ភ្នំពេញ៖ ព្រឹត្តិការណ៍ជួបជុំក្រុមម៉ូតូធំ Motorrad Angkor Festival នឹងត្រូវរៀបចំឡើងនៅលើផ្ទៃដីជាង ៨ ហិកតា នៅតំបន់អង្គរឃ្យូងយូរ តាមបណ្តោយផ្លូវ ៦០ ម៉ែត្រ ទល់មុខសណ្ឋាគារសុខា ក្រុងសៀមរាប ខេត្តសៀមរាប នាថ្ងៃទី ៦ ដល់ទី ៨ ខែ ធ្នូ ឆ្នាំ ២០១៩ ខាងមុខនេះ ហើយក្នុងនោះក៏មានការប្រណាំងម៉ូតូត្រៃ ម៉ូតូធំ និងម៉ូតូកែច្នៃ ជាមួយក្រុមនិយមជិះម៉ូតូមកពីថៃ វៀតណាម ឡាវ សិង្ហបុរី ម៉ាឡេស៊ី ចិន ស្រីលង្កា អ៊ីរ៉ង់ ហ្វីលីពីន និងឥណ្ឌូនេស៊ី ផងដែរ។
ថ្នាក់ដឹកនាំរបស់ក្រសួងបរិស្ថាន ក្រសួងទេសចរណ៍ និងសហព័ន្ធកីឡាយានយន្តកម្ពុជា ព្រមទាំងដៃគូសហការ និងម្ចាស់ឧបត្ថម្ភជាច្រើនទៀត សុទ្ធតែបានគាំទ្រ ការរៀបចំឲ្យមានព្រឹត្តិការណ៍ម៉ូតូធំនេះ ចំណែកប្រធានក្លិប BMW Motorcycle លោក អ៊ុំ សារ៉េត ដែលជាប្រធានគណៈកម្មការរៀបចំ មានការរំពឹងទុកថា ព្រឹត្តិការណ៍ដែលចំណាយទុនអស់ជាង ១២ ម៉ឺនដុល្លារមួយនេះ នឹងទទួលបានការគាំទ្រខ្លាំង ព្រោះអ្នកជិះម៉ូតូធំជាង ១ ពាន់នាក់ មកពីប្រទេសខុសៗគ្នា បានត្រៀមខ្លួនរួចរាល់អស់ហើយ ដើម្បីបង្ហាញសមត្ថភាពរបស់ពួកគេ។
លោក អ៊ុំ សារ៉េត បានថ្លែងប្រាប់ថា៖ «ដោយសារព្រឹត្តិការណ៍នេះត្រូវបានរៀបចំជាលើកដំបូងនៅកម្ពុជា រួមទាំងការផ្សព្វផ្សាយព័ត៌មានរបស់យើង បានជ្រួតជ្រាបគ្រប់ទីកន្លែង ពិសេសការខិតខំកៀរគរក្រុមម៉ូតូធំ ដែលធ្លាប់មានសម្ព័ន្ធភាពជាមួយយើង នៅក្រៅប្រទេសទៀតនោះ គឺខ្ញុំមានការជឿជាក់ខ្លាំងថា ពួកគាត់នឹងមកចូលរួម គឺតាមការប៉ាន់ប្រមាណ នឹងមានការចូលរួមមិនតិចជាង ១ ពាន់ម៉ូតូនោះទេ ហើយភ្ញៀវចូលរួមអាចមានដល់ជាង ៥ ម៉ឺននាក់ ព្រោះមានការតាំងពិព័រណ៍ផង ប្រណាំងម៉ូតូផង និងការប្រគំតន្រ្តីផងដែរ»។
បើតាមការរៀបរាប់របស់លោក អ៊ុំ សារ៉េត នៅក្នុងសន្និសីទកាសែត នៅទីស្នាក់ការ NOCC កាលពីថ្ងៃសៅរ៍ចុងសប្តាហ៍មុននេះ បានឲ្យដឹងថា ប្រទេសមួយចំនួន ដែលភាគីកម្ពុជា បានអញ្ជើញឲ្យចូលរួមនោះ គឺបានប្រាប់ពីចំនួនម៉ូតូធំ ដែលពួកគេនឹងបញ្ជូនមកចូលរួមក្នុងព្រឹត្តិការណ៍នេះហើយ ក្នុងនោះភាគីម៉ាឡេស៊ី មាន ៣៥០ ម៉ូតូ ថៃមាន ៣០០ ម៉ូតូ វៀតណាម មាន ១០០ ម៉ូតូ និងឡាវ ជាង ៦០ ម៉ូតូ ហើយតួលេខនេះ នៅមិនទាន់រាប់បញ្ចូលពីចំនួនម៉ូតូធំ ដែលនឹងចូលរួម ដោយការស្ម័គ្រចិត្ត នៅឡើយទេ។
