.jpg)
ការប្រកួតធ្វើតេស្តរបស់ក្រុមចំបាប់ជម្រើសជាតិ ហើយឆ្នាំនេះចំបាប់នឹងចូលប្រកួតស៊ីហ្គេមជាថ្មី។ ភ្នំពេញប៉ុស្តិ៍
ភ្នំពេញៈ ក្រុមអត្តពលិកនៃក្រុមជម្រើសជាតិកម្ពុជាព្រមទាំងគ្រូបង្វឹក និងគ្រូជំនួយមកពីសហព័ន្ធកីឡាជាតិចំនួន ៣៤ នឹងត្រូវចូលជំរំហ្វឹកហាត់ក្នុងការប្រមូលផ្តុំរយៈពេល ៧ ខែដែលនឹងចាប់ផ្តើមនៅថ្ងៃទី ២៦ ខែមេសានេះនឹងគ្រោងបញ្ចប់នៅថ្ងៃទី ២៥ ខែវិច្ឆិកា ឆ្នាំ ២០១៩ ហើយមន្ត្រីជំនាញកីឡាបានអះអាងតាមផែនការថា កីឡាករ ឬកីឡាការិនីម្នាក់អាចលេងបានតែ ១ ជំនាញ ឬ ១ ប្រភេទកីឡាប៉ុណ្ណោះ ដើម្បីសម្រួចសមត្ថភាពបច្ចេកទេសទៅដណ្តើមមេដាយស៊ីហ្គេមឲ្យទទួលបានលទ្ធផលខ្ពស់។
លោក ប៉ុន សុខ នាយកមជ្ឈមណ្ឌលជាតិហ្វឹកហ្វឺនកីឡាបានប្រាប់ភ្នំពេញ ប៉ុស្តិ៍ថា៖ «ការប្រមូលផ្តុំក្រុមកីឡាជម្រើសជាតិប្រចាំឆ្នាំ ២០១៩ នឹងចាប់ផ្តើមដោយមានកំណែទម្រង់ទៅតាមបទដ្ឋានបច្ចេកទេសក្នុងគោលបំណងអប់រំបណ្តុះបណ្តាលឆ្ពោះទៅរកជោគជ័យក្នុងការប្រកួតកីឡាស៊ីហ្គេម ហើយតាមគោលការណ៍ថ្នាក់ជាតិ អត្តពលិកគ្រប់ប្រភេទកីឡាទាំងអស់គឺក្នុងម្នាក់ៗអនុញ្ញាតឲ្យលេងតែមួយប្រភេទកីឡាប៉ុណ្ណោះ តែបើប្រភេទកីឡាតែមួយអាចលេងបាន ២ ឬ ៣ វិញ្ញាសាទៅតាមលក្ខខណ្ឌបច្ចេកទេសកំណត់»។
លោកថាសហព័ន្ធកីឡាជាតិត្រូវអនុវត្តឲ្យបាននូវគោលការណ៍ «កីឡាករម្នាក់ជំនាញពិសេស ១» ក្នុងនោះសហព័ន្ធកីឡាជាតិ គ្រូបង្វឹក អត្តពលិកត្រូវរៀបចំតម្រង់ទិសជំនាញដោយអត្តពលិកម្នាក់ត្រូវជ្រើសរើសប្រភេទកីឡាតែ ១ មុខ ហើយអត្តពលិកម្នាក់ៗត្រូវកំណត់ដុសខាត់សម្រួចឯកទេសជំនាញនៃទេពកោសល្យបច្ចេកទេសក្នុងតួនាទីជំនាញច្បាស់លាស់។ ការសម្រួចឯកទេសបែបនេះគឺដើម្បីធ្វើឲ្យមានក្ដីសង្ឃឹមនៃការដណ្ដើមមេដាយក្នុងការប្រកួតស៊ីហ្គេមឆ្នាំ ២០២៣ ទទួលបានជោគជ័យតាមផែនការកីឡារបស់ជាតិ។
