.jpg)
លោក Felix (ឆ្វេង) បានចាប់ដៃស្វាគមន៍លោក Helio Sousa ក្នុងសន្និសីទ។ រូប យូសុះ អាប់ឌុលរ៉ាស់ហ៊ីម
ភ្នំពេញ៖ លោក Helio Sousa បានអះអាងថា បេសកកម្មរបស់ក្រុមជម្រើសជាតិបារ៉ែន គឺត្រូវដណ្តើមឲ្យបាន ៣ ពិន្ទុ ពីក្រុមម្ចាស់ផ្ទះកម្ពុជា នៅពេលក្រុមទាំង ២ ត្រូវប្រកួតគ្នា ក្នុងវគ្គជម្រុះជុំទី២ ប្រចាំពូល C នៃពានរង្វាន់ FIFA World Cup Qatar 2022 នៅពហុកីឡដ្ឋានជាតិ នាល្ងាចម៉ោង ៦:៣០ ថ្ងៃអង្គារនេះ ប៉ុន្តែគ្រូបង្វឹករូបនេះ បានចាត់ទុកការជួបកម្ពុជា ថាជាជំនួបដ៏តានតឹង គឺមិនមែនងាយស្រួលក្នុងការស្វែងរកជ័យជម្នះនោះឡើយ។
បើទោះបីជា ក្រុមបារ៉ែន មានកម្រិតលេងខ្ពស់ជាង និងមានចំណាត់ថ្នាក់ ១០៩ នៅលើពិភពលោក គឺល្អដាច់ជាងក្រុមជម្រើសជាតិកម្ពុជា ដែលឈរនៅលេខ ១៧០ ប៉ុន្តែលោក Helio Sousa បានមើលឃើញថា កម្ពុជា ជាក្រុមមួយដែលមានការរៀបចំបានល្អ និងកំពុងតែធ្វើបានល្អប្រសើរ។
លោក Helio Sousa បានថ្លែងនៅក្នុងសន្និសីទកាសែតកាលពីថ្ងៃចន្ទថា៖ «ការប្រកួតនៅថ្ងៃស្អែក ជាការប្រកួតដ៏លំបាក ព្រោះខ្ញុំមើលឃើញថា កម្ពុជា ជាក្រុមកំពុងធ្វើបានល្អ និងរៀបចំបានល្អ អ៊ីចឹងយើងកំពុងរង់ចាំការប្រកួតដ៏តានតឹងមួយ ប៉ុន្តែសំខាន់យើងផ្តោតទៅលើការរក ៣ ពិន្ទុ»។
គ្រូបង្វឹករូបនេះបានបន្ថែមថា៖ « យើងនឹងព្យាយាមបង្កើតអ្វីដែលប្លែក ហើយយើងនឹងដាក់កីឡាករ ដែលមានសក្តានុពលឲ្យចូលលេង ព្រោះយើងមកនេះ ដើម្បីចង់បាន ៣ ពិន្ទុ។ ប៉ុន្តែយើងក៏បានដឹងដែរថា កម្ពុជាមិនមែនជាក្រុមខ្សោយ គឺពួកគេធ្វើបានល្អ ហេតុនេះយើងនឹងធ្វើការថ្លឹងថ្លែង និងស្វែងរកចំណុចខ្សោយ និងខ្លាំងរបស់កម្ពុជា ដើម្បីយើងរៀបចំប្រព័ន្ធលេងឲ្យបានល្អ»។
ជាមួយគ្នានេះ លោក Helio Sousa ក៏បានបារម្ភទៅលើការលេងនៅលើទីលានស្មៅសិប្បនិម្មិតផងដែរ។ លោកបញ្ជាក់ថា៖ «ការលេងនៅលើស្មៅសិប្បនិម្មិត នឹងផ្តល់ផលចំណេញខ្ពស់ដល់ក្រុមម្ចាស់ផ្ទះ ព្រោះក្រុមរបស់យើងភាគច្រើន លេងនៅលើស្មៅធម្មជាតិ។ ក្រុមកម្ពុជា លេងបានល្អនៅលើស្មៅសិប្បនិម្មិត ទាំងលេងជាមួយក្រុមចម្រើសជាតិហុងកុង និងអាហ្វហ្គានីស្ថាន ហេតុនេះយើងដឹងថា យើងនឹងប្រឈមជាមួយក្រុមដែលរៀបចំបានល្អ តែទោះបីជាយ៉ាងណាក្រុមរបស់យើងត្រូវតែធ្វើឲ្យបានរួចរាល់ ដើម្បីឆ្ពោះទៅរកការដណ្តើមយក ៣ ពិន្ទុលើកនេះ»។
ចំណែកលោក Felix Dalmas គ្រូបង្វឹកក្រុមកម្ពុជាបាននិយាយថា៖ «យើងមានការរីករាយ ដែលបានលេងជាមួយក្រុមខ្លាំងដូចបារ៉ែន ហើយយើងនឹងខំប្រឹងឲ្យអស់ពីសមត្ថភាព។ បើទោះបីជាលទ្ធផលយ៉ាងម៉េចក៏ដោយ តែយើងចង់ឲ្យកូនក្រុមរបស់យើងមានភាពក្លាហាន និងគោរពទៅតាមទស្សនៈរបស់យើង គឺយើងត្រូវព្យាយាមធ្វើម៉េចឲ្យក្រុមយើង ធ្វើបានលឿនជាងគេ និងបានមុខគេ»។
គ្រូបង្វឹកជនជាតិអាហ្សង់ទីនរូបនេះ បានបន្ថែមថា៖ «គោលបំណងរបស់យើង គឺយើងចង់ឲ្យកូនក្រុមបង្ហាញទម្រង់លេងកាន់តែល្អជាងមុន ដោយយើងនៅធ្វើតាមគោលការណ៍របស់យើង ហើយខ្ញុំក៏មិនប្រាកដថា ក្រុមយើងនឹងទទួលបានផលចំណេញសម្រាប់ការលេងនៅលើទីលានស្មៅសិប្បនិម្មិតនោះដែរ អ៊ីចឹងយើងត្រូវព្យាយាមធ្វើឲ្យអស់ពីសមត្ថភាពទៅតាមអ្វីដែលយើងមាន»។
គួរបញ្ជាក់ថា សម្រាប់ការប្រកួតបើកឆាកប្រចាំពូល C នេះ កាលពីថ្ងៃទី ៥ ខែ កញ្ញា ក្រុមម្ចាស់ផ្ទះបារ៉ែន បានស្មើ ១-១ ជាមួយក្រុមអ៊ីរ៉ាក់ គឺដូចគ្នានឹងក្រុមកម្ពុជាដែរ ដែលបានស្មើក្រុមហុងកុង ១-១ ហើយការមាន ១ ពិន្ទុដូចគ្នានេះ វានឹងធ្វើឲ្យការប្រកួតលើកនេះ កាន់តែមានភាពស្វិតស្វាញខ្លាំង៕
