ភ្នំពេញៈ ប្រភេទកីឡារបស់កម្ពុជាចំនួន ៦ មានតេក្វាន់ដូ ITF បាល់ទាត់ គុនល្បុក្កតោ ជឺជិតស៊ូ កីឡាសូហ្វតិន្នីស និង Kickboxing សុទ្ធតែបានបង្កើតប្រវត្តិសាស្រ្តថ្មី សម្រាប់ការបង្ហាញខ្លួន នៅលើឆាកអន្តរជាតិ ក្នុងឆ្នាំ ២០១៩ ចំណែកប្រភេទកីឡាមានសក្តានុពលចំនួន ៣ ទៀត មានប៉េតង់ តេក្វាន់ដូ (WTF) និង វ៉ូវីណាម ក៏បានបន្តភាពខ្លាំង តាមរយៈការឈ្នះបានមេដាយមាស ជូនប្រទេសជាតិ នៅក្នុងការប្រកួតស៊ីហ្គេម និងការប្រកួតជើងឯកពិភពលោកផងដែរ។
ចំពោះសមិទ្ធផល ដែលទទួលបាន កាលពីឆ្នាំ ២០១៩ ត្រូវបានអ្នកជំនាញវាយតម្លៃជារួមថា វិស័យកីឡារបស់កម្ពុជា មានការរីកចម្រើន ដោយវិជ្ជមាន ហើយកំពុងតែរុញទៅមុខ និងមានសង្ឃឹមក្នុងការឆ្ពោះទៅធ្វើម្ចាស់ផ្ទះស៊ីហ្គេម លើកទី ៣២ ឆ្នាំ ២០២៣។
តាមរយៈការធ្វើសកម្មភាព និងការប្រកួត នៅលើឆាកអន្តរជាតិ ប៉េតង់ បានក្លាយជាប្រភេទកីឡា ដែលមានភាពលេចធ្លោខ្លាំងជាងគេ ក្នុងការប្រមាញ់យកមេដាយមាសជូនប្រទេសជាតិ ទាំងក្នុងការប្រកួតស៊ីហ្គេម ជើងឯកពិភពលោក និងជើងឯកអាស៊ី ដែលត្រូវបានធ្វើឡើង កាលពីឆ្នាំ ២០១៩ ព្រោះការ-ប្រកួតស៊ីហ្គេម លើកទី ៣០ នៅហ្វីលីពីន ឆ្នាំ ២០១៩ ក្រុមប៉េតង់ បានបន្តឈ្នះបានមេដាយមាស ១ និងប្រាក់ ១ ជូនកម្ពុជា។
បន្ថែមលើនេះ ក្រុមប៉េតង់ ក៏បានបន្តឈ្នះមេដាយមាស ១ និង សំរឹទ្ធ ១ នៅក្នុងការប្រកួតជើងឯកពិភពលោក ដែលត្រូវបានធ្វើឡើង នៅប្រទេសកម្ពុជា ផងដែរ។
វីរកីឡាការិនី កែ ឡេង ជាអ្នកឈ្នះបានមេដាយមាសនេះ លើវិញ្ញាសាវាយយកពិន្ទុ ហើយការឈ្នះមេដាយមាស ជាលើកទី ៤ ជាប់ៗគ្នានេះ ធ្វើឲ្យអ្នកស្រី ទទួលបានការបំពាក់ស័ក្តិថ្នាក់ឧត្តមសេនីយ៍ទោ (ផ្កាយ ២) កាលពីថ្ងៃទី ៣០ ខែធ្នូ ផងដែរ។ លើសពីនេះ ក្រុមប៉េតង់ បានបន្តឈ្នះមេដាយមាស ៤ ប្រាក់ ១ និងសំរឹទ្ធ ១ ពីការប្រកួតកីឡាប៉េតង់ជើងឯកអាស៊ី លើកទី ៣ ឆ្នាំ ២០១៩ នៅវៀតណាមផងដែរ។
ដោយឡែក វីរកីឡាការិនីតេក្វាន់ដូ (WTF) ស៊ន សៀវម៉ី នៅតែបន្តឈ្នះបានមេដាយមាស នៅក្នុងការប្រកួតស៊ីហ្គេម ហើយជ័យជម្នះបានធ្វើឲ្យកញ្ញា ក្លាយជាអត្តពលិករបស់កម្ពុជាដ៏លេចធ្លោម្នាក់ ដែលរក្សាការឈ្នះមេដាយមាស បាន ៣ លើកជាប់ៗគ្នា នៅក្នុងព្រឹត្តិការណ៍ស៊ីហ្គេមនេះ។
ល្បុក្កតោ និង ជឺជិតស៊ូ បង្កើតកំណត់ត្រាឈ្នះមេដាយមាស នៅក្នុងការប្រកួតស៊ីហ្គេម
