.jpg)
រស់ សំអឿន (ឆ្វេង) នឹងត្រូវជួបមិត្តរួមក្រុមចាស់ ពេលបឹងកេត ប៉ះវិសាខា នៅថ្ងៃអាទិត្យ។ ស្រេង ម៉េងស្រ៊ុន
ភ្នំពេញៈ ការវិលមកជួបគ្នារវាងក្រុមបឹងកេត និងវិសាខា នៅសប្តាហ៍ទី ១០ ចុងសប្តាហ៍ នេះ បានក្លាយជាការប្រកួតដ៏សំខាន់ និងគួរឲ្យចាប់អារម្មណ៍បំផុត ខណៈក្រុមទាំង ២ សុទ្ធតែមានកម្រិតលេងខ្ពស់ និងត្រូវការឈ្នះ ដើម្បីឈរនៅកំពូលតារាងនោះ ចំណែកណាហ្គាវើល ក៏ចាំអ៊ុតមើលលទ្ធផលរបស់ក្រុមខ្លាំងទាំង ២ នេះផងដែរ។
បឹងកេត និងវិសាខា មិនធ្លាប់មានប្រវត្តិជួបគ្នាកន្លងមកនេះ ព្រោះវិសាខា ទើបតែបានឡើងមកចូលលេងលីកកំពូលកម្ពុជា នៅឆ្នាំ ២០១៨ នេះទេ ប៉ុន្តែកម្រិតលេង និងគុណភាពកីឡាករដ៏សម្បូរបែបរបស់ វិសាខា បានធ្វើឲ្យក្រុមបឹងកេត មានការបារម្ភដូចគ្នា បើទោះបីជា ៩ ប្រកួតកន្លងមកនេះ បឹងកេត មិនទាន់ស្គាល់ការចាញ់ក៏ដោយ។
លោក ហៅ សុជាតិ គ្រូបង្វឹកក្រុមបឹងកេត បានប្រាប់កាលពីម្សិលមិញថា៖ «ការប្រកួតនេះ នឹងមានភាពតានតឹងខ្លាំង។ បើទោះបីជា វិសាខា ជាក្រុមចំណូលថ្មី ប៉ុន្តែធនធានកីឡាករខ្មែររបស់ក្រុមនេះ សុទ្ធតែមានបទពិសោធលេងច្រើន ហើយអ្វីដែលពិសេសជាងនេះទៅទៀត គឺវិសាខា មានកីឡាករបរទេសកូរ៉េខាងជើង ដែលមានគុណភាពលេងល្អ»។
ជាមួយគ្នានេះខ្សែការពារ ស៊ុន សុវណ្ណរិទ្ធី ដែលទើបរងរបួសកជើង ពេលបឹងកេត យកឈ្នះក្រុមភ្នំពេញក្រោន ៣-២ កាលពីសប្តាហ៍មុននេះ គឺមានសង្ឃឹមត្រឹម ៦០ ទៅ ៧០ ភាគរយទេ សម្រាប់ការជួយបឹងកេត លើកនេះ ប៉ុន្តែ សេត រ៉ូហ្ស៊ីប អាចចូលលេងបាន ១០០ ភាគរយវិញហើយ។
ទោះយ៉ាងណា លោក ហៅ សុជាតិ មិនទាន់ហ៊ានវាយតម្លៃ និងកំណត់គោលដៅច្បាស់លាស់ ក្នុងការលេងជាមួយក្រុមវិសាខា នៅឡើយទេ។
លោក ហៅ សុជាតិ បានបន្ថែមថា៖ «គិតមកដល់ពេលនេះ យើងបានរៀបចំក្រុមល្អជាងការប្រកួតកន្លងមក ដោយសារកីឡាករមានរបួសមួយចំនួន អាចចូលលេងវិញបានហើយ ប៉ុន្តែការជួបក្រុមវិសាខា វាទាមទារឲ្យយើងត្រូវរៀបចំក្រុមឲ្យបានល្អ ជាងពេលយើងជួបភ្នំពេញក្រោន ព្រោះការប្រកួតនេះ ពិតជាមានភាពតានតឹងខ្លាំងមែនទែន អ៊ីចឹងហើយយើងនឹងរៀបចំការលេងទៅតាមស្ថានភាពជាក់ស្តែង ហើយយើងក៏មិនទាន់អាចវាយតម្លៃបានថា យើងនឹងទទួលបានលទ្ធផលបែបណានោះដែរ?»។
