.jpg)
កីឡាការិនីស្នូកឃ័រដ៏ឆ្នើមរបស់កម្ពុជា ស្រួង ភាវី ពេលបង្ហាញសមត្ថភាពវាយស្នូកឃ័រកន្លងមក។ រូប ឈន ណន
ទីក្រុងសេអ៊ូល៖ ក្រៅពីអ្នកស្នេហាវិស័យកីឡា អ្នកស្រី ស្រួង ភាវី ប្រហែលជាមិនមែនជាមនុស្សល្បីល្បាញ ដែលប្រជាជនកម្ពុជាទូទៅ បានស្គាល់គ្រប់គ្នានោះទេ ប៉ុន្តែកីឡាការិនីស្នូកឃ័ររូបនេះ ពិតមានប្រជាប្រិយភាពខ្លាំងនៅសាធារណរដ្ឋកូរ៉េ ដោយសារអ្នកស្រីជាកីឡាការិនីឆ្នើមមួយរូបនៅកូរ៉េ និងនៅលើពិភពលោក ដែលទទួលបានមេដាយមិនតិចជាង ៣៥ និងពានរង្វាន់ជើងឯកជាច្រើនទៀត។
អ្នកស្រី ភាវី បានមកដល់ទឹកដីកូរ៉េខាងត្បូង នៅក្នុងឆ្នាំ ២០១១ បន្ទាប់ពីបានរៀបអាពាហ៍ពិពាហ៍ជាមួយបុរសកូរ៉េដែលជាម្ចាស់ក្រុមហ៊ុនបោះពុម្ពសៀវភៅតូច Geongju។ ដោយមានកំណើតនៅស្រុកសួង ខេត្តកំពង់ចាម (សព្វថ្ងៃជាទីរួមខេត្តត្បូងឃ្មុំ) អ្នកស្រី ភាវី មិនបានរៀនអ្វីពាក់ព័ន្ធនឹងកីឡាតាំងពីតូចមកនោះទេ។ អ្នកស្រីបានចាប់ផ្តើមអ្វីៗគ្រប់យ៉ាងនៅកូរ៉េ បន្ទាប់ពីមកដល់ទីនេះបាន ១ ឆ្នាំ។
កីឡាការិនីស្នូកឃ័រដ៏ឆ្នើមរបស់កម្ពុជា ស្រួង ភាវី ដែលធ្លាប់បានឈ្នះមេដាយ និងពានរង្វាន់ជាច្រើន ទាំងកម្រិតអាស៊ី និងពិភពលោកនោះ បាននិយាយថា៖ «ស្វាមីរបស់ខ្ញុំបាននិយាយថា ប្រសិនបើខ្ញុំលេងកីឡានេះ ខ្ញុំនឹងមានប្រជាប្រិយភាព ហើយខ្ញុំអាចជួយអ្នកផ្សេងទៀតផងដែរ»។
នៅក្នុងបទសម្ភាសជាមួយកាសែតភ្នំពេញប៉ុស្តិ៍ នៅទីក្រុងសេអ៊ូលប្រទេស កូរ៉េខាងត្បូង ជាទីដែលអ្នកស្រីបានចូលរួមពិធី ASEAN-KOREA Train កាលពីថ្ងៃព្រហស្បតិ៍នោះ ស្រួង ភាវី បាននិយាយថា៖ «ខ្ញុំបានចំណាយប្រាក់ប្រហែល ៣០០ ដុល្លារ រៀងរាល់ខែសម្រាប់ការហ្វឹកហាត់ ហើយខ្ញុំបានហ្វឹកហាត់រយៈពេល ៣ ឆ្នាំ។ បន្ទាប់មកខ្ញុំបានព្យាយាមពង្រឹងវាដោយខ្លួនឯង និងធ្វើការប្រកួតប្រជែងនៅតាមក្លិបជាច្រើន។ ក្រោយមក ខ្ញុំប្រកួតក្នុងព្រឹត្តិការណ៍កីឡាជាច្រើន ហើយខ្ញុំមានមោទនភាពយ៉ាងខ្លាំង ដែលបានក្លាយជាស្ត្រីកម្ពុជាលើកទី ១ ដែលបានលេងកីឡានេះ»។
កីឡាការិនី ស្រួង ភាវី បានទៅកាន់ទីក្រុងញូវយ៉ក សហរដ្ឋអាមេរិកសម្រាប់ការប្រកួតជាលើកដំបូងរបស់ខ្លួន តំណាងឲ្យប្រទេស កម្ពុជា នៅឆ្នាំ ២០១៥ ហើយក្រោយមកកីឡាការិនីរូបនេះ បានត្រឡប់មកពីប្រទេស តួកគី ជាទីដែលរូបនាង បានឈ្នះមេដាយសំរឹទ្ធ ពីការប្រកួត ជើងឯកពិភពលោក 8th World Championship Ladies 3-Coshion។