យ៉ាងណាមិញ ក្រុមអត្តពលិកល្បុក្កតោ និងកីឡាជឺជិតស៊ូ សុទ្ធតែបានបង្កើតប្រវត្តិសាស្រ្តថ្មី ក្នុងការដណ្តើមបានមេដាយមាសឲ្យកម្ពុជា នៅស៊ីហ្គេម។ បើទោះបីជាប្រភេទកីឡាទាំង ២ នេះ ទើបតែត្រូវបានដាក់ឲ្យចូលរួមប្រកួតស៊ីហ្គេម ជាលើកដំបូង ប៉ុន្តែកីឡាករល្បុក្កតោ យ៉ង់ ម៉េងលី បានឈ្នះមេដាយមាសឲ្យកម្ពុជា បានមុនគេ ក្នុងការប្រកួតកីឡា Arnis របស់ម្ចាស់ផ្ទះហ្វីលីពីន ហើយក្រុមល្បុក្កតោ ក៏បានឈ្នះមេដាយប្រាក់ ២ និងសំរឹទ្ធចំនួន ១៧ ទៀតផងដែរ។
ចំណែកវីរកីឡាការិនី ខាន់ ចេសា ដែលធ្លាប់បានឈ្នះមេដាយមាស ក្នុងការប្រកួតកីឡាអាស៊ី នៅប្រទេសឥណ្ឌូនេស៊ីនោះ បានក្លាយជាបេក្ខភាពរបស់កីឡា ជឺជីតស៊ូ តែម្នាក់គត់ ដែលឈ្នះបានមេដាយមាស ស៊ីហ្គេម ឆ្នាំ ២០១៩។
ជាមួយគ្នានេះ សូហ្វតិន្នីស និង Kickboxing បានក្លាយជាប្រភេទកីឡាថ្មី ដែលបានបង្កើតប្រវត្តិសាស្រ្តថ្មី ក្នុងការឈ្នះបានមេដាយសំរឹទ្ធឲ្យកម្ពុជា សម្រាប់ការបង្ហាញខ្លួនជាលើកដំបូង ក្នុងព្រឹត្តិការណ៍នេះ ដោយក្នុងនោះ ក្រុមសូហ្វតិន្នីសកម្ពុជា ឈ្នះបានមេដាយសំរឹទ្ធចំនួន ២ ហើយ Kickboxing ឈ្នះបានមេដាយសំរឹទ្ធ ៣។
ក្រុមបាល់ទាត់ និងតេក្វាន់ដូ ITF សុទ្ធតែបានបំបែកកំណត់ត្រាប្រវត្តិសាស្រ្ត ដើម្បីលុបបំបាត់ការរង់ចាំ
ដោយឡែក ក្រុមបាល់ទាត់ជម្រើសជាតិកម្ពុជា បានបំបែកកំណត់ត្រាប្រវត្តិសាស្រ្ត គឺការប្រជែងបានឡើងទៅដល់វគ្គពាក់កណ្តាលផ្តាច់ព្រ័ត្រ ក្នុងការប្រកួតស៊ីហ្គេម ជាលើកដំបូង បន្ទាប់ពីពួកគេទន្ទឹងរង់ចាំអស់រយៈពេល ៥៨ ឆ្នាំ ប៉ុន្តែពួកគេដណ្តើមមិនបានមេដាយទេ ខណៈក្រុម U22 កម្ពុជា បានចាញ់ក្រុមវៀតណាម ៤-០ និងបន្តចាញ់ក្រុមមីយ៉ាន់ម៉ា ដោយការទាត់បាល់ប៉េណាល់ទី ៥-៤ ក្នុងការប្រកួតដណ្តើមយកលេខ ៣ ឬមេដាយសំរឹទ្ធនោះ។
ចំណែកក្រុមតេក្វាន់ដូ ITF កម្ពុជា បានឈ្នះមេដាយមាស ពីការប្រកួតជើងឯកពិភពលោក ជាលើកដំបូង ក្រោយទន្ទឹងរង់ចាំអស់រយៈពេលជាង ២៥ ឆ្នាំ។
កីឡាករ ប៉ាល់ ជីវ័ន គឺជាអ្នកឈ្នះមេដាយមាស ជាប្រវត្តិសាស្រ្ត ពីការប្រកួត World Taekwon-do ITF Championship នៅប្រទេស ប៊ុលហ្គារី កាលពីខែកញ្ញានោះ ហើយក្រុមតេក្វាន់ដូ ITF ក៏ដណ្តើមបានមេដាយប្រាក់ ២ និងសំរឹទ្ធ ២ ទៀតផងដែរ។
ទន្ទឹងជាមួយគ្នានេះ ក្រុមអត្តពលិកវ៉ូវីណាមកម្ពុជា បានឈ្នះមេដាយមាសរហូតដល់ ៩ រួមជាមួយមេដាយប្រាក់ ១០ និងសំរឹទ្ធ ១២ សម្រាប់ការធ្វើជាម្ចាស់ផ្ទះការប្រកួតកីឡា វ៉ូវីណាមជើងឯកពិភពលោក ជាលើកដំបូង កាលពីខែធ្នូ។ រីឯកីឡាករម៉ូតូទឹកកម្ពុជា សាលី អ៊ូមើត បានបន្តឈ្នះតំណែងជើងឯក នៅក្នុងការប្រកួតកីឡាម៉ូតូទឹកជើងឯកពិភពលោក នៅប្រទេសថៃ។
