.jpg)
ឃីម បូរ៉ា បានព្យាយាមទាត់ស្កាត់ការចូលម៉ាត់របស់អ្នកប្រដាល់ថៃ Phat Pha Ngarm កាលពីថ្ងៃអាទិត្យ។ រូបថត យឺន ពន្លក
ភ្នំពេញ៖ កីឡាករកម្ពុជា ផាន់ គ្រាន់ មកពីក្លិបមិត្តប៉ូលិសនៃសមាគមប្រដាល់ក្រសួងមហាផ្ទៃ ដែលត្រៀមខ្លួនហ្វឹកហាត់បានល្អ ប៉ុន្តែនៅតែមិនអាចគេចផុតពីការចាញ់ដោយសន្លប់បាន ខណៈរូបគេបានទទួលរងការបុកជង្គង់ចូលធ្ងន់ៗរបស់អ្នកប្រដាល់ថៃ Kieth Phit ក្នុងការប្រកួតមិត្តភាពអន្តរជាតិ នៅសង្វៀនអាស៊ីអាគ្នេយ៍កាលពីយប់ថ្ងៃអាទិត្យ។
ជាមួយគ្នានេះ កីឡាករមកពីជាយដែន ឃីម បូរ៉ា របស់ក្លិបរស្មីភូមិគាបខេត្ដបន្ទាយមានជ័យ បានតស៊ូជាមួយជើងខ្លាំងរបស់ថៃ Phat Pha Ngarm ចំនួន ៥ ទឹកពេញ ទទួលបានលទ្ធផលត្រឹមស្មើគ្នា ខណៈដែលកីឡាករថៃល្អជើង ឯ បូរ៉ា វ៉ៃកណ្តាប់ដៃបកបានល្អវិញផងដែរ។
នៅមុនការប្រកួតនេះចាប់ផ្តើម គឺទាំងកីឡាករ ផាន់ គ្រាន់ និង ឃីម បូរ៉ា ត្រូវបានអ្នកនិយមទស្សនាភាគច្រើនលើសលប់ហ៊ានព្យាករថា កីឡាករកម្ពុជាទាំង ២ នេះ ពិតជាលំបាកស្វែងរកជ័យជម្នះណាស់ ព្រោះបេក្ខភាពរបស់កីឡាករថៃ សុទ្ធតែជាកីឡាករលំដាប់ជើងខ្លាំងមានបទពិសោធល្អគួរឲ្យកត់សម្គាល់ ហើយជាក់ស្តែង ផាន់ គ្រាន់ ត្រូវបាន Kieth Phit បុកជង្គង់ឲ្យសន្លប់ត្រឹមទឹកទី ២។
ផាន់ គ្រាន់ និយាយក្រោយពីចាញ់ដោយសន្លប់ថា៖ «វាពិតជាមានការលំបាកទប់ទល់ណាស់ ព្រោះខ្ញុំលំបាកចូលកៀក ដោយសារក្បាច់ប្រកួតរបស់កីឡាករថៃ Kieth Phit នេះមានស្នៀតការពារល្អ បោះជង្គង់ចូលគោលដៅល្អ គឺទ្រូង និងពោះ បណ្តាលឲ្យខ្ញុំថមថយកម្លាំងភ្លាមៗហើយមូលហេតុដែលខ្ញុំចាញ់ គឺដោយសារមិនអាចចូលជិត ដើម្បីឱបឡើងជង្គង់បាន ចំណែកវ៉ៃឆ្ងាយវិញ គេខ្ពស់ជាងខ្ញុំ គឺវ៉ៃមិនទាន់គេ»។
ទៅបីជាយ៉ាងណា ផាន់ គ្រាន់ បានបញ្ជាក់ថា៖ «ខ្ញុំមិនបោះបង់ចោលការព្យាយាមហ្វឹកហាត់នោះទេ ព្រោះការវិលមកហ្វឹកហាត់បំប៉នឡើងវិញនេះ ខ្ញុំមានទីផ្សារប្រកួតច្រើន ដោយសារខ្ញុំវ៉ៃអស់ពីសមត្ថភាព ប៉ុន្តែបញ្ហាចាញ់ ឬឈ្នះ ជារឿងធម្មតា ដែលយើងគេចមិនផុតនោះឡើយ។ខ្ញុំចង់ឡើងប្រកួតសងសឹកម្តងទៀត ដើម្បីប្តូរយុទ្ធសាស្ត្រយកឈ្នះឲ្យបាន»។
ចំណែកកីឡាករ ឃីម បូរ៉ា ដែលប្រកួតតស៊ូបានចំនួន ៥ ទឹកពេញនោះ ក៏អាចចាត់ទុកថា ធ្វើបានល្អ ខណៈក្នុងទម្ងន់ ៥៧ ឬ ៦០ គីឡូក្រាមនេះ កីឡាករកម្ពុជាច្រើនណាស់ ដែលបានចាញ់ក្រោមស្នៀតទាត់ និងជង្គង់របស់ថៃ Phat Pha Ngarm រូបនេះ។
ក្នុងការប្រកួត ៣ ទឹកដំបូង Phat Pha Ngarm វាយប្រហារជើងក្រោម ចូលគោលដៅល្អ និងមានប្រៀបលើ បូរ៉ា បន្តិច ប៉ុន្តែឈានចូលដល់ទឹកទី ៤ និងទី ៥ ឃីម បូរ៉ា បានប្តូរយុទ្ធសាស្ត្រ ពីស្នៀតទាត់ ដែលមិនសូវទទួលបានផលល្អ ទៅជាវាយបកតាមក្បាច់កណ្តាប់ដៃវិញ។
ឃីម បូរ៉ា វាយបកផង និងមានក្បាច់ការពារគេចចេញពីការទាត់ជើងក្រោមបានល្អ ហើយវាយបកវិញ ដោយកណ្តាប់ដៃចូលគោលដៅបានយ៉ាងល្អ ធ្វើឲ្យពិន្ទុរបស់គេ ទទួលបានមកវិញ។ លទ្ធផលចប់ការប្រកួតចំនួន ៥ ទឹកពេញពិន្ទុពីសំណាក់ចៅក្រមទាំង ៥ បានផ្តល់ជូនប្រផិតប្រផើយ ៣ ទល់នឹង ២ ប៉ុន្តែលទ្ធផលផ្លូវការ ត្រូវទាញឲ្យស្មើគ្នា ដោយគ្មានការតវ៉ាពីភាគីណាឡើយ។
លោក ចាន់ សុទ្ធ ប្រធានវិនិច្ឆ័យប្រចាំសង្វៀន SEATV បានប្រាប់ថា៖ «យើងទាញឲ្យស្មើគ្នា ដោយសារតែពិន្ទុប្រហាក់ប្រហែលគ្នា ចំណែកការ-ប្រកួតនេះ គ្រាន់តែជាលក្ខណៈមិត្តភាពអន្តរជាតិប៉ុណ្ណោះ ហើយការធ្វើបែបនេះ ដើម្បីឲ្យកីឡាករ ឃីម បូរ៉ា គេមានទឹកចិត្តផងដែរ»៕