លោក ប៉ុន សុខ លម្អិតថា៖ «ឆ្នាំនេះក្រុមជម្រើសជាតិមានចំនួន ៥០៤ នាក់មកពី ៣៤ សហព័ន្ធកីឡាជាតិក្នុងនោះមានគ្រូបង្វឹក ៩០ នាក់កីឡាករ ២៨៤ នាក់ និងកីឡាការិនី ៩៣ នាក់គឺកើនលើសឆ្នាំមុនចំនួន ៤៤ នាក់ ហើយការហូបចុក ស្នាក់នៅ ត្រូវធ្វើតាមបទដ្ឋានកីឡាអន្តរជាតិក្នុងនោះការហ្វឹកហាត់ត្រូវត្រួតពិនិត្យវាយតម្លៃពីគ្រូបង្វឹក និងអនុរក្សព្រមទាំងធ្វើតេស្តរយៈពេល ៣ ខែម្តង»។
ទាក់ទងការប្រមូលផ្តុំនេះដែរលោក ថោង ខុន ប្រធានគណៈកម្មាធិការជាតិអូឡាំពិកកម្ពុជាធ្លាប់មានប្រសាសន៍ថា៖ «ដើម្បីអភិវឌ្ឍកីឡាករកម្រិតខ្ពស់ឲ្យមានប្រសិទ្ធភាពនោះគឺត្រូវឈរលើទ្រឹស្ដីវិទ្យាសាស្ដ្រកីឡាដែលទាមទារឲ្យមានសកម្មភាពជាប្រចាំក្នុងការហាត់ហ្វឹកហ្វឺន និងចូលរួមប្រកួតឲ្យបានច្រើន ហើយត្រូវមានមូលដ្ឋានហ្វឹកហាត់លើគុណភាពកម្លាំងកាយ បច្ចេកទេសស្មារតីដោយមានសាល និងឧបករណ៍សម្ភារបង្កើនគុណភាពកម្លាំងកាយគ្រប់គ្រាន់»។
លោកបញ្ជាក់ថា៖ «កន្លងមកមានកីឡាករ កីឡាការិនីខ្លះបានហ្វឹកហាត់ និងចូលរួមប្រកួតទៅលើប្រភេទកីឡា ២ ឬ ៣ ផ្សេងៗគ្នាដែលមិនបានសម្រួចចំគោលដៅល្អ។ មួយវិញទៀតអត្តពលិកខ្លះចាប់យកវិញ្ញាសាច្រើនច្របូកច្របល់គ្នា ពេលខ្លះត្រូវផ្លាស់ប្ដូរវិញ្ញាសាហ្វឹកហាត់ជាច្រើនដង ឬប្ដូរមុខងារ ក្នុងក្រុមច្រើនដងនាំឲ្យនិរន្ដរភាពជំនាញ និងពន្លឿនគុណផលកីឡាធ្លាក់ចុះ»។
គួរបញ្ជាក់ថាប្រភេទកីឡាទាំង ៣៤ ដែលបានដាក់ឲ្យប្រមូលផ្តុំនៅឆ្នាំនេះមាន កីឡា ចំបាប់ ប៉េតង់ តេក្វាន់ដូ WTF ប្រដាល់គុនខ្មែរ សីដក់ ជិះសេះ វាយកូនបាល់ ប្រដាល់សកល ជឺជីតស៊ូ បាល់ទះ (ក្នុងសាល ឆ្នេរខ្សាច់) អត្តពលកម្ម បាល់បោះ ហែលទឹក វូស៊ូ កាយសម្ព័ន្ធ ប្រណាំងទោចក្រយាន គុនដាវ សូហ្វតិន្នីស វាយកូនឃ្លីលើតុ វាយសី ទ្រីយ៉ាត្លុង ទូកប្រពៃណី និងអន្តរជាតិ យូដូ ទូកក្តោង វាយកូនគោល បាញ់កាំភ្លើង កីឡារាំ វ៉ូវីណាម គុនល្បក្កតោ តេក្វាន់ដូ ITF សូរីនហ្ស៊ិកាំប៉ូ អុកចត្រង្គ និងកីឡាម៉ូតូទឹក។ ដោយឡែកក្រុមកីឡាជនពិការក៏មានការប្រមូលផ្តុំជាក្រុមជម្រើសជាតិផងដែរ៕
