ភ្នំពេញៈ កីឡាករ កីឡាការិនី ជាសិស្សនិស្សិតមកពីគ្រឹះស្ថានចំនួន ២២ ក្នុងប្រទេសកម្ពុជា បានធ្វើដំណើរមកជួបគ្នា នៅវិមានពហុកីឡដ្ឋានជាតិ កាលពីថ្ងៃព្រហស្បតិ៍ម្សិលមិញ ដើម្បីចាប់ដំណើរការប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ប្រចាំឆ្នាំសិក្សា ២០១៧-២០១៨ ដែលគ្រោងបញ្ចប់នៅថ្ងៃទី ២៨ ខែកញ្ញា ខាងមុខនេះ។
លោក ស សុខា ដែលទើបចូលកាន់តួនាទីជារដ្ឋលេខាធិការក្រសួងអប់រំ យុវជន និងកីឡា លោក វ៉ាត់ ចំរើន អគ្គលេខាធិការ NOCC និងថ្នាក់ដឹកនាំកីឡា ព្រមទាំងប្រតិភូកីឡាតំណាងគ្រឹះស្ថានសិក្សាទាំង ២២ មានប្រតិភូ ១៤០ នាក់ (ស្រី ១១ នាក់) កីឡាករ ៤៥៨ នាក់ កីឡាការិនី ៨៣ នាក់ សរុប ៦៨១ នាក់ សុទ្ធតែបានចូលរួមក្នុងពិធីបើកការប្រកួតពីម្សិលមិញ។
លោក ស សុខា បានចាត់ទុកក្រុមអត្តពលិកជាសិស្សនិស្សិតទាំងនេះថា ជាពេជ្រមិនទាន់ច្នៃ ដែលត្រូវតែខំប្រឹងវិវឌ្ឍខ្លួន ដើម្បីក្លាយជាកីឡាអាជីព សម្រាប់ត្រៀមការប្រកួតស៊ីហ្គេម ឆ្នាំ ២០២៣ ដែលត្រូវធ្វើនៅកម្ពុជា។
លោក ស សុខា បានថ្លែងថា៖ «ប្អូនៗនៅទីនេះ អាចហៅថា ពេជ្រមិនទាន់ច្នៃ អ៊ីចឹងបើច្នៃហើយ អាចល្អ និងមានឱកាសមកអង្គុយ ហើយអាចនិយាយបានថា ល្អជាងពួកបងៗ និងលោកពូៗ នៅលើវេទិកានេះទៅទៀត។ អ៊ីចឹងនៅឆ្នាំ ២០២៣ ជាមោទនភាពណាស់ ដែលកម្ពុជាត្រូវធ្វើជាម្ចាស់ផ្ទះស៊ីហ្គេម។ ហេតុនេះសូមប្អូនៗខិតខំប្រឹងប្រែង ដើម្បីចូលរួមជួយដល់រដ្ឋាភិបាលរបស់យើង ហើយដើម្បីក្លាយជាកីឡាអាជីព យើងត្រូវហ៊ានលះបង់ និងការកសាងធនធានមនុស្ស»។
បន្ថែមលើនេះ លោក សុខា បានជំរុញឲ្យក្រុមអត្តពលិកជានិស្សិតទាំងនេះ ខំប្រឹងប្រកួតឲ្យអស់ពីសមត្ថភាព និងយកព្រឹត្តិការណ៍ប្រកួតនេះ ដើម្បីបង្កើតនូវចំណងសាមគ្គីភាព «ជាមហាគ្រួសារកីឡានៅកម្ពុជា» ហើយបានប្តេជ្ញាថា៖ «បើទោះបីជា ខ្ញុំទើបមកកាន់ជារដ្ឋលេខាធិការក្រសួងអប់រំ ប៉ុន្តែខ្ញុំនឹងប្រឹងប្រែងធ្វើយ៉ាងណាឲ្យកីឡាកម្ពុជា ទទួលបានមេដាយច្រើន ក្នុងការប្រកួតស៊ីហ្គេម នៅឆ្នាំ ២០២៣»។
គួរបញ្ជាក់ថា សម្រាប់ការប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ប្រចាំឆ្នាំនេះ មានការប្រកួតទៅលើប្រភេទកីឡាចំនួន ៦ ក្នុងនោះមានបាល់ទាត់ បាល់បោះ បាល់ទះ អត្តពលិក វាយកូនឃ្លីលើតុ និងប៉េតង់។
បើតាមរបាយការណ៍របស់គណៈកម្មការរៀបចំ បានឲ្យដឹងថា បាល់ទាត់បុរសមាន ១៣ ក្រុម បាល់ទះបុរសមាន ៤ ក្រុម បាល់បោះបុរសមាន ៥ ក្រុម បាល់បោះនារីមាន ៤ ក្រុម អត្តពលកម្មមាន ១៥ គ្រឹះស្ថានចូលរួម ប៉េតង់មាន ៦ គ្រឹះស្ថាន និងវាយកូនឃ្លីលើតុមាន ៨ គ្រឹះស្ថាន។
នៅក្នុងគ្រឹះស្ថានសិក្សាទាំង ២២ ដែលបានចូលរួមក្នុងការប្រកួតនេះ លោក ស សុខា បានចាប់អារម្មណ៍ទៅលើវិទ្យាស្ថានខេមអេដ ដែលគ្រប់គ្រងដោយជនជាតិអាមេរិកលោក Casey Barnett តែអាចដណ្តើមបានមេដាយមាសផ្នែកបាល់បោះនារីក្នុងព្រឹត្តិការណ៍នេះ ២ ឆ្នាំជាប់គ្នា៕