ភ្នំពេញ៖ អ្នកជំនាញគណនេយ្យហិរញ្ញវត្ថុ មកពីសហរដ្ឋអាមេរិក លោក Casey Barnett ដែលជានាយកវិទ្យាស្ថានខេមអេដ បានចាត់ទុកការទទួលបានជោគជ័យក្នុងសកម្មភាពកីឡា តាមរយៈការខិតខំប្រឹងប្រែងប្រកួតប្រជែងយ៉ាងអំណត់នៅលើទីលានថា ជាមេរៀនដ៏មានតម្លៃ ដើម្បីជួយឲ្យយើងមានភាពជោគជ័យក្នុងជីវិត។
លោក Casey បានថ្លែងថា៖ «ហេតុអ្វីបានជាខ្ញុំរៀបចំឲ្យ មានការប្រកួតកីឡាសម្រាប់ក្រុមនិស្សិតរបស់យើង ព្រោះភាពជោគជ័យក្នុងកីឡា វាបានបង្រៀនឲ្យយើងទទួលបានជោគជ័យក្នុងជីវិតផងដែរ ព្រោះដើម្បីទទួលបានជោគជ័យនៅក្នុងការរកស៊ី ក៏ដូចជាធ្វើអាជីវកម្ម យើងត្រូវមានការប្រកួតប្រជែង មានភាពអំណត់ តស៊ូព្យាយាម ពិសេសយើងត្រូវចេះធ្វើការងារជាក្រុមឲ្យបានល្អ ហើយការលេងកីឡា និងប្រកួតកីឡា វាបានផ្តល់ចំណុចទាំងនេះដល់ជីវិតរបស់យើង បន្ថែមទៅលើចំណេះដឹង ដែលយើងទទួលបានពីការសិក្សា នៅក្នុងសាលា»។
ការលើកឡើងបែបនេះ របស់លោក Casey Barnett ត្រូវបានធ្វើឡើង នៅពេលលោកបានចូលរួមបិទការប្រកួតកីឡាបាល់បោះបុរសដណ្តើមពានរង្វាន់ខេមអេដ ឆ្នាំ ២០១៩ កាលពីថ្ងៃអាទិត្យ ខណៈព្រឹត្តិការណ៍នេះលោក Casey ធ្លាប់បានរៀបចំឲ្យមានឡើងច្រើនឆ្នាំមកហើយ ដើម្បីផ្តល់ឱកាសឲ្យនិស្សិតរបស់លោកបានលេងកីឡា ដើម្បីជ្រើសរើសបានអ្នកមានសមត្ថភាពសម្រាប់លេងតំណាងឲ្យសាលាខេមអេដ ក៏ដូចជាផ្តល់ឱកាសឲ្យអ្នកមានសមត្ថភាពលេចធ្លោ អាចទទួលបានឱកាសលេងតំណាងឲ្យប្រទេសជាតិ។
លោក Casey បានបន្តថា៖ «ការបង្កើតឲ្យមានការប្រកួតកីឡា នៅសាលារបស់យើង គឺយើងសង្ឃឹមថា វានឹងក្លាយជាគំរូទៅដល់សាកលវិទ្យាល័យផ្សេងៗ វិនិយោគទៅលើកីឡាក្នុងការបង្កើតឲ្យមានការប្រកួតកីឡា នៅតាមសាកលវិទ្យាល័យទូទាំងប្រទេស កម្ពុជា ព្រោះក្រុមកីឡាករនៅតាមសាកលវិទ្យាល័យអាចជាប្រភពក្នុងការស្វែងរកអ្នកមានសមត្ថភាព និងទេពកោសល្យល្អ ដើម្បីទៅលេងតំណាងឲ្យប្រទេសជាតិ។ ជាក់ស្តែងនៅក្នុងក្រុមបាល់បោះរបស់យើង គឺមានកីឡាករចំនួន ២ នាក់ បានចេញទៅលេងតំណាងឲ្យប្រទេស កម្ពុជា ក្នុងស៊ីហ្គេម នៅហ្វីលីលីពីនឆ្នាំនេះ»។
តាមរយៈការប្រកួតកីឡាបាល់បោះបុរសដណ្តើមពានរង្វាន់ខេមអេដ ឆ្នាំ ២០១៩ នេះ ក្រុម Zone បានយកឈ្នះក្រុម Yong Force ជាមួយពិន្ទុ ១៩-១៨ ដើម្បីក្លាយជាម្ចាស់ជើងឯក ហើយក្រុម Shade-Shadow បានយកឈ្នះក្រុម Viper Min Laor ១៦-១០ ដើម្បីទទួលបានលេខ ៣។
បុរសដែលតែងតែចូលរួមឧបត្ថម្ភដល់វិស័យកីឡា នៅក្នុងប្រទេស កម្ពុជា លោក Casey Barnett បានបន្ថែមថា៖ «ក្រុមបាល់បោះរបស់យើង ក៏ត្រៀមចូលលេងនៅក្នុងការប្រកួតកីឡាសាកលវិទ្យាល័យ ដែលរៀបចំដោយក្រសួងអប់រំ យុវជន និងកីឡា នៅក្នុងឆ្នាំ ២០២០ ផងដែរ ខណៈការចូលរួមប្រកួតរៀងរាល់ឆ្នាំ ក្រុមបាល់បោះបុរសរបស់យើងបានត្រឹមលេខ ២ ទៅលេខ ៣ ប៉ុន្តែនៅឆ្នាំនេះ យើងមើលឃើញថា បច្ចេកទេស និងគុណភាពកីឡាករយើង មានការកើនឡើងខ្លាំង អ៊ីចឹងយើងសង្ឃឹមថា យើងនឹងអាចប្រកួតប្រជែងដណ្តើមយកលេខ ១ ឬលេខ ២ បាន»៕