ចំណែកលោក ហុក សុជីវ័ន ក៏បានបង្ហាញពីការបារម្ភទៅលើគុណភាពលេងរបស់បឹងកេត ផងដែរ។ លោកបានប្រាប់ថា៖ «ខ្ញុំគិតថា ការប្រកួតនេះ នឹងមានភាពតានតឹងខ្លាំង ដែលយើងត្រូវតែប្រយ័ត្ន ដោយសារក្រុមគេ ជាក្រុមមួយដែលខ្លាំង មិនទាន់មានក្រុមណាបំបាក់គាត់បានទេ អ៊ីចឹងវាជាការប្រកួតមួយ ដែលលំបាកខ្លាំងសម្រាប់ពួកយើង»។
លោកបានបន្ថែមថា៖ «រឿងសំខាន់ គឺការរៀបចំ និងអារម្មណ៍របស់កីឡាករទាំងអស់ ហើយមកដល់ពេលនេះ យើងបានត្រៀមរួចរាល់ហើយ ប៉ុន្តែការអវត្តមានរបស់ខ្សែការពារ ជិន វណ្ណៈ ដែលទទួលបានកាតក្រហម ពេលជួបក្រុមស្វាយរៀង កាលពីសប្តាហ៍មុន អាចប៉ះពាល់ដល់ការប្រកួតនេះខ្លះដែរ ព្រោះយើងកំពុងខ្វះកីឡាករនៅត្រង់តំបន់នេះ»។
ក្នុងជំនួបនេះដែរ ក៏ជាពេលដែល រស់ សំអឿន របស់ក្រុមវិសាខា ត្រូវប្រឈមជាមួយអតីតមិត្តរួមក្រុមរបស់គេ នៅក្រុមបឹងកេត ផងដែរ។
ចំណែកក្រុមណាហ្គាវើល អាចនឹងទទួលបានផលចំណេញ សម្រាប់ជំនួបរវាងក្រុមបឹងកេត និងវិសាខា លើកនេះ។ បើសិនជាក្រុមទាំង ២ នេះស្មើគ្នា ឬក៏វិសាខា អាចឈ្នះបឹងកេត គឺណាហ្គាវើល មានភាគរយខ្ពស់បំផុត ក្នុងការប្រជែងយកលេខ ១ ពីបឹងកេត មកវិញ ព្រោះពេលនេះ ណាហ្គា ឈរនៅលេខ ២ មាន ២២ ពិន្ទុ តិចជាងបឹងកេត ១ ពិន្ទុ និងច្រើនជាងក្រុមវិសាខា ដែលមាន ១៩ ពិន្ទុ ហើយការប្រកួតលើកនេះ ណាហ្គាវើល នឹងអាចយកឈ្នះក្រុមឈរនៅបាតតារាង វេស្ទើន ដោយគ្មានអ្វីត្រូវសង្ស័យនោះទេ៕
កម្មវិធីប្រកួតនៅថ្ងៃសៅរ៍
-អាស៊ីអឺរ៉ុប v ស្វាយរៀង នៅកីឡដ្ឋាន AEU ម៉ោង ៣:០០
-ក្រសួងការពារជាតិ v សូលទីឡូអង្គរ ស្តាតចាស់ ៣:០០
-ប៉ូលិស v អង្គរថាយហ្គឺរ នៅពហុកីឡដ្ឋានជាតិ ៦:៣០
៣ ប្រកួតនៅថ្ងៃអាទិត្យ
-វិសាខា v បឹងកេត កីឡដ្ឋានវេស្ទើន ម៉ោង ៣:០០
-ភ្នំពេញក្រោន v អគ្គិសនីកម្ពុជា កីឡដ្ឋាន អ.អេស.អិន ៦:៣០
-ណាហ្គាវើល v វេស្ទើន នៅពហុកីឡដ្ឋានជាតិ ៦:០០