ចំណែកកីឡាការិនីស្នូកឃ័រ ស្រួង ភាវី និងក្រុមអត្តពលិកកីឡារាំកម្ពុជា ដណ្តើមបានមេដាយមាស នៅក្នុងការកម្រិតអាស៊ីដូចគ្នា ខណៈប្រភេទកីឡាមួយចំនួនទៀត ក៏បានឈ្នះមេដាយ ពីការប្រកួតស៊ីហ្គេម ជើងឯកអាស៊ី និងអាស៊ានផងដែរ ហើយលទ្ធផលទាំងនេះ ត្រូវបានអ្នកជំនាញវាយតម្លៃថា វិស័យកីឡាកម្ពុជា ក្នុងឆ្នាំ ២០១៩ មានផលវិជ្ជមានឆ្ពោះទៅមុខគួរឲ្យកត់សម្គាល់។
លោក វ៉ាត់ ចំរើន អគ្គលេខាធិការ NOCC បានប្រាប់ភ្នំពេញប៉ុស្តិ៍ កាលពីថ្ងៃពុធថា៖ «តាមការវាយតម្លៃ គឺក្នុងឆ្នាំ ២០១៩ យើងឃើញកម្រិតបច្ចេកទេសមានការរីកចម្រើន និងលេចធ្លោ ទៅលើប្រភេទកីឡាមួយចំនួនធំ ដោយសារយើងមានការប្រកួតនៅក្រៅប្រទេស និងមានលទ្ធផលជយលាភីច្រើន ហើយការប្រកួតកម្រិតពិភពលោក ទាំងតេក្វាន់ដូ ITF ប៉េតង់ និង វ៉ូវីណាម ឃើញមានការរីកចម្រើន»។
លោកវ៉ាត់ ចំរើន ដែលជាអគ្គលេខារបស់ CAMSOC ផងនោះបន្តថា៖ «ចំណែកលទ្ធផលការប្រកួតស៊ីហ្គេម គឺចំនួនមេដាយ យើងដណ្តើមបាន គឺច្រើនជាងការប្រកួតមុនៗទាំងអស់ គឺមាស ៤ ប្រាក់ ៦ និងសំរឹទ្ធ ៣៦ ដែលនេះជាសញ្ញាណល្អ។ ចំណែកហេដ្ឋារចនាសម្ព័ន្ធ គឺប្រមុខរាជរដ្ឋាភិបាល បានទៅពិនិត្យ និងសម្រេចការសាងសង់ជាគ្រោងឆ្អឹង និងដាក់ផ្គុំកៅអីចុងក្រោយ នៅពហុកីឡដ្ឋានជាតិមរតតេជោ ដែលនេះជានិមិត្តរូបនៃភាពជឿនលឿន ហើយការរាប់ថយក្រោយ និងការកំណត់ថ្ងៃប្រកួតស៊ីហ្គេម ឆ្នាំ ២០២៣ ក៏បានធ្វើវេទិកាជាតិ និងផ្សព្វផ្សាយរួចមកហើយ អ៊ីចឹងឃើញថា អ្វីៗមានភាពរលូន និងដើរទៅមុខល្អ»។
អ្នកជំនាញកីឡារូបនេះ បានបញ្ជាក់ថា៖ «សម្រាប់ការវាយតម្លៃចុងក្រោយ គឺទាំងបច្ចេកទេស និងការងាររដ្ឋបាលកីឡា មានការជឿនលឿន ចំណែកការបំផុសចលនាឲ្យមានការគាំទ្រពីមហាជន ក៏មានការផុសផុលខ្លាំង ដោយក្នុងនោះកីឡាបាល់ទាត់ មានការរីកលូតលាស់ខ្លាំង និងមានការចាប់អារម្មណ៍ខ្លាំងពីមហាជន ព្រោះទាំងក្រុម U18 ក៏បានឈ្នះថៃ ឯក្រុម U22 ក៏បានឡើងទៅដល់វគ្គ ១/២ ផ្តាច់ព្រ័ត្រ នៅស៊ីហ្គេម ដែលជារឿងភ្ញាក់ផ្អើល និងបានទាញអារម្មណ៍ប្រភេទកីឡាផ្សេងៗទៀតឲ្យមើលឃើញថា វិស័យកីឡារបស់យើង មាន ការរីកចម្រើន ដោយកំពុងតែរុញទៅមុខនិងមានសង្ឃឹមក្នុងការឆ្ពោះទៅធ្វើម្ចាស់ផ្ទះការប្រកួតស៊ីហ្គេម លើកទី ៣២ ឆ្នាំ ២០២៣»៕