លោក សៅ សុភាព រដ្ឋលេខាធិការក្រសួងបរិស្ថានបានថ្លែងថា៖ «ក្រសួងបរិស្ថាន ពិតជាមានការចាប់អារម្មណ៍ និងគាំទ្រព្រឹត្តិការណ៍ម៉ូតូធំនេះ ព្រោះកីឡា បានទាញការចាប់អារម្មណ៍ ព្រមទាំងការអប់រំ និងផ្សព្វផ្សាយមកលើបញ្ហាបរិស្ថាន អ៊ីចឹងតាមរយៈព្រឹត្តិការណ៍នេះ វានឹងជួយលើកកម្ពស់ការយល់ដឹងរបស់ប្រជាពលរដ្ឋ ទៅលើបញ្ហាការការពារធម្មជាតិ និងបរិស្ថាន ហើយព្រឹត្តិការណ៍នេះ ក៏មានការផ្សព្វផ្សាយអំពីសុវត្ថិភាពចរាចរណ៍ផងដែរ ហេតុនេះខ្ញុំសូមឲ្យទទួលបានជោគជ័យ»។
តាមខ្លឹមសារ ដែលត្រូវបានប្រកាសក្នុងសន្និសីទកាសែតនោះ គឺ Motorrad Angkor Festival ត្រូវបានរៀបចំឡើង ក្នុងគោលបំណងលើកកម្ពស់វិស័យកីឡាយានយន្ត ពិសេសក្រុមអ្នកជិះម៉ូតូធំ ដោយពួកគេនឹងចូលរួមផ្សព្វផ្សាយអំពីសុវត្ថិភាពចរាចរណ៍ សីលធម៌ ក្នុងការប្រើប្រាស់ផ្លូវថ្នល់ជាមួយគ្នា និងការចែករំលែកបទពិសោធបច្ចេកទេសរវាងអ្នកចូលចិត្តជិះម៉ូតូធំ។
បន្ថែមលើនេះ Motorrad Angkor Festival ក៏បានដើរតួយ៉ាងសំខាន់ក្នុងការលើកស្ទួយវិស័យទេសចរណ៍នៅកម្ពុជាផងដែរ។ លោក កាទើ មហាំម៉ាត់ណោសស្រ៊ឺ អនុរដ្ឋលេខាធិការក្រសួងទេសចរណ៍បានថ្លែងថា៖ «យើងសូមគាំទ្រយ៉ាងពេញទំហឹង លើការរៀបចំឲ្យមានព្រឹត្តិការណ៍នេះ ព្រោះកីឡាបានរួមចំណែកលើកកម្ពស់ និងផ្សព្វផ្សាយវិស័យទេសចរណ៍យ៉ាងសំខាន់ ទាំងនៅក្នុង និងក្រៅប្រទេស ដែលធ្វើឲ្យកំណើនភ្ញៀវទេសចរ មានការកើនឡើង»។
គួរបញ្ជាក់ថា នៅក្នុងព្រឹត្តិការណ៍ Motorrad Angkor Festival ដែលធ្វើនៅក្រុងសៀមរាប ខេត្តសៀមរាបចុងសប្តាហ៍នេះ នឹងមានរៀបចំឲ្យមានការប្រណាំងម៉ូតូធំរយៈពេល ៣ ថ្ងៃ និងការប្រណាំងម៉ូតូត្រៃ ម៉ូតូច្នៃ ដែលមានការចែកជាពូល។
បន្ថែមលើនេះ ក៏មានការដង្ហែក្បួនសប្បុរសធម៌ ពិព័រណ៍ពាណិជ្ជកម្មកម្ពុជា-ថៃ ចំនួន ៣៥០ ស្តង់ ការប្រគំតន្រ្តី ការសម្តែងរបស់ក្រុមម៉ូតូជំនាញ និងការផ្លាស់ប្តូរបទពិសោធជាមួយអ្នកស្រឡាញ់ម៉ូតូជាង ១ ពាន់នាក់ មកពីតំបន់អាស៊ាន ដែលនឹងបង្កើតបាននូវចំណងមិត្តភាព ហើយក្រុមទាំងនេះ ក៏នឹងចូលរួមធ្វើការងារសប្បុរសជួយដល់សង្គមកម្ពុជាផងដែរ៕