ភ្នំពេញៈ កីឡាករជើងខ្លាំង ពេជ្រ ម្ទេសខ្មាំង បានបង្ហាញពីការតាំងចិត្តខ្ពស់ ក្នុងការយកឈ្នះថៃ Khompichhith ក្នុងការប្រកួតសន្សំពិន្ទុ លើកទី ៣ ដណ្តើមខ្សែក្រវាត់ គូបូតា ទម្ងន់ ៥៧ គ.ក្រ នៅលើសង្វៀនបាយ័នស្ទឹងមានជ័យ យប់ថ្ងៃសុក្រនេះ ខណៈជើងខ្លាំង សុខ ធី ក៏ត្រូវប្រជែងយក ៣ ពិន្ទុជាមួយឡាវ Thannu Petch ផងដែរ។
ការភ្លាត់ចាញ់ពិន្ទុឡាវ Thannu Petch ដោយបញ្ហាសុខភាព ក្នុងការប្រកួតបើកឆាក កាលពីថ្ងៃទី ១២ ខែមករា កន្លងមកនេះ បានធ្វើឲ្យ ពេជ្រ ម្ទេសខ្មាំង ហាក់មានសម្ពាធខ្លាំង សម្រាប់ការប្រកួតលើកនេះ បើទោះបីជារូបគេបានម៉ាត់ថៃ Rouenthai ឲ្យសន្លប់ក្នុងទឹកទី ១ ក៏ដោយ ព្រោះនៅពេលនេះ សុខ ធី, ចាន់ ស៊ីណាត និង ឡុង ជិន សុទ្ធតែឈ្នះទាំង ២ ប្រកួត និងមានប្រៀបជាងរូបគេ ក្នុងការទទួលបានឱកាសទៅវគ្គបន្ត។
ជាមួយលទ្ធផលនេះ បានធ្វើឲ្យ ពេជ្រ ម្ទេសខ្មាំង ដែលកំពុងឈរនៅលេខ ៤ ក្នុងចំណោមបេក្ខភាពទាំង ៨ នាក់ ត្រូវការយកឈ្នះ Khompichhith ដាច់ខាត សម្រាប់ការប្រកួតលើកនេះ ទើបរូបគេនៅមានឱកាសប្រជែងឡើងទៅវគ្គពាក់កណ្តាលផ្តាច់ព្រ័ត្រ ដែលគេតម្រូវយកកីឡាករមានពិន្ទុខ្ពស់ជាងគេចំនួន ៤ នាក់ (មិនគិតពីបរទេសឬខ្មែរ) ដើម្បីឲ្យប្រកួតខ្វែង រកអ្នកឈ្នះ ២ នាក់ ឡើងទៅវគ្គផ្តាច់ព្រ័ត្រ។
ពេជ្រ ម្ទេសខ្មាំង បានប្រាប់ កាលពីម្សិលមិញ ថា៖ «ខ្ញុំត្រូវតែឈ្នះការប្រកួតលើកនេះ។ ខ្ញុំមិនទាន់ហ៊ានកំណត់ថា ខ្ញុំអាចផ្តួល Khompichhith ឲ្យសន្លប់ ឬយ៉ាងណានោះទេ ប៉ុន្តែរឿងដែលសំខាន់ គឺខ្ញុំត្រូវខំប្រឹងយកឈ្នះ ទោះក្នុងកម្រិតណា ក៏ខ្ញុំពេញចិត្តទទួលយកដែរ»។
សិស្សគណក្លិបអរុណរះកីឡារូបនេះ បានបន្ថែមថា៖« Khompichhith គេល្អដែរ និងខ្ពស់ជាងខ្ញុំ។ ខ្ញុំធ្លាប់ឈ្នះពិន្ទុគេ សម្រាប់ការប្រកួតមិត្តភាពអន្តរជាតិ បានម្តង ប៉ុន្តែការជួបគ្នាលើកនេះ ខ្ញុំបានប្រឹងប្រែងហ្វឹកហាត់ជាងមុន ដោយសារនេះជាការប្រកួតដណ្តើមខ្សែក្រវាត់ ដែលជាឱកាសមិនងាយរកបាន។ អ៊ីចឹងខ្ញុំត្រូវតែខំប្រឹង ព្រោះបើសិនជាខ្ញុំភ្លាត់ចាញ់តែមួយប្រកួតទៀត ខ្ញុំអាចនឹងបាត់ឱកាស សម្រាប់ការឡើងទៅវគ្គបន្ត»។
សម្រាប់ការប្រកួត ២ លើកកន្លងមកនេះ Khompichhith បានចាញ់ទាំង ២ ប្រកួត ដោយលើកទី១ គេបានចាញ់ សុខ ធី នៅទឹកទី ៤ និងលើកទី ២ ចាញ់ ចាន់ ស៊ីណាត ទឹកទី២ ដោយសារបានវាយថែមពីក្រោយខុសលក្ខខណ្ឌនៃការប្រកួតបណ្តាលឲ្យ ស៊ីណាត សន្លប់។
ដោយឡែក ការជួបគ្នារវាង សុខ ធី និងឡាវ Thannu Petch បានក្លាយជាការប្រកួតគួរឲ្យចាប់អារម្មណ៍ខ្លាំង ព្រោះ Thannu Petch បានក្លាយជាកីឡាករបរទេសតែម្នាក់គត់ ដែលបានឈ្នះ ១ ប្រកួត គឺឈ្នះពិន្ទុ ពេជ្រ ម្ទេសខ្មាំង។
ប៉ុន្តែការមកសន្លប់ត្រឹមទឹកទី ២ ក្រោមស្នាដៃជើងថ្មី ឡុង ជិន ក្នុងការប្រកួតជើងទី ២ ត្រូវបានគេគិតថា Thannu Petch ពិបាកយកឈ្នះ សុខ ធី ណាស់ ព្រោះ សុខ ធី មានក្បាច់សម្លាប់ច្រើន និងមានភាពរឹងមាំទៀតផង ទោះរូបគេទាបជាង Thannu Petch ក៏ដោយ៕