.jpg)
Bisan Goerge បានសម្លឹងមើលមិត្តរួមក្រុមដែលត្រូវខ្សែការពារក្រុមគិរីវង់បុកឲ្យដួល។ រូបថត CNCC
ភ្នំពេញៈ នៅទីបំផុត បឹងកេត គឺជាអ្នកទាញក្រុមព្រះខ័នរាជស្វាយរៀងឲ្យធ្លាក់ចេញពីតំបន់កំពូលតារាងនៃលីកកំពូលកម្ពុជា ឆ្នាំ ២០១៩ ដើម្បីបើកផ្លូវឲ្យក្រុមណាហ្គាវើលឡើងទៅឈរនៅលេខរៀង ១ វិញម្តង ប៉ុន្តែក្រុមក្រសួងការពារជាតិ (ទ័ព) ដែលគេមើលឃើញថា គួរតែទទួលបាន ៣ ពិន្ទុដែរនោះ បែរជាជួបការខកចិត្តខ្លាំងក្រោមស្នាដៃក្រុមគិរីវង់សុខសែនជ័យទៅវិញ។
បើទោះបីជាក្រុមម្ចាស់ជើងឯក ណាហ្គាវើល បានធ្លាក់ចេញពីការប្រកួតជម្រុះពាន AFC Cup 2019 ក្នុងនាមជាក្រុមឈរនៅបាតតារាងនៃពូល F ដោយមានត្រឹម ៣ ពិន្ទុជាមួយក្រុមឈ្នះ ១ និងចាញ់ ៥ ប្រកួត ប៉ុន្តែការយកឈ្នះក្រុមអង្គរថាយហ្គឺរ ៤-០ កាលពីថ្ងៃសៅរ៍អាចបញ្ជាក់បានថា ណាហ្គាវើល នៅតែជាក្រុមខ្លាំងក្នុងលីកកំពូលកម្ពុជា ព្រោះក្រុមមានកម្រិតលេងល្អដូចជា ព្រះខ័នរាជស្វាយរៀង ទ័ព និងបឹងកេត សុទ្ធតែបានត្រឹមស្មើ អង្គរថាយហ្គឺរ ១-១ ហើយក្រុមវិសាខាបានចាញ់ ២-១។
ជាមួយជ័យជម្នះដែលរកបានដោយ សុះ ស៊ូហាណា ២ គ្រាប់ និងការរកបានម្នាក់ ១ គ្រាប់របស់ Kipson និង Esho Omogba នេះបានជួយឲ្យក្រុមណាហ្គាវើល ឡើងទៅឈរនៅកំពូលតារាងដោយមាន ២១ ពិន្ទុ។ ប៉ុន្តែការឡើងទៅឈរនៅលេខ ១ នេះក៏មានការជួយពីក្រុមបឹងកេតផងដែរ ខណៈខ្សែប្រយុទ្ធជើងចាស់ ឃួន ឡាបូរ៉ាវី បានតែតបាល់បញ្ចូលទី ដើម្បីជួយឲ្យបឹងកេតតាមស្មើក្រុមស្វាយរៀង ២-២ នៅនាទីទី ៨៧ នោះ។
ការចែកគ្នាម្នាក់ ១ ពិន្ទុនេះបានធ្វើឲ្យក្រុមស្វាយរៀងធ្លាក់មកឈរនៅលេខ ២ មាន ២០ ពិន្ទុ ខណៈបឹងកេតបន្តឈរលេខ ៦ ដដែលមាន ១៤ ពិន្ទុ។ រីឯក្រុមវិសាខាបានឈ្នះក្រុមសាលាកីឡាបាល់ទាត់ជាតិបាទី ៥-១ ដើម្បីបន្តឈរលេខ ៣ ដោយមាន ១៩ ពិន្ទុ និងតាមពីក្រោយដោយក្រុមអង្គរថាយហ្គឺរ ដែលមាន ១៥ ពិន្ទុដដែល។
