញ្ចេញនៅលើទីលាន ដើម្បីឲ្យពួកគេមានការអភិវឌ្ឍបន្ថែមទៀត»។
លោក Felix បានបញ្ជាក់ថា៖ «ទាំងការប្រកួតមុន និងការប្រកួតនេះ គឺទម្រង់លេងយុទ្ធសាស្រ្ត និងទស្សនៈបាល់ទាត់របស់យើង នៅដដែល ហើយយើងបានពន្យល់ពីមូលហេតុរបស់យើង ថាហេតុអ្វីយើងលេងរបៀបនេះ (មិនលេងការពារ) ព្រោះយើងចង់ឲ្យក្រុមយើងមានការអភិវឌ្ឍទៅមុខទៀត ហើយដើម្បីឲ្យមានការអភិវឌ្ឍ យើងត្រូវតែហ៊ានប្រកួតប្រជែងជាមួយគេ»។
ចំណែកលោក Strichko Katanetch គ្រូបង្វឹកក្រុមអ៊ីរ៉ាក់បានថ្លែង ក្នុងសន្និសីទនោះដែរថា៖ «ក្រុមរបស់យើងបានត្រៀមខ្លួនរួចរាល់អស់ហើយ គឺអ្វីគ្រប់យ៉ាងគ្មានបញ្ហានោះទេ ហើយខ្ញុំតែងតែរំឭកទៅដល់កូនក្រុមរបស់ខ្ញុំ ឲ្យយកចិត្តទុកដាក់ និងខំប្រឹងមិនត្រឹមតែ ១០០ ភាគរយទេ គឺរហូតដល់ ១២០ ភាគរយ ព្រោះនៅក្នុងបាល់ទាត់អ្វីៗក៏អាចកើតមានឡើងដែរ»។
លោកបានបន្ថែមថា៖ «ខ្ញុំមិនបានបំភ័យទៅដល់កីឡាកររបស់យើងទេ ប៉ុន្តែការក្រើនរំឭកនេះ វាកាន់តែធ្វើឲ្យពួកគេ មានការយកចិត្តទុកដាក់ និងប្រមូលអារម្មណ៍ក្នុងការប្រកួត ហើយលើកនេះ យើងលេងនៅលើស្មៅសិប្បនិម្មិត ខុសពីស្មៅធម្មជាតិ អ៊ីចឹងបើសិនជាយើងចង់ឆ្លងផុតវគ្គជម្រុះជុំទី ២ នេះ យើងត្រូវតែខំប្រឹងឲ្យអស់ពីសមត្ថភាព ដើម្បីទទួលបានជ័យជម្នះលើកនេះ គឺយើងត្រូវការឈ្នះ ដើម្បីឆ្លងទៅវគ្គបន្ត»៕
