.jpg)
លោក ប៊ុយ សុភ័ណ្ឌ (ពីឆ្វេង) លោក ឆឹង យ៉ៅយ៉េន (កណ្តាល) ពេលចូលរួមក្នុងសន្និសីទ។ រូប យឺន ពន្លក
ភ្នំពេញ៖ គណៈកម្មាធិការប្រតិបត្តិសហព័ន្ធកីឡាប្រដាល់សកលកម្ពុជា បានយកការជួបជុំគ្នាក្នុងសន្និបាតនៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដើម្បីពិនិត្យសម្រេចលើការបង្កើតនូវគណៈកម្មការមួយឈ្មោះថា «គណៈកម្មការប្រដាល់សកលអាជីពកម្ពុជា» សម្រាប់ស្វែងរកទីផ្សារប្រកួតជូនអត្តពលិករបស់ខ្លួនតាមលទ្ធភាព ដែលគ្រោងឈានទៅមានសកម្មភាពប្រកួតលំដាប់ពិភពលោក។
ចំពោះសមាសភាពទាំង ១០ នាក់ នៅក្នុងគណៈកម្មការនេះ គឺមានជនជាតិខ្មែរតែ ២ នាក់ទេ ក្នុងនោះ លោក ប៊ុយ សុភ័ណ្ឌ ជាប្រធាន ចំណែក ៩ នាក់ទៀត ជាអ្នកជំនាញបច្ចេកទេស និងទីផ្សាមកពីបរទេស ដោយមានការគាំទ្រពីមន្ត្រីជាន់ខ្ពស់មកពីស្ថានទូតជប៉ុនផងដែរ។
លោក ប៊ុយ សុភ័ណ្ឌ ជាអគ្គលេខាធិការសហព័ន្ធកីឡាប្រដាល់សកលកម្ពុជាផងនោះ បាននិយាយថា ការបង្កើតឲ្យមានគណៈកម្មការប្រដាល់សកលអាជីពកម្ពុជា ឬ Cambodia Professinal Boxin Commission នេះ គឺដើម្បីឆ្លើយតបទៅនឹងសេចក្តីត្រូវការរបស់អត្តពលិករបស់យើង និងការទំនាក់ទំនងជាមួយស្ថាប័នកីឡាអាជីព នៅលើសកលលោកមួយចំនួន»។
លោកបានបន្ថែមថា៖ «ការបង្កើតគណៈកម្មការនេះ ដើម្បីស្វែងរកការគាំទ្រឲ្យមានភាពរីកចម្រើន ក្នុងការមានដៃគូនៅលើឆាកអន្តរជាតិ ទាំងការហ្វឹកហាត់ និងការប្រកួត ខណៈដែលពួកគាត់ដែលជាសមាជិក គឺជាអ្នកជួយទ្រទ្រង់ឲ្យមានសកម្មភាព គឺវាស្របទៅនឹងការអភិវឌ្ឍដោយផ្អែកលើបទបញ្ជាផ្ទៃក្នុងរបស់សហព័ន្ធកីឡាប្រដាល់សកលកម្ពុជា ដោយគាំទ្រ និងទទួលស្គាល់ពី NOCC តាំងពីថ្ងៃ ១៧ ខែ កុម្ភៈ ឆ្នាំ២០១៧ និងទទួលស្គាល់ពីក្រសួងអប់រំ យុវជន និងកីឡា ចុះថ្ងៃទី ៣០ ខែ មេសា ឆ្នាំ ២០១៧»។
លោក ប៊ុយ សុភ័ណ្ឌ បានលម្អិតថា៖ «យោងតម្រូវការចាំបាច់ក្នុងការអភិវឌ្ឍកីឡាប្រដាល់សកលអាជីព ឆ្ពោះទៅកីឡាស៊ីហ្គេមលើកទី ៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះនោះ យើងនឹងប្រឹងប្រែងបង្កើតគណៈកម្មការប្រដាល់សកលអាជីពកម្ពុជានេះឲ្យបាន ដើម្បីជាដៃគូជាមួយវិស័យឯកជន»។
សម្រាប់ការធ្វើសេចក្តីសម្រេចក្នុងសន្និសីទកាសែតកាលពីល្ងាចថ្ងៃអង្គារ គឺសមាសភាពទាំង ១០ នាក់ នៅក្នុងគណៈកម្មការនេះ រួមមាន លោក ប៊ុយ សុភ័ណ្ឌ ជាប្រធាន លោក Motohashi Yukiharu លោក Slobe Masahiro និងលោក ហ៊ុន ដាវីរតនា ជាអនុប្រធានចំណែកគណៈកម្មការប្រតិបត្តិចំនួន ៧ រូបទៀត មានលោកស្រី Motohashi Yuko លោក Motohashi Ryotaro លោក Motohashi Taiga លោក Kametani Nagakazu លោក Fukuda Akira និងលោក Takamori Jou។
លោកសាស្ត្រាចារ្យវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា និងជាអ្នកជំនាញតាក់តែងបទបញ្ជាប្រកួតបានថ្លែងថា៖ «ភារកិច្ចរបស់គណៈកម្មការប្រដាល់សកលអាជីពកម្ពុជា មានតួនាទីដូចជារៀបចំព្រឹត្តិការណ៍កីឡាប្រដាល់សកលអាជីពនៅកម្ពុជា និងដឹកនាំកីឡាករកីឡាការិនីប្រដាល់សកលអាជីពកម្ពុជា ទៅចូលរួមប្រកួតជាលក្ខណៈអន្តរជាតិនានា ដែលសេចក្តីសម្រេចនោះ ត្រូវមានសុពលភាពចាប់ពីថ្ងៃទី ២៥ ខែកុម្ភៈ នេះតទៅ»។
លោក ប៊ុយ សុភ័ណ្ឌ ដែលជាអ្នកជំនាញច្បាប់កីឡាផងនោះ បានឲ្យដឹងថា៖ «យើងបង្កើតគណៈកម្មការប្រដាល់សកលអាជីពនេះ គឺមានគោលដៅភ្ជាប់ទំនាក់ទំនងទៅកាន់ស្ថាប័នប្រដាល់ពិភពលោកធំៗ ជាមួយវិស័យឯកជនស្ម័គ្រចិត្ត មានដូចជាស្ថាប័ន WBO ,WBA, WBC និងស្ថាប័ន IBC ជាដើម»៕