ផ្ទុយពីនេះក្រុមឈរនៅលេខ ៥ មាន ១៤ ពិន្ទុ ទ័ពបែរជាទៅចាញ់ក្រុមគិរីវង់សុខសែនជ័យ ៤-១ ដ៏គួរឲ្យភ្ញាក់ផ្អើលបំផុត ខណៈខ្សែប្រយុទ្ធ Bisan Goerge ដែលជាអ្នករកបាន ១ គ្រាប់នៅនាទីទី ៥៧ តាមពីក្រោយការរកបានគ្រាប់បាល់នាំមុខរបស់ Santo នៅនាទីទី ៣២ និង Reiya Konishita នៅនាទីទី ៥២ បានទទួលកាតក្រហមនោះ ហើយបន្ទាប់មកកីឡាករ ដាវ នីម និង Reiya Konishita ក៏រកបានម្នាក់ ១ គ្រាប់ទៀតឲ្យក្រុមគិរីវង់។
លោក ភា សុភ័ក្ត្រា ជាគ្រូបង្វឹកមានការខកចិត្តខ្លាំងលើលទ្ធផលនេះ។ លោកបានប្រាប់កាលពីថ្ងៃចន្ទថា៖ «នៅដើមតង់ទី ១ យើងមានឱកាសល្អៗអាចថា ៨០ ភាគរយក្នុងការសម្រេចទីបាន តែយើងធ្វើអត់បាន។ បើសិនជាយើងសម្រេចឱកាសទាំងនោះយើងប្រហែលជាមានលទ្ធផលល្អជាង ហើយការព្យាយាមលេងស្របពេលអាហារសម្រន់របស់យើងសម្រាប់កីឡាករ មិនគ្រប់គ្រាន់ស្របទៅតាមការផ្លាស់ប្តូរពេលវេលាប្រកួតនោះ ធ្វើឲ្យយើងមានការថមថយកម្លាំង»។
លោកបានបន្តថា៖ «ក្រោយមកខាងគេបានទទួលឱកាសបាល់ជ្រុងតែម្តងគត់ តែគេក៏តែតបានសម្រេចមុនយើង អ៊ីចឹងធ្វើឲ្យយើងប្រើកម្លាំង គិតទៅដល់ការរកឲ្យបានគ្រាប់បាល់វិញ ហើយការប្រើប្រាស់កម្លាំងខុសពីប្រក្រតីច្រើន ធ្វើឲ្យយើងពិបាកក្នុងការចុះមកការពារ និងការប្រជែង ខណៈគិរីវង់ភាគច្រើនទាត់បាល់បំផ្លោងឡើងទៅលើរួចប្រើប្រាស់កាយសម្បទាកីឡាករប៉ះទង្គិចខ្លាំង យកប្រៀបលើយើង»។
គ្រូបង្វឹកវ័យក្មេងរូបនេះបានបន្ថែមថា៖ «ទោះយ៉ាងណាបើយើងមិនភ្លាត់ កាតក្រហម Bisan Goerge ទេគឺយើងនៅតែអាចរក្សាលំនឹងបានក្នុងការគាបសង្កត់ និងបង្កើតឱកាសប្រយុទ្ធ ប៉ុន្តែក្រោយមានបញ្ហាកាតគឺយើងបានប្រថុយដោយបន្ថយការពារ និងបង្កើនប្រយុទ្ធ ដើម្បីព្យាយាមរកគ្រាប់បាល់ត្រឡប់មកវិញ ប៉ុន្តែការប្តូររបស់យើងគឺយើងបានភ្លាត់ ២ គ្រាប់បន្ថែមទៀត»។
គួរបញ្ជាក់ថាជំនួបរវាងក្រុមគិរីវង់ និងក្រុមទ័ពដែលត្រូវធ្វើនៅរសៀលម៉ោង ៣:៣០ នៅថ្ងៃអាទិត្យនោះត្រូវបានលើកយកមកធ្វើនៅមជ្ឈមណ្ឌល និងសាលាកីឡាបាល់ទាត់ជាតិបាទីនាពេលល្ងាចវិញ ព្រោះទីលានរបស់ក្រុមគិរីវង់បានជន់លិចដោយដំណក់ទឹកភ្លៀង។ ជាមួយគ្នានោះក្រុមអាស៊ីអឺរ៉ុបបានឈ្នះក្រុមខេត្តកំពង់ចាម ៥-០ ស្របពេលក្រុមប៉ូលិសឈ្នះក្រុមអគ្គិសនីកម្ពុជា ១-០ ប៉ុន្តែក្រុមភ្នំពេញក្រោនបានចាញ់ក្រុមម្ចាស់ផ្ទះសូលទីឡូអង្គរ ១-០៕
