សាល់វ៉ាដ័រៈ លទ្ធផលប្រកួតរវាងប្រទេស ប្រេស៊ីល និងប្រទេស វ៉េណេស៊ុយអេឡា ស្មើគ្នា ០-០ នៅព្រឹត្តិការណ៍ Copa America កាលពីថ្ងៃអង្គារក្រោយពីវីដេអូជំនួយអាជ្ញាកណ្ដាល (VAR) មិនបានផ្ដល់គ្រាប់បាល់ចុងក្រោយដែលស៊ុតដោយកីឡាករ Philippe Coutinho នៅប៉ុន្មាននាទីចុងក្រោយនៃការប្រកួតនេះ។
ក្នុងការប្រកួតនេះប្រេស៊ីលស៊ុតបញ្ចូលទី ៣ លើកដែលលើកទី១ នៅចុងតង់ទី១ ហើយ ១ លើកទៀតនៅដើមតង់ទី២ និងលើកចុងក្រោយគឺនៅចុងតង់ទី២ ដែលស៊ុតដោយកីឡាករ Coutinho ប៉ុន្តែត្រូវបានអាជ្ញាកណ្ដាលមិនផ្ដល់គ្រាប់បាល់ឲ្យទាំងអស់ ធ្វើឲ្យការប្រកួតមួយនេះបញ្ចប់ទៅក្នុងលទ្ធផល ០-០។
គ្រាប់បាល់ចូលទីចុងក្រោយនៅនាទីទី៨៧ នោះបានធ្វើឲ្យកីឡាករ Coutinho គិតថាគាត់បានជួយឲ្យប្រេស៊ីលឡើងទៅវគ្គ ៨ ក្រុមចុងក្រោយ នៅពេលគាត់បានស៊ុតបាល់ចូលទីក្រោយពីទទួលបាល់ពីកីឡាករ Everton Soares នៅទីលានប្រកួត Arena Fonte Nova នៅទីក្រុងសាល់វ៉ាដ័រប្រទេសប្រេស៊ីល។
ប៉ុន្តែអាជ្ញាកណ្ដាលសញ្ជាតិស៊ីលីលោក Julio Bascunan មិនបានផ្ដល់គ្រាប់បាល់ឲ្យប្រេស៊ីលទេក្រោយពីទទួលបានការជំនួយពីវីដេអូ VAR ដោយសារមានការប៉ះពាល់ពីខ្សែប្រយុទ្ធ Roberto Firmino ទោះជាគេមិនទាន់ច្បាស់ថា តើ Firmino ស្ថិតនៅតំបន់ offside ឬយ៉ាងណាទេ ខណៈបាល់បានហោះកាត់មុខគាត់ហើយចូលទី។
ទោះជាស្មើគ្នាក៏ដោយ ប៉ុន្តែប្រេស៊ីលនៅតែបន្តឈរនៅលើកំពូលតារាងនៅពូល A ដដែលដោយមាន ៤ ពិន្ទុ និង ២ ប្រកួតគឺនៅសល់ ១ ប្រកួតទៀត។
ចំណែកវ៉េណេស៊ុយអេឡាវិញគឺមាន ២ ពិន្ទុ និង ២ ប្រកួត ហើយប្រទេសនេះនឹងប៉ះបូលីវី ដែលចាញ់ទាំង ២ លើក ខណៈការប្រកួតចុងក្រោយរបស់បូលីវីគឺចាញ់ប៉េរូ ៣-១ ពីថ្ងៃអង្គារ។
ជុំវិញលទ្ធផលនេះគ្រូបង្វឹកជម្រើសប្រេស៊ីលលោក Tite មិនមានចម្ងល់ទេចំពោះការសម្រេចរបស់អាជ្ញាកណ្ដាលក្រោមជំនួយវីដេអូ VAR ទាំង ២ លើកនេះ។
គ្រូបង្វឹករូបនេះបាននិយាយថា៖ «ពួកគេបានវិនិច្ឆ័យត្រឹមត្រូវចំពោះគ្រាប់បាល់ទាំង ២ គ្រាប់ចុងក្រោយនេះ ព្រោះវីដេអូ VAR គឺត្រឹមត្រូវហើយ ហើយខ្ញុំពិតជាគ្មានអ្វីត្រូវតវ៉ាទេព្រោះយើងទទួលបានយុត្តិធម៌ហើយ»។
ចំណែកគ្រូបង្វឹកជម្រើសជាតិវ៉េណេស៊ុយអេឡាលោក Rafael Dudamel វិញបានសរសើរទម្រង់លេងសឹងតែល្អបំផុតរបស់ក្រុមគាត់។
លោក Dudamel និយាយថា៖ «ថ្ងៃនេះគឺសំខាន់ណាស់ ប៉ុន្តែលទ្ធផលនេះនឹងគ្មានន័យទេ ប្រសិនបើយើងមិនទទួលបានពិន្ទុបន្ថែមទៀតនៅក្នុងពូលនេះ»។
ប្រទេស ប្រេស៊ីល ដែលបានខិតខំយកឈ្នះប្រទេសបូលីវីនៅពេលប្រកួតបើកឆាករបស់ពួកគេនោះជាថ្មីម្ដងទៀតពួកគេចង់ទទួលបានលទ្ធផលបែបនោះនៅពេលប៉ះជាមួយគូប្រកួតដែលបានរៀបចំជើងប្រួលបានល្អនេះ។
គ្រូបង្វឹករូបនេះបានបន្ថែមថា៖ «យើងមិនបានអ្វីដែលយើងកំពុងតែស្វះស្វែងរកនោះទេ។ ក្រុមនេះដូចជាអន្ទះសាបន្តិចនៅក្នុងចំណុចនោះ។ យើងត្រូវតែពង្រឹងសមត្ថភាពរបស់យើងគឺយើងត្រូវរូតរះថែមទៀតគឺមិនត្រូវពឹងតែទៅលើអ្នកចាំទីតែម្នាក់ឯងនោះទេ»។
ក្នុងការប្រកួតលើកក្រោយគឺប្រេស៊ីលនឹងប៉ះជាមួយប៉េរូ ខណៈវ៉េណេស៊ុយអេឡានឹងប៉ះជាមួយបូលីវីនៅថ្ងៃទី ២៣ ខែមិថុនានៅសប្ដាហ៍ក្រោយ៕ SN