ភ្នំពេញៈ ក្រុមក្រសួងការពារជាតិ (ទ័ព) បានត្រៀមរួចជាស្រេចក្នុងការបញ្ចប់ក្តីរំពឹងរបស់ក្រុមអាស៊ីអឺរ៉ុប បើទោះបីជាក្រុមមួយនេះគ្រោងលេងប្តូររកគ្រាប់បាល់ជាមួយទ័ពដើម្បីកែប្រែលទ្ធផលឲ្យបានប្រសើរវិញនាជំនួបកាត់សេចក្តីជើងទី ២ វគ្គជម្រុះ ១៦ ក្រុមនៃពានរង្វាន់សម្តេច ហ៊ុន សែន លើកទី ១៣ ឆ្នាំ ២០១៩ នៅថ្ងៃពុធនេះក៏ដោយ រីឯក្រុមសូលទីឡូអង្គរ ក៏នឹងត្រូវទម្លាក់ក្រុមខេត្តរតនគិរីនៅថ្ងៃនេះផងដែរ ដើម្បីឡើងទៅវគ្គ ៨ ក្រុមចុងក្រោយ។
សម្រាប់ការប្រកួតដែលនឹងត្រូវធ្វើនៅកីឡដ្ឋានស្តាតចាស់នាល្ងាចម៉ោង ៦ ថ្ងៃពុធនេះលោក សុក វាសនា គ្រូបង្វឹកក្រុមអាស៊ីអឺរ៉ុបបានកំណត់យ៉ាងច្បាស់ថា ក្រុមរបស់លោកនឹងប្រើការប្រកួត ៩០ នាទីក្នុងជើងទី ២ នេះ ដើម្បីប្តូររកគ្រាប់បាល់ក្នុងការកែប្រែលទ្ធផលចាញ់ក្រុមទ័ព ៣-១ កាលជើងទី ១ នៅលើទឹកដីខ្លួនកាលពីថ្ងៃទី ៣ ខែកក្កដា។
លោក សុក វាសនា បានប្រាប់ភ្នំពេញប៉ុស្តិ៍កាលពីថ្ងៃអង្គារថា៖ «យើងបានគ្រប់គ្រងបាល់ច្រើនជាងគេកាលប្រកួតជើងទី ១ តែការសម្រេចទីរបស់យើងមិនបានល្អ ខណៈការវាយបករបស់គេមានប្រសិទ្ធភាពជាងយើង ហើយការជួបគ្នាលើកនេះ យើងក៏មានផលលំបាកដែរ ដោយសារកីឡាករមួយចំនួនជាប់ធ្វើការ មិនបានហាត់ជុំគ្នា ប៉ុន្តែយើងនឹងប្រឹងប្រែងឲ្យអស់ពីសមត្ថភាព ព្រោះបើយើងរកបាន ២ គ្រាប់គឺយើងអាចនឹងថែមម៉ោងបានហើយ»។
គ្រូបង្វឹករូបនេះបានបញ្ជាក់ថា៖ «យើងនៅមិនទាន់អស់សង្ឃឹមទេ ព្រោះយើងនៅសល់ ៩០ នាទីពេញ ហើយលើកនេះយើងត្រូវតែប្តូរដើម្បីរកគ្រាប់បាល់គឺគ្មានការលេងទប់អីទៀតនោះទេ ព្រោះយើងបានចាញ់គេ ៣-១ ក្នុងជើងទី ១ រួចទៅហើយ ហេតុនេះយើងលែងគិតពីលទ្ធផលចាញ់ហើយគឺសំខាន់ត្រូវវាយលុករកគ្រាប់ តែបើភ្លាត់ស្នៀតក៏ទៅតាមនោះចុះ»។
យ៉ាងណាក៏ដោយលោក ទេព ឡុងរចនា អ្នកចាត់ការទូទៅក្រុមក្រសួងការពារជាតិមានការជឿជាក់ថាក្រុមរបស់លោកនឹងមិនបណ្តោយឲ្យភាពសោកស្តាយកើតមាននោះឡើយ។ លោកបានប្រាប់កាលពីថ្ងៃអង្គារថា៖ «ជាធម្មតា គេត្រូវតែលេងវាយលុកមកលើយើងហើយ ព្រោះគេចង់ឈ្នះ ហើយយើងចង់ឈ្នះដូចគ្នា តែសំខាន់នោះ វាអាស្រ័យទៅលើបច្ចេកទេស និងធនធានកីឡាករ ហេតុនេះយើងត្រូវរៀបចំឲ្យបានល្អគឺយ៉ាងហោចណាស់ក៏យើងយកត្រឹមស្មើដែរ ព្រោះធនធានកីឡាករយើងលើក្រុមគេ»។
លោក ឡុងរចនា ដែលនឹងដឹកនាំក្រុមទ័ពដោយផ្ទាល់នោះបានបញ្ជាក់ថា៖ «យើងត្រូវតែពង្រឹងតំបន់ការពារឲ្យបានរឹងមាំជាងមុន ព្រោះមហិច្ឆតារបស់យើង មិនត្រឹមតែយកឈ្នះក្រុមអាស៊ីអឺរ៉ុបប៉ុណ្ណោះទេ ប៉ុន្តែយើងត្រូវផ្តោតឲ្យបានខ្លាំងបំផុត ដើម្បីឆ្ពោះទៅរកការឈ្នះបន្តទៀត ព្រោះការប្រជែងយកពាននៅលីកកំពូលកម្ពុជានៅឆ្នាំនេះ យើងអាចនឹងលែងមានឱកាសទៀតហើយ»។
ចំណែកក្រុមរតនគិរីបានយកកីឡដ្ឋានអាស៊ីអឺរ៉ុបស្ពតផាក ដើម្បីស្វាគមន៍ក្រុមសូលទីឡូអង្គរ នៅរសៀលម៉ោង ៣:៣០ ថ្ងៃពុធនេះដែរ ប៉ុន្តែការប្រកួតជើងទី ២ រវាងក្រុមទាំង ២ នេះវាហាក់គ្រាន់តែជាការប្រកួតបង្គ្រប់កិច្ច ព្រោះការយកឈ្នះ ១០-១ ក្នុងជើងទី ១ របស់សូលទីឡូអង្គរ វាបានជួយឲ្យក្រុមមានមូលដ្ឋាននៅខេត្តសៀមរាបមួយនេះអាចឡើងទៅវគ្គ ៨ ក្រុមចុងក្រោយរួចស្រេចទៅហើយ ព្រោះក្រុមខេត្តរតនគិរីមិនអាចមានលទ្ធភាពកែប្រែលទ្ធផលនេះបានឡើយ៕