.jpg)
ខ្សែប្រយុទ្ធ Bata រកបាន១គ្រាប់ ដើម្បីជួយឲ្យក្រុមសូលទីឡូអង្គរ សម្រេចការសងសឹកលើក្រុមអាស៊ីអឺរ៉ុប សម្រាប់ការវិលមកជួបគ្នា ក្នុងជើងទី២ កាលពីថ្ងៃអាទិត្យ។ ស្រេង ម៉េងស្រ៊ុន
ភ្នំពេញៈ ក្រុមក្រសួងការពារជាតិ (ទ័ព) បានធ្វើការវាយបកយកឈ្នះក្រុមភ្នំពេញក្រោន ដើម្បីសម្រេចការសងសឹកដ៏គួរឲ្យភ្ញាក់ផ្អើល ឯក្រុមវិសាខា ក៏រកបាន ៣ ពិន្ទុបន្ថែមផងដែរ ប៉ុន្តែក្រុមអាស៊ីអឺរ៉ុប បានជួបការខកចិត្តក្រោមថ្វីជើងរបស់ក្រុមចំណូលថ្មី សូលទីឡូអង្គរ វិញម្តង សម្រាប់ការប្រកួតជើងទី ២ លីកកំពូលកម្ពុជា ឆ្នាំ ២០១៨ កាលពីម្សិលមិញ។
បើទោះបីជាការប្រកួតជើងទី ២ នេះ ត្រូវធ្វើឡើងនៅលើទឹកដីក្រុមភ្នំពេញក្រោន គឺក្នុងកីឡដ្ឋាន RSN ប៉ុន្តែក្រុមទ័ព បានធ្វើឲ្យអ្នកគាំទ្រក្រុមភ្នំពេញក្រោន បែរជាមានអារម្មណ៍ក្តៅគគុក នៅក្រោមតំណក់ទឹកភ្លៀងទៅវិញ ខណៈពួកគេបានវាយបកយកឈ្នះក្រុមភ្នំពេញក្រោន ៥-១ ដើម្បីលុបចោលនូវភាពហ្មងសៅចំពោះការចាញ់ ២-០ កាលជើងទី ១ នោះ។
កីឡាករ Valci Junnior របស់ភ្នំពេញក្រោន បានស៊ុតទម្លុះសំណាញទីក្រុមទ័ព បានមុន នៅនាទីទី ២៩ ប៉ុន្តែឈានចូលតង់ទី ២ ក្រុមទ័ព បានកែប្រែស្ថានភាពប្រកួតបានយ៉ាងល្អ និងរកបានរហូតដល់ ៥ គ្រាប់ ដោយក្នុងនោះកីឡាករជប៉ុន Yudai Ogawa និងខ្សែប្រយុទ្ធកូរ៉េខាងត្បូង Na Hyosung សុទ្ធតែរកបាន ២ គ្រាប់ដូចគ្នា ហើយ ១ គ្រាប់ទៀត រកបានដោយកីឡាករកូរ៉េខាងត្បូង Yoo Jae Ho នៅនាទីទី ៨០។
ខ្សែប្រយុទ្ធកូរ៉េខាងត្បូង Na Hyosung របស់ក្រុមទ័ព បានព្យាយាមគ្រប់គ្រងបាល់ពីការរារាំងរបស់ក្រុមភ្នំពេញក្រោន ហើយរូបគេរកបាន២គ្រាប់ ដើម្បីជួយឲ្យទ័ព ឈ្នះ ភ្នំពេញក្រោន ៥-១។ រូបថត ភ្នំពេញក្រោន
