ភ្នំពេញ: ប្រតិភូកីឡាប៉េតង់កម្ពុជា បាននាំយកពានឆ្នើមកម្រិតពិភពលោក ដែលពួកគេឈ្នះបានពីការប្រកួតកីឡាប៉េតង់ដណ្តើមពាន Trophee L''Equipe 2018 នៅបារាំង មកដល់មាតុប្រទេសវិញ កាលពីព្រឹកថ្ងៃអង្គារ ប៉ុន្តែការឈ្នះពានដ៏សំខាន់ ដែលធ្វើឲ្យអ្នកចូលរួម ពិសេសបារាំង ជាម្ចាស់ផ្ទះសរសើរមិនដាច់ពីមាត់ថា កម្ពុជាខ្លាំង នោះ មិនស្ថិតក្នុងការប្រកួត ដែលទទួលបានប្រាក់រង្វាន់ពីរាជរដ្ឋាភិបាលតាមការប្រកាសអន្តរក្រសួង ឬអនុក្រឹត្យ នោះទេ។
ទាក់ទងទៅនឹងបញ្ហានេះ លោក វ៉ាត់ ចំរើន អគ្គលេខាធិការ NOCC បានប្រាប់ភ្នំពេញ ប៉ុស្តិ៍ថា ការដណ្តើមពាននេះ វាជាការប្រកួតកម្រិតពិភពលោកដែរ ប៉ុន្តែស្ថិតនៅក្នុងការប្រកួតលក្ខណៈមិត្តភាពដណ្តើមពានរង្វាន់គឺមិនមែនជាការប្រកួតជើងឯកពិភពលោក ជាលក្ខណៈបច្ចេកទេសនោះទេ អ៊ីចឹងវាមិនស្ថិតនៅក្នុងការប្រកួតដែលទទួលបានប្រាក់រង្វាន់ពីរាជរដ្ឋាភិបាលនោះឡើយ។
យ៉ាងណាក៏ដោយ វីរកីឡាការិនី កែ ឡេង ដែលធ្លាប់ឈ្នះមេដាយមាសជាប់ៗគ្នា ពីការប្រកួតកីឡាប៉េតង់ជ្រើសរើសជើងឯកពិភលោក បង្ហាញមោទនភាពខ្លាំង ចំពោះការឈ្នះពាន ៣ ដើម្បីបានលេខ ១ ក្នុងការប្រកួត Trophee L''Equipe 2018 នេះ។ វីរកីឡាការិនីរូបនេះ បាននិយាយថា៖ «នេះជាជោគជ័យរបស់កីឡាករ កីឡាការិនីយើងហើយ ដែលធ្វើឲ្យម្ចាស់ផ្ទះបារាំងដួល ដោយសារមិនទទួលបានលទ្ធផលការឈ្នះមេដាយមាស»។
កែ ឡេង បានបញ្ជាក់ថា៖ «ខ្ញុំគិតថា ជាមោទនភាពរបស់ក្រុមប៉េតង់យើង ព្រោះព្រឹត្តិការណ៍នេះ មិនមែនតូចនោះទេ ហើយទោះបីជាមានគ្មានថវិកាពីរដ្ឋាភិបាល ឬពីក្រសួងអប់រំ អី ក៏ខ្ញុំអត់តូចចិត្ត និងអត់គិតអ្វីទាំងអស់ សំខាន់ខ្ញុំដណ្តើមបានមេដាយជូនជាតិ»។
ការប្រកួតដណ្តើមពាន Trophee L''Equipe លើកទី ២ ឆ្នាំ ២០១៨ នេះ គឺមានការកំណត់យកតែប្រទេសធ្លាប់ឈ្នះបានមេដាយមាសច្រើនពីការប្រកួតជើងឯកពិភពលោក ឲ្យចូលរួមប៉ុណ្ណោះ ហើយកម្ពុជា ដែលធ្លាប់ដណ្តើមបានមេដាយមាសចំនួន ៥ ពីការប្រកួតកីឡាប៉េតង់ជើងឯកពិភពលោក កន្លងមកនោះ ត្រូវបានដាក់ឲ្យចូលលេងជាលើកដំបូង ខណៈ ៦ ប្រទេសផ្សេងទៀតមានថៃ (ខាងទ្វីបអាស៊ី) ម្ចាស់ផ្ទះបារាំង (មាន ២ ក្រុម) ដាណឺម៉ាក និងអ៊ីតាលី តំណាងមកពីទ្វីបអឺរ៉ុប រួមទាំងប្រទេសម៉ាដាហ្គាស្កា ទុយនីស៊ី ជាតំណាងប្រទេសខ្លាំងមកពីទ្វីបអាហ្រ្វិក។
តាមរយៈការប្រកួត ដែលបានចាប់ផ្តើមតាំងពីថ្ងៃទី ៩ ហើយបានបញ្ចប់ កាលពីថ្ងៃទី ១៤ ខែតុលានោះ ក្រុមប៉េតង់កម្ពុជា ដណ្តើមបានពានលេខ ១ ចំនួន ៣ និងពានលេខ ២ ចំនួន ២ ក្នុងការប្រកួត ដែលមានត្រឹម ៦ វិញ្ញាសានោះ។
ចំពោះពានលេខ ១ ទី១ រកបានដោយវីរកីឡាការិនី កែ ឡេង និង អ៊ុក ស្រីមុំ លើការប្រកួតវាយគូនារី ឯពានលេខ ១ ទី ២ រកបានដោយ អ៊ុន ស្រីយ៉ា លើវិញ្ញាសា ១ នាក់ទល់ ១ នាក់ ហើយអ្នកទាំង ៣ នេះ បានរួមគ្នាឈ្នះពានធំ ការប្រកួតជាក្រុម ៣ នាក់ទល់ ៣ នាក់។ រីឯកីឡាករ មាស ច័ន្ទមាន ពានលេខ ២ ក្នុងការប្រកួត ១ នាក់ទល់ ១ នាក់ ហើយការប្រកួតជាក្រុម ច័ន្ទមាន ញ៉ែម បូរ៉ា និង យ៉ា ចាន់ដារ៉ារិទ្ធ បានលេខ ២ ក្រោយចាញ់ក្រុមម៉ាដាហ្គាស្កា ១៣-៣ នៅវគ្គផ្តាច់ព្រ័ត្រ៕