នៅពេលរំឭកពីការប្រកួតជើងឯកពិភពលោកនៅក្នុងប្រទេស តួកគី នោះ អ្នកស្រី ភាវី បាននិយាយថា៖ «នៅពេលខ្ញុំដើរជាមួយទង់ជាតិប្រទេស កម្ពុជា មុនពេលប្រកួតនេះ គឺមានតែប្រជាពលរដ្ឋ ២-៣ នាក់ប៉ុណ្ណោះ ដែលបានស្គាល់ខ្ញុំ ប៉ុន្តែពេលនេះពួកគេស្គាល់ខ្ញុំកាន់តែច្បាស់ និងស្គាល់ប្រជាពលរដ្ឋកម្ពុជា»។
ជ័យជម្នះរបស់កីឡាការិនី ស្រួង ភាវី មិនបានកើតឡើងដោយគ្មានការប្រឹងប្រែង និងសេចក្ដីក្លាហាននោះទេ ហើយភាពក្លាហានរបស់នាង គឺជាការរៀបការនឹងបុរសកូរ៉េ និងបានផ្សងព្រេងធ្វើដំណើរតាមយន្តហោះទៅកូរ៉េ ដោយមិនចេះភាសាកូរ៉េ សូម្បីមួយម៉ាត់សោះ។
ស្រួង ភាវី ដែលជាម្ចាស់ជើងឯក ការប្រកួត The 1st Asian Championship Ladies 3-Cushion 2018 នៅក្រុងសេអ៊ូលផងនោះ បានបន្ថែមថា៖ «ខ្ញុំជឿជាក់លើការតស៊ូ ការអត់ធ្មត់ និងការប្រឹងប្រែងរបស់ខ្ញុំក្នុងការដោះស្រាយឧបសគ្គដែលមនុស្សមួយចំនួនគេចវេះមិនចង់ជួប នៅពេលពួកគេជួបបញ្ហា ប៉ុន្តែខ្ញុំបានសម្រេចពុះពារឧបសគ្គនេះ»។
កីឡាការិនី ភាវី ចង់ឲ្យប្រទេស កម្ពុជា ស្រឡាញ់កីឡាស្នូកឃ័រ ដូចគេស្រឡាញ់នៅប្រទេស កូរ៉េ។ ភាវី បានបញ្ជាក់ថា៖ «ខ្ញុំឃើញខ្លួនឯងនៅចន្លោះកណ្ដាលរវាងកូរ៉េ និងកម្ពុជា ហើយខ្ញុំគិត ថា ខ្ញុំគឺជាគំរូម្នាក់ សម្រាប់ស្ត្រីដែលបានរៀបការជាមួយជនបរទេស។ ខ្ញុំចង់ក្លាយជាអ្វីមួយដែលប្រទេសទាំង ២ ត្រូវការខ្ញុំ»។
ក្រៅពីកីឡានេះ អ្នកស្រី ភាវី កំពុងផ្សារភ្ជាប់ខ្លួនឯងជាមួយសប្បុរសធម៌ និងការងារសង្គម ដោយអ្នកស្រីបាននាំយកមូលនិធិពីប្រទេស កូរ៉េ ទៅជួយប្រជាជន និងកុមារក្រីក្រ រួមទាំងថ្នាំពេទ្យ និងស្បែកជើងចំនួន ១ ០០០ គូរផងដែរ។ មូលនិធិនេះ គឺបានមកពីធនាគារ និងក្រុមហ៊ុនធំៗ នៅសាធារណរដ្ឋកូរ៉េ។
ឯកអគ្គរាជទូតកម្ពុជាប្រចាំប្រទេស កូរ៉េ លោក ឡុង ឌីម៉ង់ បានមានប្រសាសន៍ថា៖ «អ្វីដែលយើងមានមោទនភាពចំពោះអ្នកស្រីនោះ គឺថា អ្នកស្រីជាស្ត្រីកម្ពុជាមួយរូប ដែលបានរៀបការជាមួយបុរសកូរ៉េ ប៉ុន្តែអ្នកស្រីនៅតែរក្សាបាននូវអត្តសញ្ញាណជាខ្មែរ ដោយមិនចូលសញ្ជាតិកូរ៉េ អ៊ីចឹងនៅពេលអ្នកស្រីបានឈ្នះពានរង្វាន់ជើងឯក អ្នកស្រីបានលើកទង់ជាតិកម្ពុជា មិនមែនទង់ជាតិកូរ៉េនោះទេ»។
លោក ឌីម៉ង់ បានបន្ថែមទៀតថា ស្ថានទូតកម្ពុជាបានជួយគាំទ្រ ស្រួង ភាវី យ៉ាងខ្លាំងនៅប្រទេស កូរ៉េ និងបានជួយឲ្យអ្នកស្រីបង្កើតបានសហព័ន្ធកីឡាស្នូកឃ័រ និងប៊ីយ៉ាកម្ពុជាដែលធ្វើឲ្យអ្នកស្រីអាចចូលរួមប្រកួតក្នុងព្រឹត្តិការណ៍អន្តរជាតិណាមួយ ក្នុងនាមជាកីឡាការិនីតំណាងឲ្យកម្ពុជា។
លោកឯកអគ្គរាជទូតលោក ឌីម៉ង់ បានបន្ថែមថា៖ «យើងនឹងបន្តគាំទ្រអ្នកស្រីតាមលទ្ធភាពអ្វីក៏ដោយដែលអាចធ្វើបាន»៕SN