ការយកឈ្នះក្រុមភ្នំពេញក្រោន ៥-១ ក្នុងការប្រកួតជើងទី ២ នេះ វាបានបង្ហាញឲ្យឃើញពីភាពមុតស្រួចរបស់ក្រុមទ័ព សម្រាប់ការប្រកួតជើងទី ២ នេះ ហើយលទ្ធផលនេះគឺស្របទៅតាមក្តីសង្ឃឹមរបស់លោក ភា សុភ័ក្ត្រា គ្រូបង្វឹកក្រុមទ័ព ដែលលោកបានអះអាងតាំងពីមុនប្រកួតថា ការលេងរបស់ក្រុមទ័ព មានភាពស៊ីចង្វាក់គ្នា ហើយគុណភាពតំបន់ប្រយុទ្ធក៏ល្អជាងមុន ធ្វើឲ្យលោកមានសង្ឃឹមខ្ពស់ ក្នុងការយកឈ្នះក្រុមភ្នំពេញក្រោន។
ផ្ទុយពីនេះក្រុមអាស៊ីអឺរ៉ុប មិនអាចដណ្តើមបាន ៣ ពិន្ទុពីក្រុមសូលទីឡូអង្គរ ដូចការប្រកួតជើងទី ១ ដែលពួកគេបានយកឈ្នះ ២-១ នោះទេ។ សម្រាប់ការប្រកួតនៅ AEU Sport Park កាលពីល្ងាចថ្ងៃអាទិត្យនោះ អាស៊ីអឺរ៉ុប បានចាញ់ក្រុមសូលទីឡូអង្គរ ១-០ ហើយគ្រាប់បាល់ជ័យជម្នះនេះរកបានដោយខ្សែប្រយុទ្ធ Bata នៅនាទីទី ៤៣។
ចំណែកខ្សែប្រយុទ្ធ កែវ សុខផេង និង ទិត្យ ឌីណា បានរួមគ្នាជួយក្លិបថ្មីរបស់គេ គឺវិសាខា ឲ្យបន្តយកឈ្នះក្រុមអង្គរថាយហ្គឺរ ៤-១ បន្ថែមទៅលើការឈ្នះ ២-០ កាលពីប្រកួតជើងទី ១។ សុខផេង និង ឌីណា សុទ្ធតែរកបានម្នាក់ ២គ្រាប់ ដើម្បីជួយឲ្យក្រុមវិសាខា ទទួលបាន ៣ ពិន្ទុលើកនេះ ឯ ១ គ្រាប់របស់ក្រុមអង្គរថាយហ្គឺរ រកបានដោយកីឡាករជប៉ុន Okamoto នៅនាទីទី ៦១។
យោងតាមលទ្ធផល នៃការប្រកួតប្រចាំសប្តាហ៍ទី ១៣ នេះ គឺក្រុមបឹងកេត នៅតែបន្តឈរនៅលេខ ១ ដោយមាន ៣៣ ពិន្ទុ ក្រោយបន្តឈ្នះក្រុមវេស្ទើន ៥-១ ហើយក្រុមណាហ្គាវើល បន្តឈរនៅលេខ ២ មាន ៣១ ពិន្ទុ ក្រោយឈ្នះក្រុមអគ្គិសនីកម្ពុជា ២-០។ រីឯក្រុមវិសាខា បន្តឈរនៅលេខ ៣ មាន ២៩ ពិន្ទុ ហើយក្រុមក្រសួងការពារជាតិ បន្តឈរនៅលេខ ៤ ដែរ ដោយមាន ២៧ ពិន្ទុ។
ចំណែកក្រុមភ្នំពេញក្រោន បន្តឈរនៅលេខ ៥ មាន ២១ ពិន្ទុ លើក្រុមប៉ូលិស ដែរឈរនៅលេខ ៦ មាន ២០ ពិន្ទុ ឯក្រុមអាស៊ីអឺរ៉ុប មាន ១៨ ពិន្ទុ ក្រុមព្រះខ័នរាជស្វាយរៀង មាន ១៧ ពិន្ទុ ខណៈក្រុមសូលទីឡូអង្គរ មាន ១១ ពិន្ទុស្មើជាមួយក្រុមអង្គរថាយហ្គឺរ ក្រុមអគ្គិសនីកម្ពុជា មាន ៥ ពិន្ទុដដែល ប៉ុន្តែក្រុមវេស្ទើន បន្តឈរនៅបាតតារាង ដោយចាញ់ទាំង ១៣ ប្រកួត៕
