ភ្នំពេញ៖ ក្រុមកីឡាករ កីឡាការិនីរបស់ក្រសួងមហាផ្ទៃនៅតែអាចរក្សាបាននូវភាពខ្លាំង គឺការដណ្តើមបានមេដាយមាសច្រើនជាងគេ នៅក្នុងការប្រកួតកីឡាកាយសម្ព័ន្ធ ជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន លើកទី ៣ ឆ្នាំ ២០១៩ ខណៈការប្រកួតឆ្នាំនេះ ត្រូវបានមន្រ្តីជំនាញរបស់សហព័ន្ធកីឡាកាយសម្ព័ន្ធកម្ពុជាអះអាងថា មានភាពស្វិតស្វាញខ្លាំងដែលធ្វើឲ្យមន្ត្រីបច្ចេកទេសមានការឈឺក្បាលក្នុងការដាក់ពិន្ទុរកអ្នកឈ្នះមេដាយផងដែរ។
តាមរយៈការប្រកួត ៤ ថ្ងៃពេញ នៅសាលដំបូលទូកនៃពហុកីឡដ្ឋានជាតិ ហើយបានបញ្ចប់កាលពីល្ងាចថ្ងៃអង្គារកន្លងមកនេះ អត្តពលិកចំនួន ៦៤ នាក់ ដែលលេងតំណាងឲ្យក្លិបចំនួន ៤ សុទ្ធតែដណ្តើមបានមេដាយមាស ប្រាក់ និងសំរឹទ្ធដូចគ្នា ទាំងលើការប្រកួតកាយសម្ព័ន្ធអេរ៉ូប៊ិក និងអាទិស្ទីក នៅលើវិញ្ញាសាសរុបចំនួន ១៣។
យ៉ាងណាក៏ដោយ កីឡាករ កីឡាការិនីក្លិបក្រសួងមហាផ្ទៃ នៅតែរក្សាបានភាពខ្លាំង គឺការដណ្តើមបានមេដាយមាស ៤ និងប្រាក់ ៥ ដើម្បីបន្តទទួលបានលេខ ១ ក្នុងនាមជាអ្នកដណ្តើមបានមេដាយមាសច្រើនជាងគេដដែល ខណៈក្រុមអត្តពលិកខេត្តក្រចេះបានឈរនៅលេខ ២ ជាមួយការឈ្នះមេដាយមាស ៤ ប្រាក់ ៤ និងសំរឹទ្ធ ៤ គឺមានន័យថា ខេត្តក្រចេះ បានចាញ់ប្រៀបក្លិបក្រសួងមហាផ្ទៃ ត្រឹមមេដាយប្រាក់ ១ ប៉ុណ្ណោះ។
ចំណែកក្រុមកពីខេត្តកំពង់ឆ្នាំងបានឈ្នះមេដាយមាស ៣ ប្រាក់ ៣ សំរឹទ្ធ ៧ ហើយក្រុមខេត្តតាកែវ បានឈ្នះមេដាយមាស ២ ប្រាក់ ១ និងសំរឹទ្ធ ២ ខណៈពិធីបិទការប្រកួតនេះ ត្រូវបានធ្វើឡើង ក្រោមអធិបតីភាពរបស់លោក វ៉ាត់ ចំរើន អគ្គលេខាធិការ NOCC តំណាងឲ្យលោករដ្ឋមន្រ្តី ថោង ខុន ដែលជាប្រធានសហព័ន្ធកីឡាកាយសម្ព័ន្ធកម្ពុជា និងជាប្រធាន NOCC។
យ៉ាងណាមិញសម្រាប់ការប្រកួតប្រជែងរបស់អត្តពលិកតំណាងឲ្យក្លិបទាំង ៤ រយៈពេល ៤ ថ្ងៃនេះ ត្រូវបានលោក ណយ ផាណា មន្រ្តីជំនាញសហព័ន្ធកីឡាកាយសម្ព័ន្ធអះអាងថា មានភាពស្វិតស្វាញខ្លាំង ពិសេសការប្រកួតរវាងក្រុមយុវជនមានអាយុចន្លោះពី ១៤ ឆ្នាំ ទៅ ១៥ ឆ្នាំ ខណៈអ្នកទាំងនេះ ក៏ស្ថិតនៅក្នុងជម្រើសសម្រាប់ត្រៀមឆ្ពោះទៅស៊ីហ្គេមឆ្នាំ ២០២៣ នៅកម្ពុជាផងដែរ។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានថ្លែងក្រោយការប្រកួតកាលពីល្ងាចថ្ងៃអង្គារនោះថា៖ «យើងមើលឃើញថា អត្តពលិករបស់យើងមានការប្រកួតប្រជែងគ្នាខ្លាំង ហើយការប្រជែងគ្នាខ្លាំងនេះ ទី១ ដោយសារសហព័ន្ធយើងបានបញ្ជ្រាបកីឡាករវ័យក្មេងឆ្ពោះទៅកាន់ស៊ីហ្គេម ឆ្នាំ ២០២៣ ទី២ ប្រាក់រង្វាន់ ដោយឯកឧត្តម ថោង ខុន បានដាក់ឲ្យលេខ ១ បាន ៥០ ម៉ឺន លេខ ២ បាន ៤០ ម៉ឺន និងលេខ ៣ បាន ៣០ ម៉ឺនរៀល ហើយខ្ញុំគិតថា លុយនេះច្រើនមែនទែន គឺគ្រាន់តែប្រាក់រង្វាន់លើកទឹកចិត្តការប្រកួតនេះ ចំណាយអស់ ៣០ លានរៀល»។
បើតាមលោក ណយ ផាណា បានឲ្យដឹងថា ការប្រកួតកីឡាកាយសម្ព័ន្ធជ្រើសរើសជើងឯកថ្នាក់ជាតិ និងពានរង្វាន់ឯកឧត្តមបណ្ឌិត ថោង ខុន ឆ្នាំ ២០១៩ បានចំណាយអស់ ២១ ០០០ ដុល្លារ ដោយក្នុងមានថវិកាជាតិ តាមរយៈក្រសួងអប់រំ យុវជន និងកីឡា ចំនួន ៩ ០០០ ដុល្លារ ហើយលោករដ្ឋមន្រ្តីក្រសួងទេសចរណ៍ ថោង ខុន បានបន្ថែមថវិកាផ្ទាល់ខ្លួនបង្រ្គប់អស់ចំនួន ១២ ០០០ ដុល្លារ ដែលធ្វើឲ្យការប្រកួតនេះ បានបញ្ចប់ដោយរលូន។
លោក ផាណា បន្ថែមថា៖ «តាមរយៈការប្រកួតនេះ គឺក្រុមអត្តពលិកស្ថិតក្នុងអាយុ ១៤ ទៅ ១៥ ឆ្នាំ មានភាពលេចធ្លោខ្លាំងជាងគេ ដោយពួកគាត់មានការប្រកួតប្រជែងខ្លាំងមែនទែន គឺសូម្បីតែគណៈកម្មការចៅក្រមអន្តរជាតិរបស់យើង ដែលទើបបញ្ចប់ការសិក្សាមកពីខាងក្រៅនោះ ក៏មានការឈឺក្បាលតិចតួច ក្នុងការវែកញែក ការផ្តល់ពិន្ទុឲ្យបានសុក្រឹត និងយុត្តិធម៌ ផងដែរ ខណៈក្រុមយុវជនទាំងនេះ សុទ្ធតែជាថ្នាលសម្រាប់ឆ្ពោះទៅស៊ីហ្គេម ឆ្នាំ ២០២៣ របស់យើង»៕